Salmib 11 - Quiché Bible

Jicalaj jiquibam c'uxaj chrij ri Ajawaxel

¹ In quintzucuj u to'ic wib ruc' ri Ajawaxel. Xak lok' ri' we cäbix chwe: “Jät ja c'u' awib pa tak ri juyub jacha' ri chicop ri e c'o qui xic';

² che ila' la ri banal tak etzelal: cäquicoj ri ch'ab pa ri c'am, cäquitanij ri q'uiakbal ch'ab, c'ä pa jun c'olbal ri c'utalic queq'uiakan wi ulok chque ri utzalaj tak winak ri e tz'akatisanelab pa ronojel.

³ We c'u yojyobinak chic ri pixab ri cäcu'bax ta wi c'uxaj, ¿jas ta chic ri cacuin ri utzalaj winak cubano?”

⁴ Ri Ajawaxel c'o chupam ri tastalicalaj rachoch, ri Ajawaxel c'o ri u tem re ajawibal pa ri caj, e jaktal ri e u bak'wäch queralwächij conojel ri winak.

⁵ Ri Ajawaxel queralwächij ri e suc' xukuje' ri e banal tak etzelal, ruc' ronojel u c'aslibal cäretzelaj qui wäch ri cäkaj chquiwäch ri u banic ri tokinic.

⁶ Ri Ajawaxel cujabij na paquiwi' ri e banal tak lawaloyil rachak k'ak', k'ak' xukuje' asubre, cuc'am na ulok jun quiakik' ri cuporoj ronojel. ¡Ri Ajawaxel cuya' na ri takal chque!

⁷ Suc' ri Ajawaxel culok'ok'ej c'ut ri suq'uilal; ¡Rumal ri' caquil na ri u palaj ri suc'alaj tak winak!