Salmib 10 - Quiché Bible

Ch'awem che u tz'onoxic ri u to'banic ri Dios

¹ Ajawaxel, ¿Jasche sibalaj naj lal c'o wi? ¿Jasche cac'u' ib la pa tak ri k'ij re c'axc'olil?

² Ri banal etzelal, ruc' nimarisan ib ch'ujirinak cuban c'ax che ri meba'; pa ri c'amibal c'ut ri u cojom cäkaj wi na.

³ Ri banal etzelal cunimarisaj u k'ij pa tak ri kas u rayinic; ri quiäk rayinel cac'okonic cäretzelaj u wäch ri Ajawaxel.

⁴ Ri e banal tak nimal caquibij: “Man c'o ta Dios. Man c'o ta jachin ta cäto'w chwe jas quinbano.” Are u chomanic wa' amak'el.

⁵ Ronojel ri cubano amak'el utz quel chuwäch. Ri chomanic la naj e c'o wi che, naj chque ri u bak'wäch, cutze'j qui wäch ri e u c'ulel.

⁶ Cuchomaj chi man c'o ta jun cäch'äcan puwi', chi mawi jubik' curik ta c'ax.

⁷ Nojinak ri u pa u chi' chque tak c'okonic, chque banoj tak tzij xukuje' chque tak yok'onic; ri e u tzij quequic'u' il patan xukuje' etzelal.

⁸ Cäc'ac'alen chquinakaj ri alaj tak tinimit, chic'uyal cucämisaj ri man c'o ta u mac. Man quel ta ri u bak'wäch chrij ri man cäcuin taj cuto' rib:

⁹ Je ta ne jas jun coj pa ri u pec, chupam ri c'ubal rib caralwächij ulok ri meba', xak reyem jampa' cäkaj pa u k'ab, aretak cäkaj pa u k'ab cujuruj pa ri u putzcuyibal.

¹⁰ Cäjupic, cuc'ololej rib, quekaj c'u pa u k'ab ri man quecuin taj cäquito' quib.

¹¹ Ri banal etzelal cuchomaj chi cäsach pa u jolom ri Dios, chi cuch'uk ri u palaj chi mawi jubik' c'o cärilo.

¹² ¡Walij la Ajawaxel, walijisaj ri k'ab la! Ri quebisonic mesach pa jolom la.

¹³ Nu Dios, ¿jasche quetze'n ri banal tak etzelal, cäquichomaj chi man cata' ta chque jas ri qui banom?

¹⁴ Lal ilom la ri c'ax ri cäquiban ruc' ri quetzelal; ¡ilom la, cäya' c'u na la rajil u q'uexel chque! Uc' la cäquito' wi quib ri man c'o ta queto'wic; lal ri to'l quech ri minorib.

¹⁵ ¡K'ajisaj la ri qui k'ab ri e banal tak etzelal! Ta' la chque ri etzelal ri qui banom c'ä man c'o ta chcanajic ri ma ta chquik'alajisaj.

¹⁶ Ri Ajawaxel are Ajawinel chbe k'ij sak; ri e k'ijilal tak diosib quebesax na bic chupam ri rulew.

¹⁷ Ajawaxel, lal cata' la ri qui ch'awem ri e mach'alic, cäya' la qui chuk'ab xukuje' coc la il chque.

¹⁸ Bana' la ri suq'uilal che ri minor xukuje' ri u rikom c'ax: ¡ri winak, ri xa ulew banbem rech, mutic chi c'u jumul xe'n ib!