Salmib 111 - Quiché Bible

Cak'ijilax ri Dios cumal quech ri e u banoj

¹ ¡Chyok' u k'ij ri Ajawaxel! Quink'ijilaj na ri Ajawaxel ruc' ronojel wanima', chupam ri u mulixic quib ri winak ri e tz'akatisanelab, chupam ri mulin ib chnimalaj conojel.

² Ri e u banoj ri Ajawaxel e nimak, jachin tak c'ut ri quelok'ok'enic, quequichomaj quij.

³ Ri u chac sibalaj je'lic xukuje' cajuluwic, are c'u ri u suq'uil jekel chbe k'ij sak.

⁴ U banom chi man c'o ta qui sachic tak ri mayibal ri e u banom. Ri Ajawaxel ch'uch'uj xukuje' quel u c'u'x;

⁵ cuya' tzukbal que ri nim queilowic; ¡man casach ta wi ri u c'ulwächinic pa u jolom!

⁶ Xuc'ut chuwäch ri u tinimit ri u cuinem ri e u chac, xujach c'ut ri culew ri e k'ijilal diosib pa qui k'ab.

⁷ Ri cuban ri Dios suc' xukuje' kastzij; cuya' cacu'bisax c'uxaj chquij ri e u takomal.

⁸ Co c'u e jekelic c'ä chbe k'ij sak, e banom c'u pa kastzij xukuje' colomal.

⁹ Xutor ri u tinimit, co xujekeba' ri u c'ulwächinic re chbe k'ij sak. Ri Dios tastalic xukuje' xibibal.

¹⁰ Ri no'j ri nim na are ri nim rilic ri Ajawaxel; jachin tak ri nim caquil wi c'o utzalaj qui chomanic. Amak'el cäya' na u k'ij ri Dios.