Salmib 103 - Quiché Bible

Quintewichi'j ri Ajawaxel

¹ Quintewichi'j na ri Ajawaxel ruc' ronojel ri nu c'aslibal; quintewichi'j ruc' ronojel ri wanima' ri tastalicalaj u bi'.

² Quintewichi'j ri Ajawaxel ruc' ronojel ri nu c'aslibal; mawi jun chque ri utzil ri e u banom chwe quesach ta pa nu jolom.

³ Are' ri quecuyuw conojel tak ri wetzelal; are' ri quecunan conojel tak ri e nu yabilal;

⁴ ri cuto'tajisaj ri nu c'aslemal chuwäch ri mukubal; ri quinunojisaj che lok'ok'ebal c'uxaj xukuje' ch'uch'ujil;

⁵ ri quinunojisaj che ronojel u wäch utzil, quinrac'alobisaj c'ut jacha' jun cot.

⁶ Ri Ajawaxel cak'atan tzij kas ruc' suq'uilal paquiwi' ri cäban c'ax chque.

⁷ Xebuya' retamaxic tak ri e u be xukuje' ri e u banoj che ri Moises xukuje' che ri u tinimit Israel.

⁸ Ri Ajawaxel ch'uch'uj xukuje' quel u c'u'x; c'o u coch'onic xukuje' nojinak che lok'ok'ebal c'uxaj.

⁹ Man xak ta amak'el cujuyajo xukuje' ri royowal man cäbeytaj taj;

¹⁰ man u yo'm ta ri tojbal chke jas ri ri takal chque ri ketzelal xukuje' tak ri e ka mac;

¹¹ sibalaj c'o na ri u nimal lok'ok'ebal u c'u'x chque ri nim queilowic, jacha' ri u nimal ri caj puwi' ri uwächulew.

¹² Ri ka mac u najtajisam chke, jacha' u najtajisam ri elebal k'ij ruc' ri u kajebal k'ij.

¹³ Ri Ajawaxel sibalaj ch'uch'uj cuc' ri nim caquil wi, jacha' jun tataxel cuc' ri e u c'ojol;

¹⁴ ri are' reta'm jas xcoj che kabanic: kas reta'm chi uj puc'uc' ulew.

¹⁵ Ri u c'aslemal ri winak xak junam ruc' ri k'ayes, cäpok'ic jacha' jun juyubal cotz'i'j:

¹⁶ Chanim cäsach u wäch, xuwi c'u caslabesaxtax rumal ri quiakik', casach u wäch, man c'o ta jun c'o ta caretamaj che.

¹⁷ Are c'u ri u lok'ok'ebal c'u'x ri Ajawaxel re chbe k'ij sak chque ri queyo'w u k'ij; ri u suq'uil man c'o ta u q'uistajic chque pa conojel ri ija'lil,

¹⁸ chque ri caquitz'akatisaj ri u c'ulwächinic, ri man cäsach ta c'u pa qui jolom ri qui nimaxic tak ri e u takanic.

¹⁹ Ri Ajawaxel u cojom ri u tem re ajawibal chupam ri caj ri rajawinic cätakan c'u puwi' ronojel.

²⁰ ¡Chitewichi'j ri Ajawaxel, cuinelalaj tak tako'nib aj caj! Ix, ri quebitz'akatisaj tak ri e u takanic, ri ix sac'aj che u nimaxic.

²¹ ¡Chitewichi'j ri Ajawaxel iwonojel ri ix rajch'ojab, ri quixpatanin che quiban c'u ri u rayibal!

²² ¡Chnimalaj ronojel ri winakirisam chtewichi'n che ri Ajawaxel pa conojel ri u c'olbal ri rajawibal! ¡Quintewichi'j na ri Ajawaxel ruc' ronojel ri nu c'aslibal!