Salmib 102 - Quiché Bible

U bochi'nic jun ch'ibatajnak ri, pa ri u q'uistajibal c'uxaj, cuk'alajisaj ri u bis chuwäch ri Ajawaxel

¹ Ajawaxel, chtatabej la ri nu ch'awem uc' la, chopan c'ut ri nu rakoj chi'aj uc' la.

² Mac'u' ri palaj la chnuwäch aretak in ch'ibatajinak; ¡choc la il che nu tatabexic! ¡chinch'abej la ulok aretak quinsiq'uin che la!

³ Cäsach c'u na u wäch ri nu c'aslemal jacha' ri sib, ri nu bakil quenicowic jacha' ri rachak k'ak',

⁴ ri wanima' tuktubinak jacha' ri k'ayes ri bach'uyirinak; ¡mawi ne craj chic ri nu wa!

⁵ Ri nu tz'umal e nac'al chi che ri nu bakil u mac quech ri ch'ikowem.

⁶ In je jacha' jun tucur ri c'o pa ri chaki'j uwo sak, jacha' jun tucur ri c'o xo'l ri wulijinak tak ja.

⁷ Man coc ta nu waram. In junam ruc' jun chicop ri e c'o u xic' ri xak u tuquiel cäc'oji' puwi' ri u xotil ja.

⁸ Ri e nu c'ulel man quetani' ta che nu yok'ic, ri nu bi' cäquicoj che c'okobal.

⁹ Chuq'uexwäch nu wa, chaj quintijo; cuyuj rib ri u wa'l nu wäch ruc' ri wuq'uia',

¹⁰ rumal rech ri oyowal la xukuje' ri c'anal la, xinya' la ajsic rech cuya' quinrokij la.

¹¹ Ri nu k'ij quek'axic jacha' jun mu'jal; cätajin quinchaki'jaric jacha' ri k'ayes.

¹² Are c'u ri lal, Ajawaxel, cajawin la chbe k'ij sak; ¡ri bi' la amak'el cänatax na!

¹³ Walija la chel c'u'x la che ri Sion, xtz'akat ya' ri k'ijol; ¡xurik ri rajilabal u pam ri k'ij rech cacuy la ri u mac!

¹⁴ ¡Ri e pataninel tak ech la quequilok'ok'ej ri Sion; cak'oxow ri canima' che ri quetzeletajic!

¹⁵ Conojel ri nimak tak tinimit xukuje' tak ri ajawinelab aj uwächulew nim cäquil wi na ri je'lalaj u bi' ri Ajawaxel,

¹⁶ aretak cuyac chi jumul ri Sion xukuje' aretak cäc'utun pa ri u juluwem,

¹⁷ aretak choc il che ri u bochi'nic ri wonobam, ma ta c'u mat chtatabej la ri e u bochi'nic.

¹⁸ Chtz'ibax can wa' chque ri ija'lil ri quepe na, rech caquik'ijilaj ri Ajawaxel ri camaja' quebalaxic.

¹⁹ Ri Ajawaxel xucaye'j ulok ri uwächulew kas chicaj, kas pa ri tastalicalaj u chicajil.

²⁰ Che u tatabexic ri cok'ej ri e c'o pa tak che', che qui tzokopixic ri e c'okotajinak che cämical;

²¹ rech pa Sion xukuje' pa Jerusalen, quesax u tzijol xukuje' cak'ijilax ri u bi' ri Ajawaxel

²² aretak ri winak que conojel ri nimak tak tinimit cäquimulij na quib che u k'ijilaxic.

²³ Ri are' in u tukarisam niq'uiaj be; xebuk'ip ri nu k'ij.

²⁴ Ri in quinbij che: “Nu Dios, minc'am la bic c'äte pa niq'uiaj ri nu c'aslemal.” ¡Ri junab la man c'o ta qui q'uisic!

²⁵ Co xtiq'uiba' la ri uwächulew kas pa ri qui tiquitajic; lal xbanow la ri caj.

²⁶ Ronojel wa' cäsach na u wäch, are c'u ri lal co lal c'olic. Ronojel wa' cäjar na jacha' ri atz'iak; lal caq'uexow na la, cacanaj c'u q'uextajinak, jas ri cuban jun cuq'uex ri ratz'iak.

²⁷ Are c'u ri lal man c'o ta q'uextajic la; ri junab la man c'o ta qui q'uistajic.

²⁸ Cäya' la jicomal chque ri e quija'lil ri e pataninel tak ech la; kas chwäch c'u la quejekeba' wi na la.