Salmib 109 - Quiché Bible

U tz'onoxic ri to'banic che ri K'atal Tzij ri nim u k'ij

¹ Nu Dios, xak ma ta la ri nu ch'awem uc' la.

² Chi'aj c'ut banal tak tzij xukuje' banal etzelal queyok'on chwe, xak c'u jalum k'abam cäquiyac chwij.

³ Qui sutim wij ruc' ri qui yok'onic; ¡xak cäquiban c'ax chwe man c'o ta c'u nu mac!

⁴ Che u q'uexwäch ri nu lok'ok'ebal c'u'x, cäquiban qui c'ulel chwe, are c'u ri in quinban ch'awem ruc' Dios.

⁵ Ruc' etzelal qui tojom ri utzil ri nu banom chque, che u q'uexwäch ri nu lok'ok'ebal c'u'x, caquetzelaj nu wäch.

⁶ Cojo' la jun banal etzelal che u k'atal tzij, kas are' c'u ri cojol u tzij chc'okowok;

⁷ aretak chk'at tzij puwi' chk'alajisaxok chi c'o u mac, chc'okox rumal ri to'l rech.

⁸ ¡Chc'asal xa quieb oxib k'ij, jun chi c'u winak chechben can ri jastak rech!

⁹ ¡Ri e u c'ojol checanaj can che minorib, ri rixokil chi malcanirok!

¹⁰ ¡Xak chemalacat ri ralc'ual, xak chquitz'onola' qui wa! ¡Chebesax bic pa ri cachoch ri wulijinak chic!

¹¹ Chmaj ri jastak rech rumal ri ya'l puak pa jalomal. Chi winak ri man etamatal ta u wäch chmajow ri cuch'äc che ri u chac.

¹² Chi man c'o ta jun chel ta u c'u'x che, are' xukuje' chque ri e u c'ojol ri e minorib.

¹³ Chsach qui wäch ri rija'lil, kas xa jumul chupisax ri u bi'.

¹⁴ Chnataj che ri Ajawaxel ri retzelal ri u tat, mawi jubik' muchup ri u mac ri u nan;

¹⁵ ma ta chsach pa u jolom ri Ajawaxel, chuchupu' c'u ri natabal quech cho ri uwächulew.

¹⁶ Mawi jubik' xuchomaj chi chel ta u c'u'x; chque ri mebayib, ri xukuje' e mach'amoj, ri man nimak ta qui k'ij, ri e c'axc'obinak, xebuterenej pa cakan c'ä xebucämisaj na.

¹⁷ Are c'u xkaj ri c'okonic chuwäch, ¡chc'okox ba'! Man xraj ta ri tewichibal, ¡mawi ba' jubik' chtewichixok!

¹⁸ Chch'uk rumal ri c'okonic chux c'u ratz'iak; choc chupam xukuje' chquipam ta ri e u bakil je ta ne' ri ja' o ri aseit;

¹⁹ ¡chch'uk rij rumal jacha' ta ne' jun atz'iak chjat'ixok jacha' rumal jun ximibal pamaj!

²⁰ ¡Je tojbal wa' chuya' ri Ajawaxel chque ri e nu c'ulel, xukuje' chque ri c'ax quech'aw chwe!

²¹ Are' c'u ri lal, Ajawaxel, chya' la u k'ij ri bi' la, chbana' la utzil wuc'. ¡Chincolo' la, rumal ri rutzil ri lok'ok'ebal c'u'x la!

²² Sibalaj in meba' xukuje' in ch'ibatajinak, socotajinak ri wanima';

²³ cätajin cäbe nu sachic jacha' jun mumu'j, ¡in charchatem rumal ri quiakik' jacha' jun sac'!

²⁴ Quebak'ot ri nu ch'ec rumal rech chi man quinwa' taj; cätajin quinbakiric rumal rech chi man quinrik ta chi quintijo;

²⁵ ¡in uxinak yacal qui tze' ri winak! ¡aretak quinquilo, cäquisutisa' ri qui jolom che retz'bexic nu wäch!

²⁶ Chinto' la, Ajawaxel, xukuje' nu Dios; ¡chincolo' la, rumal ri lok'ok'ebal c'u'x la!

²⁷ Chquetamaj chi ri lal, Ajawaxel, banom la wa' cuc' ri k'ab la.

²⁸ Pune' ta ne quinquic'okoj, xuwi ta ne we quintewichi'j la. Chel qui q'uixbal ri e are' are' c'u ri pataninel ech la cäquicot na.

²⁹ ¡Ri e nu c'ulel chenoj che q'uixbal! ¡chech'ukutaj rumal ri q'uixbal jacha' rumal jun ch'ukubal!

³⁰ Maltioxinic ri man c'o ta u q'uisic quinya' che ri Ajawaxel ruc' ri nu chi'; ¡quink'ijilaj na chquixo'l q'uialaj winak!

³¹ Are' c'u cäch'aw puwi' ri meba', cäresaj pa qui k'ab ri quec'okonic.