Salmib 105 - Quiché Bible

Ri jastak ri e u banom ri Dios che ri Israel

¹ ¡Chiya' maltioxinic che ri Ajawaxel! ¡Chiwesaj u tzijol ri u bi'! Chebitzijoj ri jastak ri e u banom chque tak ri tinimit.

² Chebibixoj bix che u ya'ic u k'ij. ¡Chebitzijoj ri nimak tak mayibal ri e u banom!

³ Chich'obo' rumal ri tastalicalaj u bi'. ¡Chquicot ri canima' ri quetzucun che ri Ajawaxel!

⁴ Chitzucuj ri Ajawaxel, xukuje' ri u cuinem; chitzucuj ri Ajawaxel ronojel k'ijol.

⁵ Chenataj chiwe ri e nimak tak u chac xukuje' e mayibal, xukuje' ri pixab ri e tz'ibam ri e u yo'm qui bixic;

⁶ ix, ri ix ri rija'lil ri Abraham ri pataninel rech; ix ri ix u cojol ri Jacob ri ix u cha'om.

⁷ Ri are', are' ri Ajawaxel, ri ka Dios; ¡are' cätakan puwi' ronojel ri uwächulew!

⁸ Pune' ta c'u ne' queboc'ow jun mil ija'lil man cäsach ta pa u jolom ri e chi'nic ri e u c'ulwächinic,

⁹ rech ri c'ulwächinic ri xuban ruc' ri Abraham, che ri chi'nic ri kas cäban na ri xuban che ri Isaac

¹⁰ Ri xujekeba' jacha' jun pixab che ri Jacob, jacha' ri jun junalic c'ulwächinic che ri Israel,

¹¹ aretak xubij: “Quinya' ri ulew re Canaan chawe jacha' che echbal ri ya'tal chawe.”

¹² Pune' xa e quieb oxib ri e are', e quieb oxib man e aj chila' ta pa ri ulew,

¹³ ri quebel bic pa jun nim tinimit quebe pa jun nim tinimit chic pa jun ajawibal pa jun ajawibal chic,

¹⁴ ri Dios man xuya' ta be chi c'o ta jachin xbanow c'ax chque, xuya' c'u ne u bixic chque tak ri ajawinelab:

¹⁵ “Mebichap ri e cha'tajinak wumal, mawi c'ax mixch'aw chque ri e k'axal tak nu tzij.”

¹⁶ Xuc'am ulok wi'jal pa ri ulew ri', xresaj ronojel u wäch tzukbal chque.

¹⁷ Xunabejisaj c'u bic ri Jose chquiwäch, ri xquic'ayij bic jacha' jun lok'om pataninel.

¹⁸ Xesoc ri rakan cumal tikom tak ch'ich'; ¡ch'ich' xyutubex rech!

¹⁹ Xtijtobex ri Jose rumal ri u tzij ri Ajawaxel, C'ä xtz'akat na ri u yo'm u bixic ri Jose,

²⁰ ri ajawinel, ri cätakan paquiwi' q'uialaj winak, xuya' takanic chi cätzokopixic;

²¹ xuya' rekle'n chi coc che takanel puwi' ri rachoch xukuje' puwi' ronojel ri c'o ruc',

²² rech cätijonic quebuban c'u ajno'jab chque ri c'amal tak be xukuje' ri nimak tak tatayib.

²³ Xopan c'u ri Israel, ri cäbix Jacob che, xrokxanij rib pa Ejipt, pa ri rulew ri Cam.

²⁴ Ri Dios xubano chi xq'uiyir ri rajilabal ri u tinimit, c'o c'u na u chuk'ab chquiwäch ri aj ejiptib.

²⁵ Xuban c'ut chi ri aj ejiptib xquiyac quib chrij u tinimit, xequisub c'ut ri e pataninel tak rech ri Dios.

²⁶ Ri Dios xutak c'u bic ri Moises ri pataninel rech, xukuje' ri Aaron ri u cha'om,

²⁷ ri e are' xequiban tak ri e u mayibal ri Dios chupam ri chaki'j uwo sak: ¡nimak tak mayibal xquiban pa ri rulew ri Cam!

²⁸ Ri Dios xutak ulok jun k'ekumalil ri ronojel xuch'uku, u mac rech chi ri aj ejiptib man xquinimaj ta ri e u tzij.

²⁹ Xebujalwächij ri ja' ri e c'o pa tak ri nima' pa quic'. Xebucämisaj conojel ri cär ri e c'o chupam;

³⁰ xuchuwirisaj ri ulew cumal tak xtutz', xukuje' ne ri u warbal ri ajawinel.

³¹ Xch'aw ri Dios, xebopan ri e amalo, xukuje' us, xquinojisaj ri ulew Ejipt.

³² Che u q'uexwäch jäb, xutak ulok sakbach xukuje' rak' tak k'ak' puwi' ri tinimit.

³³ Xebuk'aj tak ri qui uva, ri qui higo; ¡xebuk'aj tak ri juwi' tak che' pa Ejipt!

³⁴ Xch'aw ri Dios, xebopan c'u ri e sac'; ¡rumal ri qui q'uiyal man cuya' ta quebajilaxic!

³⁵ ¡Xequitij ri k'ayes ri e c'o pa ri juyub, xukuje' ronojel ri q'uiyinak cho ri ulew!

³⁶ ¡Xuc'am ulok cämical puwi' ri Ejipt, xebucämisaj conojel ri qui nabeal ri aj ejiptib!

³⁷ Xresaj c'u na ulok ri Dios ri u tinimit quekam chic k'an puak xukuje' sak puak, man c'o ta jun chque ri amak' xk'atitaj taj.

³⁸ Ri aj ejiptib xequicotic aretak xquilo chi xebel ulok, sibalaj c'u qui xe'n quib.

³⁹ Ri Dios xulic' jun sutz' che qui ch'ukic, xunicowisaj jun k'ak' che u c'utic ri qui be chak'ab.

⁴⁰ Xquita' qui wa, xutak c'u ulok sakco'r chque, ruc' wa ri xpe chicaj xebunojisaj.

⁴¹ Xupaxij ri abaj, xel ulok ja' chupam, ri xlemem pa ri chaki'j uwo sak jacha' jun nima'.

⁴² Xnataj c'ut ri tastalicalaj chi'nic che ri u banom che ri Abraham ri pataninel rech.

⁴³ Jewa' xuban ri Dios aretak xresaj ulok ri u tinimit ri cha'talic, cuc' rakoj tak chi'aj re quicotemal,

⁴⁴ xujach ri culew ri jule' nimak tak tinimit chic pa qui k'ab xukuje' ri qui ch'äcoj jule' tak tinimit chic,

⁴⁵ nim c'u chequila' wi xukuje' cheboc il che quilixic tak ri pixab xukuje' tak ri u tijonic ri Ajawaxel. ¡Chyo'k u k'ij ri Ajawaxel!