Salmib 104 - Quiché Bible

K'ijilanic che ri winakirisanel

¹ ¡Quintewichi'j na ri Ajawaxel ruc' ronojel ri nu c'aslibal! ¡Sibalaj lal nim banic la, Ajawaxel xukuje' nu Dios! Atz'iakim ib la ruc' juluwem xukuje' nim ilic;

² bolk'otim ib pa jun sakilal jacha' ta ne jun atz'iak. ¡Lal xlic'ow la ri caj jacha' jun ch'ukubal!

³ ¡Co xjekba' la ri rakan tak ri achoch la puwi' ri ja', chila' chicaj! Caban carwaj la chque ri sutz'; ¡cäbin la puwi' ri u xic' ri quiakik'!

⁴ Cäban tako'n la chque tak ri quiakik', e are c'u ri e rak' k'ak' cäban pataninel ech la chque.

⁵ Xcoj la ri uwächulew paquiwi' ri e u tac'alibal rech mawi jubik' quel pa ri u c'olbal.

⁶ Ri cholaj plo ch'ukuwinak u wi' ri ulew je ta ne jun atz'iak. Ri ja' quebuch'uk tak ri juyub.

⁷ Xyaj c'u la, xbe c'ut; aninak xanimajic aretak xuta' ri ch'abal la jacha' ri cakulja.

⁸ Xpaki' paquiwi' tak ri juyub, xkaj chquipam tak ri beya', xbe pa ri c'olbal ri c'utum la che,

⁹ pa ri c'ulbat ri xbij wi la che chi man cuxal k'atij taj, rech man cuch'uk ta chi jumul ri uwächulew.

¹⁰ Lal cätakow la ulok ri ja' ri quebel ulok pa tak ri e u q'uiyibal tak ja' pa tak ri nima' ri quebin xo'l tak ri c'ache'laj.

¹¹ We ja' ri' cacuq'uiaj ri awaj ri e c'o pa tak ri juyub; ruc' wa' cäquesaj ri qui chaki'j chi' ri juyubal tak bur.

¹² Ri chicop ri e c'o qui xic' querapap cho caj, chquichi' tak ri nima' cäquiban wi qui soc; ¡chila' quebixon wi xo'l tak ri qui k'ab tak ri che'!

¹³ Lal ri cäja'n la ri c'ache'laj kas pa ri achoch la ri c'o ulok chicaj; cuc' jäb ri quetixtob ulok chicaj, ri cuch'akakisaj ri ulew.

¹⁴ Cäq'uiyisaj la ri quecha' ri awaj, xukuje' ri tico'n ri quebutic ri winak ri cäresaj wi ri u wa pa ri ulew,

¹⁵ ri wa ri queyo'w u chuk'ab, xukuje' ri u wa'l uva, ri cuya' quicotemal che ri u c'aslemal ri cubano chi cäjuluw na ri u palaj chuwäch ri aseit.

¹⁶ Cäresaj ri qui chaki'j chi' ri che' tak, ri ch'äcal tak te' ri e c'o pa ri Libano ri xebutic ri Ajawaxel.

¹⁷ Xo'l tak ri qui k'ab cäquiban wi qui soc ri chicop ri e c'o qui xic' ri e ch'utik na, ri siguenya quec'oji' puwi' tak ri chäj.

¹⁸ Ri tac'atak tak juyub are' qui c'olbal chque ri juyubal tak q'uisic', xo'l tak ri abaj cäquic'u' wi quib ri imul.

¹⁹ Xban la ri ic' che retaxic ri k'ijol; ri k'ij reta'm jampa' cuc'u' rib.

²⁰ Cälic' la ri k'ekumalaj chak'ab, cäquichaplej c'u quelic ulok ri awaj pa tak ri c'ache'laj.

²¹ Ri coj quewun che u rikic ri qui ti'; cäquita' che ri Dios chi chuya' ri cäquitijo.

²² Aretak c'u quel ulok ri k'ij, quetzelej pa ri qui jul.

²³ C'äte ri' quel ulok ri winak cäbe pa ri u chac cachacun c'ut c'ä coc na ri ak'ab.

²⁴ ¡E joropa' ri jastak ri e banom la Ajawaxel! Conojel xeban la ruc' no'j; ¡ri uwächulew nojinak che ronojel ri q'uiyisam la!

²⁵ C'o ri plo nim u wäch xukuje' cäliq'uiq'uic, jawije' e c'o wi awaj ri man quebajilataj taj, nimak xukuje' ch'utik;

²⁶ chla' quebin wi tak ri jucub, chla' c'o wi ri Lebiatan, xban la we nimalaj awaj ri' rech cäquicot chupam.

²⁷ Conojel wa' quebeyen che la rech cäya' la ri qui wa pa ri u k'ijol.

²⁸ Ri lal queya' la chque, ri e are' quequimolo; cäjak ri k'ab la, quenoj c'u ri qui pam che ronojel ri utz na;

²⁹ we cac'u' ri palaj la, caquixe'j quib; we quesaj la ri cuxlab quecämic quebux chi jumul ulew.

³⁰ We c'u cätak la ulok ri uxlab la re c'aslemal, queq'uiyic, jeri' cac'aq'uirisaj la ri u bantajic ri uwächulew.

³¹ ¡Junalic ri u juluwem ri Ajawaxel! ¡Ri Ajawaxel cäquicot chupam ronojel ri u chac!

³² Ri uwächulew cäyicopic aretak cäcäyex rumal; ¡ri juyub cäquesaj sib aretak cächap rumal!

³³ Joropa' k'ij ri quinc'asi'c xukuje' c'o nu c'aslemal, quebenbixoj na bix che ri Ajawaxel, ri nu Dios.

³⁴ Chekaj ta ri e nu chomanic chuwäch ri Ajawaxel, xuwi c'u ruc' are' quinrik wi quicotemal.

³⁵ Chsach qui wäch ri ajmaquib cho ri uwächulew. ¡Militaj chquiwäch ri banal tak etzelal! ¡Quintewichi'j na ri Ajawaxel ruc' ronojel ri nu c'aslibal! ¡Chyok u k'ij ri Ajawaxel!