Romanos 9 - Quiché Bible

Ri Dios xebucha' ri aj Israel

¹ Quinbij ri kastzij pa u bi' ri Crist, man xak ta quinbij. Weta'm pa ri wanima' rumal ri Ruxlabal ri Dios,

² chi ronojel k'ij c'o nimalaj nu bis, sibalaj cäk'oxow ri wanima'.

³ Quinwaj ta c'u ne chi kas in quinc'oji' ta chuxe' c'okonic, najtajisam ta che ri Crist, we ta ruc' wa' quebento' ta ri e wachalal, ri kas e nu winakil.

⁴ E are c'u wa' ri winak aj israelib, ri e u c'amom ri Dios che ralc'ual, u yo'm ri u juluwem ri Dios chquixo'l, u yo'm ri c'ulwächinic, u yo'm ri u pixab chque rumal ri Moises, ri k'ijilanic, xukuje' u bim chque jas ri cuya' na.

⁵ Ri e u wi' tak qui jolom ri xalax wi ri Crist jas ri u beya'l ri ti'j, ri are' Dios paquiwi' conojel ri jastak, chyok ba' u k'ij amak'el. Je chbanok.

⁶ Man quinbij taj chi ri Dios ma ta xubano jas ri u bim ulok. Man conojel ta c'u ri e rija'lil ri Israel kas e aj Israel.

⁷ Man conojel taj ri e rija'l ri Abraham kas ta e ralc'ual, xane' u bim ri Dios che: “Ri e awija'l quepe na rumal ri Isaac.”

⁸ Ri cuk'alajisaj wa' chkawäch chi man c'o ta jun cux ta alc'ualaxel re ri Dios xa' ta rumal rech chi aj ta jun ija'lil; man je ta c'u wa' xane' xak xuwi ri e alc'ualaxelab ri catz'akat wi ri u chi'nic ri Dios, e are' wa' ri quechomaxic chi kas e rija'l tak.

⁹ Are c'u wa' ri chi'nic ri xuban ri Dios che ri Abraham: “Pa tak we k'ij ri' quintzelej na ulok, are' c'u ri Sara cac'oji' na jun ral ala.”

¹⁰ Man xuwi ta wa'. Xane' xukuje' ri Rebec xec'oji' ri quieb ral ruc' ri ka mam Isaac.

¹¹ Ri Dios xch'aw ruc' ri Rebec aretak c'ä majok queralaj ri ral, c'ä majok cäquiban utzil o etzelal. Jeri' cäkil ri u chomanic ri Dios chi quebucha' ri winak man rumal ta ri chac ri qui banom, xane' nabe quebusiq'uij.

¹² Ri Dios xubij che ri Rebec chi ri nabeal cupatanij na ri chak'axel.

¹³ Jas ri tz'ibatalic: “Xinlok'ok'ej ri Jacob. Are c'u ri Esau xinwetzelaj u wäch.”

¹⁴ ¿Jas c'u cäkabij? ¿La cuban lo ri Dios ri man suc' taj? ¡Man je ta ri'!

¹⁵ Xubij c'u ri Dios che ri Moises: “Quel na nu c'u'x che ri winak ri quinwaj quel wi nu c'u'x. Quintok'obisaj na u wäch ri quinwaj quintok'obisaj u wäch.”

¹⁶ Man are ta cächa' ri winak ri sibalaj cäraj cächa'ic, mawi rumal rech chi cucoj ta u chuk'ab, xane' cächa' ri winak rumal rech chi ri Dios quel u c'u'x che.

¹⁷ Are c'u ri Tz'ibatalic cubij chi ri Dios xubij che ri ajawinel re Ejipt: “Xinnimarisaj a k'ij, rech quinc'ut chquiwäch ri winak chi c'o na nu cuinem in chawäch at, rech cätzijox na ri nu bi' cho ronojel ri uwächulew.”

¹⁸ Jeri' ri Dios quel u c'u'x che apachin ri cäraj quel wi u c'u'x. Cucowirisaj c'u ri ranima' apachin ri cäraj cucowirisaj.

¹⁹ Cabij c'u na chwe: “¿Jas c'u che cubij ri Dios chi c'o u mac jun winak? ¿Jachin ta c'u cäcuin che u k'atixic u wäch ri u chomanic ri Dios?”

²⁰ Are c'u ri at, winak, ¿At jachinok, chi catc'ulelan che ri Dios? ¿La cubij lo ri lak che ri xbanowic: “Jasche je nu banic wa' xabano?”

²¹ Ri banal bo'j c'o ri t'ac pa u k'ab che u banic jachique ri cäraj, che c'u ri t'ac ri c'o pa u k'ab ri u banic jun bo'j ri nim u k'ij ri cacoj wi jun chi c'ut ri man nim ta u k'ij ri cacoj wi.

²² We c'u ri Dios xraj xuc'ut ri royowal chquiwäch ri winak rech cäquetamaj ri u cuinem, xebuch'ij c'u ruc' nimalaj coch'onic ri winak ri takal chque chi cäc'äjisax qui wäch xukuje' ri cäsach na qui wäch, ¿jas cäkabij che wa'?

²³ Jeri' xubano, xel u c'u'x chque ri winak ri e u suc'umam ulok che u ya'ic juluwem, rech quetamaxic chi sibalaj nim ri u juluwem.

²⁴ Ri e u siq'uim, uj c'u ri', man xuwi ta chquixo'l ri aj judeyib, xane' xukuje' chquixo'l ri man a aj judeyib taj.

²⁵ Jas cubij pa ri u wuj ri Osey: “Ri winak ri man e nu tinimit taj, quinbij na nu tinimit chque. Ri winak ri man e lok'ok'em taj, quebenlok'ok'ej na.

²⁶ Pa ri c'olbal jawije' ri xbix wi chque: ‘Ri ix man ix nu tinimit taj’, chila' cäbix wi na chque chi e ralc'ual ri c'aslic Dios.”

²⁷ Xukuje' ri Isaiy ojer co xch'awic, xubij chrij ri Israel: “Pune' ta e q'ui ri e rija'l ri Israel jas ri sanyeb ri c'o chuchi' ri plo xak c'u e quieb oxib ri caquirik na ri colotajic,

²⁸ ri Ajawaxel c'ut cuban na jas ri xubij, cuban na ri u k'atoj tzij. Cuban na ronojel chanim.”

²⁹ Jas u bim ulok ri Isaiy: “Ri Ajawaxel ri c'o ronojel u cuinem xujuto', rumal ri' e c'o can kija'l. We ta ma ta jeri', xsach ta ka wäch ri' uj jas ri Sodom xukuje' ri Gomor.”

Ri aj judeyib xukuje' ri utzalaj tak tzij

³⁰ ¿Jas c'u cäkabij? Cäkabij chi ri man aj judeyib taj ri man xquitzucuj ta ri suq'uil, ri e are' xquirik ri suq'uil, ri suq'uil ri cäpe rumal ri cojonic.

³¹ Are c'u ri winak aj Israel ri xquijiquiba' qui c'u'x chrij ri pixab rech cäquirik ri suq'uil man xquirik taj.

³² ¿Jasche? Rumal rech chi man xquitzucuj ta ri suq'uil ruc' cojonic, xane' ruc' ri chac. Xetzak c'u puwi' ri abaj re tzakibal.

³³ Jas ri tz'ibatalic: “Chiwilampe', quinya' na pa Sion jun abaj ri cäquichak'ij wi na quib ri winak, jun nimalaj abaj re tzakibal ri cucu'ba' c'u u c'u'x chrij man quel ta u q'uixbal.”