Salmib 106 - Quiché Bible

Ri Israel amak'el man caniman taj

¹ ¡Chyo'k u k'ij ri Ajawaxel! Chiya' maltioxinic che ri Ajawaxel utz c'ut ri are', rumal rech chi ri lok'ok'ebal u c'u'x junalic.

² ¿Jachin ta ri cäcuinic quebutzijoj tak ri ch'äcanic ri u banom ri Ajawaxel? ¿Jachin ta ri cäcuinic cuya' u k'ij jas ri takal che?

³ E tewichital ri cäquiban ri suq'uilal amak'el c'ut are' cäquiban ri suq'uilal.

⁴ Chinnataj che la, Ajawaxel, aretak chäban la utzil che ri tinimit la; minsach pa jolom la aretak cäpe la che u colic,

⁵ rech quinwil ri utzil ri cäquirik ri e cha'om la, rech quinquicotic xukuje' quinnimarisaj nu k'ij junam ruc' ri tinimit ri ech la.

⁶ Uj macuninak, ka banom ke jas ri xquiban ri e ka mam; ketzelam kib; ka banom ri man utz taj.

⁷ Ri e ka mam chila' pa Ejipt, man nim ta xquil wi ri nimak tak mayibal ri xban la; xsach ri nimalaj lok'ok'ebal c'u'x la pa qui jolom, xquiyac quib che c'ulelaxic la, chu chi' ri Quiäk Plo.

⁸ Xebucol c'u ri Dios xa u mac rech ri u bi', che u c'utic ri u cuinem.

⁹ Xuyaj ri Quiäk Plo xuchaki'jarisaj c'ut. Xuban chque chi xeboc'ow chupam ri u choil ri plo je ta ne pa jun chaki'j uwo sak.

¹⁰ Jewa' xuban che quesaxic pa qui k'ab ri e qui c'ulel, pa ri qui cuinem ri quebetzelan qui wäch.

¹¹ Ri ja' xebuch'uk ri e qui c'ulel man c'o ta jun chque xc'asi' ta canok,

¹² xecojon c'u che ri e u chi'nic ri Dios, xequibixoj c'u bix che.

¹³ Chanim c'ut xsach ri e u banoj ri Dios pa qui jolom, ri man xqueyej ta c'ut quetamaxic ri e u chomam qui banic;

¹⁴ chila' c'ut pa ri chaki'j uwo sak, xquic'ambejej wi ri Dios, xquicoj qui chuk'ab chi chuya' chque jas ri cäcaj.

¹⁵ Ri Dios xuya' chque ri xquitz'onoj, xutak c'u ne' ulok jun cämisanel yabil paquiwi'.

¹⁶ E c'o c'u jujun chupam ri kajebal xtitat xquina' chrij ri Moises xukuje' chrij ri Aaron ri u jachom rib pa u k'ab ri Ajawaxel.

¹⁷ Xujak c'u rib ri ulew xubik' c'u bic ri Datan, xukuje' conojel ri jumulaj e rachil ri Abiram;

¹⁸ ¡xnicow ri k'ak' paquiwi' conojel! ¡ri rak' k'ak' xebuporoj ri e banal tak etzelal!

¹⁹ Pa ri juyub Horeb xquiban wi jun alaj ama' wacax, jun dios re k'an puak, ri xquich'uch'ajirisaj puwi' ri k'ak', xquik'ijilaj c'ut:

²⁰ ¡Xquiq'uex ri juluwemalaj u wächbal ri Dios che u wächbal jun wacax ri cutij k'ayes!

²¹ Xsach ri Dios pa qui jolom, ri qui colonel, ri xebuban nimak tak mayibal pa Ejipt;

²² ri xebuban nimak tak mayibal pa ri rulew ri Cam, xukuje' jastak ri e xibibal pa ri Quiäk Plo.

²³ Ri Dios xubij chi cusach qui wäch, are c'u ri Moises, ri u cha'om, xch'aw paquiwi', xak jeri' xjamar ri royowal ri Dios, xuk'il rib che u sachisaxic qui wäch.

²⁴ Chumatam chic, man nim ta xquil wi jun je'lalaj ulew, man c'u xecojon ta che tak ri e u chi'nic ri Dios;

²⁵ c'ax xech'aw che ri Dios pa tak ri qui lic'om cäbal, man xequinimaj ta tak ri e u takanic.

²⁶ Xuyac c'u ri u k'ab, xuban c'u ri chi'nic ri kas cäban na chi quebecäm na chupam ri chaki'j uwo sak,

²⁷ cuban c'u na chi quebecäm na ri e quija'lil, quebujabuj c'u na chquixo'l ri nimak tak tinimit ri e k'ijilal tak diosib.

²⁸ Xebux c'u tak u lok'om pataninelab ri Baal-peor, xquitij quech ri tabal tak tok'ob ri xecoj chquiwäch tak ri diosib ri man c'o ta qui c'aslemal.

²⁹ U mac c'u quech ri itzel tak qui chac xyactaj royowal ri Dios, xpe c'u jun cämisanelalaj yabil paquiwi'.

³⁰ Xwalij ri Pinees, xucämisaj ri ajchak'mac, xak jeri' xtani' ri cämisanelalaj yabil.

³¹ Ri Dios xurajilaj we suc'alaj banoj ri' chrij re chbe k'ij sak, xoc'ow cuc' ri tataxelab xk'ax cuc' ri c'ojolaxelab.

³² Xquiban c'ut chi xoyowar ri Dios chquichi' ri ja' re Merib, qui mac c'u quech ri e are' c'ax xutaklebej ri Moises,

³³ xquic'ayirisaj ri ranima', ri are' xch'awic man cuchomaj ta ri cubij.

³⁴ Man xquisach ta qui wäch tak ri tinimit ri xubij ri Ajawaxel chi cäsach qui wäch.

³⁵ Xane' xquiyuj quib cuc' ri e k'ijilal tak diosib xquetamaj u banic que ri qui nak'atisabal:

³⁶ Xequik'ijilaj tak diosib ri quequik'ijilaj tak ri winak, ri xbanow chque chi xquirik c'ax,

³⁷ xequichi'j c'u ri e qui c'ojol xukuje' ri e qui mia'l che tabal tok'ob chque ri itzel tak uxlabal.

³⁸ Xequitix quic' ri man e c'o ta qui mac, ri e qui quiq'uel ri e qui c'ojol xukuje' tak ri e qui mia'l xequiya' che tabal tok'ob chquiwäch ri e qui diosib ri aj cananeyib. Ri ulew xtz'ilotaj rumal ri qui quiq'uel,

³⁹ xequitz'iloj c'u tak quib cumal tak ri e qui banoj xca'n ri cäcan ri quech ri nim ch'utin.

⁴⁰ Xk'ak'ar c'u ri Ajawaxel chrij ri u tinimit, xebuxutuj c'ut ri e rech;

⁴¹ xebuwonoba' c'u pa qui k'ab ri e k'ijilal tak diosib, xebajawin c'ut ri e qui c'ulel paquiwi'.

⁴² Xexak'alex cumal ri qui c'ulel, xequimach'irisaj chuxe' ri qui cuinem.

⁴³ Q'ui mul xeto'tajisax rumal ri Dios, xa c'u xequic'ulelaj ri e u chomanic, xebik'taj c'u chupam ri quetzelal.

⁴⁴ Pune' c'u je xquibano, aretak xrilo chi quebisonic, aretak xuta' ri qui juyuwem,

⁴⁵ xnataj ri u c'ulwächinic cuc', xuq'uex c'ut ri u chomanic, rumal rech chi sibalaj nim ri lok'ok'ebal u c'u'x:

⁴⁶ ¡Xubano chi xukuje' ne' ri xech'äcan paquiwi' xquiban utzil chque!

⁴⁷ ¡Chujto'tajisaj la, Ajawaxel, xukuje' ka Dios! ¡Chujesaj la chquixo'l ri nimak tak tinimit rech cäkaya' u k'ij ri tastalicalaj bi' la, rech cujquicot che u ya'ic k'ij la!

⁴⁸ ¡Tewichital ri Ajawaxel, ri u Dios ri Israel, chbe k'ij sak! ¡Conojel chqui bij: “Je' chelok!” ¡Chyo'k u k'ij ri Ajawaxel!