Romanos 6 - Quiché Bible

Uj cäminak che ri mac, uj c'asal che ri Crist

¹ ¿Jas ta c'ut ri cäkabij na? ¿La cujcanaj ta c'u chupam ri macaj rech sibalaj caq'uiy ri u tok'ob ri Dios?

² ¡Mawi jubik'! Uj cäminak chi c'u chuwäch ri macaj; ¿jas ta c'u cakabano cujcuinic cujc'asi' ta chupam ri macaj?

³ ¿La ma ta iweta'm chi aretak xban ri ka bautism, are' jun c'utbal wa' chi uj junatajinak chic ruc' ri Crist Jesus pa ri u cämical?

⁴ Ri ka bautism are' jun c'utbal chi uj mukutajinac ruc' ri Crist pa ri u cämical, rech xukuje' ri uj cujbin na pa ri c'ac' c'aslemal, jacha' ri u walijisaxic ri Crist chquixo'l ri cäminakib rumal ri u juluwem ri Tataxel.

⁵ We c'u uj junam chic ruc' ri Crist pa ri u cämical, jeri' xukuje' uj junam ruc' pa ri u c'astajibal.

⁶ Keta'm c'ut chi ri ka banic nabe xripitaj ruc' ri Crist, rech ri u cuinem ri aj macalaj ojer ka c'aslemal casachtaj u wäch, ma ta c'u cakatakej chic u patanixic ri macaj.

⁷ Ri jun ri cäminak chic, man c'o ta chi u takanic ri macaj puwi'.

⁸ We xujcäm ruc' ri Crist, xukuje' cäkacojo chi cujc'asi' na ruc'.

⁹ Keta'm chi c'astajinak chi ri Crist chquixo'l ri cäminakib, man cäcäm ta chic. Ri cämical man cätakan ta chi puwi'.

¹⁰ Aretak xcämic, xa' jumul xcäm rumal rech ri mac; aretak c'ut c'asal chi camic, cäc'asi che ri Dios.

¹¹ Jeri' xukuje' ri ix, chichomaj ba' chi kastzij ix cäminak chic chuwäch ri mac, ix c'asal chi c'ut che ri Dios pa Crist Jesus.

¹² Miya' ba' c'olbal che ri mac chi cätakan puwi' ri i cuerp, ri xak cäcämic, che qui nimaxic ri itzel tak u rayinic;

¹³ mijach ba ri i cuerp che ri mac che u banic ri etzelal. Xane' chijacha' iwib pa u k'ab ri Dios je ta ne ix c'astajinak chic chquixo'l ri cäminakib. Chijacha' ri i cuerp pa u k'ab ri Dios rech quiban ri utz.

¹⁴ Jeri' man cätakan ta chi c'u ri mac piwi'. Man ix c'o ta chi c'u chuxe' ri pixab, xane' chuxe' ri tok'ob.

Jun c'ambal no'j chrij ri lok'om patanijic

¹⁵ ¿Jas c'ut? ¿La cujmacun lo, rumal rech chi man uj c'o ta chuxe' ri pixab, xane' chuxe' ri u tok'ob ri Dios? ¡Man je ta ri'!

¹⁶ ¿La ma ta iweta'm chi, we quijach iwib che u banic lok'om tak pataninelab che u patanixic jun winak, ix pataninelab ri' quixc'oji' ri' che u nimaxic? We are quipatanij ri mac, quixcäm na. We c'u are quinimaj ri Dios, cuban na suc' chiwe.

¹⁷ Maltiox c'u che ri Dios, pune' ba xixc'oji' na can che lok'om tak pataninelab che ri mac, camic c'ut ruc' ronojel iwanima' cätajin quinimaj ri tijonic ri yo'm chiwe.

¹⁸ Ix esam chi c'u pa u k'ab ri mac, are chi cätajin quipatanij ri Dios pa ri suc'alaj i c'aslemal.

¹⁹ (Quinbij wa' chiwe pa ka tzij uj ri uj winak, rumal rech ri u tukaril ri i banic aj winak man kas ta quich'ob we jastak ri'.) Jas ri xiban can ojer, xijach ri i cuerp pa u k'ab ri etzelal che qui banic ri tz'ilalaj tak jastak, jeri' xukuje' camic chijacha ba ri i cuerp pa u k'ab ri Dios che u banic ri suq'uil, rech quixux tastalic tak winak.

²⁰ Aretak c'ä ix lok'om pataninel che ri mac, man c'o ta can iwe che ri patanijic che ri suq'uil.

²¹ ¿Jas c'u ri xiwechbej can chquij ri jastak ri cäquiya' chi q'uixbal chiwe camic? Cämical c'u ri quec'aman wi bic.

²² Camic c'ut, ix tzokopitajinak chic ix esam chic pa u k'ab ri mac, ix chi c'u u lok'om pataninelab ri Dios. Ri quiwechbej camic are jun tastalic c'aslemal, xukuje' ri quiwechbej na are ri junalic c'aslemal.

²³ Ri tojbal ri cuya' ri macaj, are ri cämical; are c'u ri cochinic ri cuya' ri Dios, junalic c'aslemal pa ri u rikic kib ruc' ri Crist Jesus, ri Kajaw.