Salmib 101 - Quiché Bible

Ri xuchi'j ri Ajawinel che ri Dios

¹ Quinwaj quinya' u k'ij ri lok'ok'ebal c'uxaj xukuje' ri suq'uilal; quinwaj quebenbixoj tak bix che la, Ajawaxel;

² quinwaj quinjeki' pa colomal. ¿Jampa' lo cäpe la wuc'? Man c'o ta mac quinc'ulaj pa nu c'aslemal xukuje' ne chupam ri nimalaj wachoch;

³ mawi jubik' cäbe nu wäch che qui banic tak ri etzelal. Quinwetzelaj qui wäch ri man e jic ta ruc' ri Dios; ¡mawi jubik' quinya' ta c'olbal chi quenakajin ta chwe!

⁴ Quebennajtajisaj chwe ri itzel tak chomanic; ¡man quinwaj ta quinban ta jun itzel jasach!

⁵ Quintz'apij na u pa qui chi' ri xak chic'uyal queyok'on chque ri qui c'ulja: ¡man utz ta quinwil wi ri cuban nimal, ri cunimarisaj rib!

⁶ Are quinya' na nu wäch chque ri winak ri utz quechomanic, rech quec'oji' junam wuc'; xuwi cäc'oji' junam wuc'; xuwi cäc'oji' na che nu patanixic ri cäruc'aj jun suc'alaj c'aslemal.

⁷ Man c'o ta c'olbal chupam ri nimalaj wachoch che ri quieb u wäch; ¡man c'o ta jun banal tzij cäcuinic cäjeki' chnuwäch!

⁸ K'ij chi k'ij quintz'apij na u pa qui chi' conojel ri e banal tak etzelal ri e c'o pa ri tinimit; ¡quebenwesaj na bic pa ri u tinimit ri Ajawaxel conojel ri e banal tak itzel!