Romanos 4 - Quiché Bible

Jun c'ambal no'j chrij ri Abraham

¹ ¿Jas c'u ri cäkabij chi xurik ri Abraham ri ka mam?

² We ta xk'alajisax ri Abraham chi suc' rumal ri u chac, c'o ba jas cunimarisaj wi rib ri'. Man chuwäch ta c'u ri Dios.

³ ¿Jas c'u cubij ri Tz'ibatalic? “Ri Abraham xcojon che ri Dios, rumal ri' xk'alajisax rumal ri Dios chi suc'.”

⁴ Ri tojbal re ri jun ajchac, man are ta jun sipanic ri' che, xane' are c'asaj ruc'.

⁵ We c'u jun cäcojon che ri Dios, ri cuk'alajisaj chi suc' ri ajmac chuwäch, ri Dios cuc'amowaj jacha' jun suc' rumal ri u cojonic, man rumal ta jun chac ri u banom.

⁶ Xukuje' jas ri xubij ri David, chi utz re ri winak ri cäk'alajisax rumal ri Dios chi suc', man rumal ta ri u chac.

⁷ Xubij c'ut ri David: “Utz quech ri xesachtaj ri quetzelal, xech'ukutaj c'u ri qui mac.

⁸ ¡Utz re ri winak ri man quenatax taj ri u mac chrij rumal ri Ajawaxel!”

⁹ ¿La xak xuwi lo utz quech ri aj judeyib ri cojom ri quetal re kopinic che ri u wi' ri qui tz'umal ri achijab wi? ¿O xukuje' utz quech ri winak ri man aj judeyib taj? Cäkabij c'ut chi ri Dios xuk'alajisaj ri Abraham chi suc' rumal ri cojonic.

¹⁰ ¿Jampa' xk'alajisax ri Abraham chi suc'? ¿La aretak cojom chi ri etal re kopinic che ri u wi' ri u tz'umal ri achi wi, o aretak c'ä majok chcojok? Aretak c'ä majok chcojok, xk'alajisaxic chi suc'; man are taj aretak cojom chic.

¹¹ Ri retal re kopinic ri Abraham ri xcojic, ri xkopix che ri u wi' ri u tz'umal ri achi wi, are cäc'utuwic chi k'alajisam chic chi suc' chic rumal ri u cojonic. Xcojon c'ut aretak c'ä majok chcoj ri retal re kopinic. Jeri' ri Abraham xux qui mam conojel ri quecojonic, pune' man cojom ta ri etal re kopinic chque. Jeri' ri Dios xukuje' quebuk'alajisaj chi e suc'.

¹² Ri Abraham are qui mam ri cojom quetal re kopinic. Man xuwi ta c'u qui mam ri aj judeyib ri cojom ri quetal re kopinic, xane' xukuje' qui mam conojel ri quebin pa ri u be ri u cojonic ri ka mam Abraham aretak c'ä majok cäcoj ri retal re kopinic.

Rumal ri cojonic cäkechbej ri u chi'm ulok ri Dios

¹³ Man rumal ta ri pixab xchi'x che ri Abraham cuc' ri e rija'l chi cäquechbej na ri uwächulew, xane' rumal ri suq'uil rech ri cojonic.

¹⁴ We c'u ri quec'amow ri echbal e are' ri quequimaj u banic ri pixab, man c'o ta ba' cupatanij ri' ri cojonic are' c'u ri u chi'm ri Dios cutzak na ri u chuk'ab.

¹⁵ Are' c'u ri pixab cuc'am ulok ri royowal ri Dios paquiwi' ri man queniman taj. Jawije' c'u ri man c'o ta wi pixab, man quilitaj taj chi man c'o ta nimanic che ri pixab.

¹⁶ Jeri' ri winak ri quecojonic cäquirik na jas ri xchi'x ulok chi cäya' na chque rumal ri Dios. Xa' c'u rumal tok'ob cäquic'amo. Rech kas cäquirik na conojel ri e rija'l ri Abraham, man xuwi ta ri cäquinimaj ri pixab, xane' xukuje' ri c'o qui cojonic je jas ri u cojonic ri Abraham. Ri are' ri ka mam konojel.

¹⁷ Jas ri tz'ibatalic: “At nu cojom che qui mam q'ui nimak tak tinimit.” Ri Dios ri cäyo'w qui c'aslemal ri cäminakib, ri xebanow ri jastak ri man e c'o ta nabe canok, are Dios wa' ri xucoj ri Abraham.

¹⁸ Aretak c'u man c'o ta chi eyebal c'uxaj ri Abraham xcojonic xc'oji' c'u reyebal u c'u'x, je c'u ri' xux qui mam tak ri nimak tak tinimit, jacha' ri u bim ri Dios che: “Jewa' ri cajilabal ri e awija'l.”

¹⁹ Ri u cojonic ri Abraham man xchukchub taj, c'o chi c'u ne lo jun sient u junab. Xak reyem chi ri u cämical, xukuje' ri Sara, jeri' chi man cuya' ta chic chi cäc'oji' ral. Pune' jewa', man xuya' ta c'u can ri u cojonic.

²⁰ Man xuban ta quieb u c'u'x chrij ri bim ulok chi cäya' na rumal ri Dios, man xuya' ta can ri u cojonic. Xane' xcowir rumal ri u cojonic, xunimarisaj c'u u k'ij ri Dios.

²¹ Kas reta'm chi ri Dios c'o u cuinem che u banic ronojel jas ri xubij ulok chi cuya' na che.

²² Rumal c'u wa', “ri Dios xuk'alajisaj ri Abraham chi suc'.”

²³ Aretak xtz'ibaxic chi “xk'alajisax ri Abraham chi suc'”, man xuwi ta rumal rech ri are' xtz'ibaxic.

²⁴ Xane' xtz'ibax xukuje' rumal kech uj. Rumal ri ka cojonic, ri Dios cujuk'alajisaj chi uj suc' chuwäch, ri cujcojon che ri Jun ri xuc'astajisaj, ri Jesus, ri Ajawaxel, chquixo'l ri cäminakib.

²⁵ Are ri Jesus ri xjach pa ri cämical rumal rech ri ka mac, xc'astaj c'ut rumal rech ri ka k'alajisaxic chi uj suc' chic chuwäch ri Dios.