Romanos 3 - Quiché Bible

Nabe ri Dios u yo'm ri u tzij pa qui k'ab ri aj judeyib

¹ Te c'u ri', ¿jas c'u che cäbixic, chi utz na que ri aj judeyib chquiwäch niq'uiaj winak chic? ¿Jas quechbex che chi cojom ri etal re kopinic che ri u wi' ri u tz'umal ri achi wi jun?

² Q'ui pa ronojel u banic. Nabe ri Dios u yo'm ri u tzij pa qui k'ab ri aj judeyib.

³ ¿Jas c'ut? We man quecon jujun chque, ¿la rumal lo ri' ri Dios man cuban taj jas ri u bim?

⁴ ¡Man je ta ri'! Xane' are ri Dios kastzij, pune' conojel ri winak e banal tak tzij. Jas ri tz'ibatalic: “Rech cäk'alajisax la chi ri lal suc' pa tak ri tzij la, xukuje' rech cäch'äcan la aretak cäk'at tzij pa wi' la.”

⁵ We ri ketzelal sibalaj cuk'alajisaj na ri u suq'uil ri Dios, ¿jas cäkabij? ¿La cäkabij lo chi ri Dios man suc' taj aretak cäpe royowal pakawi'? (Quinbij wa' pa ka tzij uj ri uj winak.)

⁶ ¡Man je ta ri'! We ta jeri', ¿jas ta cuban na ri' ri Dios che u k'atic tzij paquiwi' ri winak cho ri uwächulew?

⁷ We c'u rumal ri nu banoj tzij, ri u kastzij ri Dios sibalaj cäq'uiyic xukuje' cänimarisax u k'ij, ¿jasche cäk'at tzij panuwi' chi in ajmac?

⁸ Che c'u wa', ¿jas c'u che man cäkabij: “Chkabana' etzelal rech cäpe utzil?” E c'o jujun winak ri cujquiyok'o, cäquibij chi are wa' ri ka tijonic. Takal c'u chque chi cäc'äjisax na qui wäch.

Conojel e ajmaquib

⁹ ¿Jas c'ut? Ri uj ri uj aj judeyib, ¿la uj ta ri uj utz na chquiwäch niq'uiaj winak chic? ¡Man je ta ri'! Ka bim chi c'u ulok chi ri aj judeyib, xukuje' ri man aj judeyib taj, conojel e c'o chuxe' macaj.

¹⁰ Jas ri tz'ibatalic: “¡Man c'o ta jun suc'! ¡Mawi jun!

¹¹ Man c'o ta jun cäch'obonic, mawi c'o jachin cätzucun ri Dios.

¹² Conojel xquitas quib chrij ri Dios. Conojel xquiban chquibil quib chi man c'o ta chi qui patan. ¡Man c'o ta jachin cäbanow ri utzil! ¡Xa' ta ne jun c'olic!

¹³ Ri u pa qui kul je jas ri mukubal ri jaktalic. Ri cak' banal tzij ri u pa qui chi' u c'u'm u k'inob cumätz.

¹⁴ Ri u pa qui chi' nojinak che c'axalaj tak tzij, che yok'onic. Ri u pa qui chi' nojinak che c'okonic xukuje' che c'ayil.

¹⁵ Ri cakan aninak quebe che u tixic quic'.

¹⁶ Apawije' ri quebe wi, cäquiban can c'ax che ronojel, c'ax c'o pa ri qui be.

¹⁷ Are c'u ri be re jamaril man cäquich'ob taj.

¹⁸ Man cäquixe'j ta jubik' quib chuwäch ri Dios.”

¹⁹ Keta'm chi ronojel ri cubij ri pixab, chque conojel ri e c'o chuxe' ri pixab cubij wi, rech conojel ri winak man cuya' taj cäquibij chi man c'o ta qui mac, rech conojel ri winak cho ri uwächulew quec'oji' chuxe' ri u k'atoj tzij ri Dios.

²⁰ Rumal ri' man c'o ta jun winak cäk'alajisax chuwäch ri Dios chi suc' rumal rech chi u banom ri cubij ri pixab. Are c'u ri pixab xak xuwi cuk'alajisaj chkawäch chi uj ajmaquib.

Quecolotaj ri winak rumal ri cojonic

²¹ Camic c'ut, k'alajisam chic jas cuban ri Dios che u banic suc' chque ri winak man rumal ta ri pixab. Quetamax c'u wa' rumal ri cubij ri pixab xukuje' rumal ri qui wuj ri k'axal tak u tzij ri Dios.

²² Ri Dios cuban suc' chque ri winak rumal ri qui cojonic che ri Jesucrist. Xa' junam cuban chque conojel ri quecojon che. Xa' c'u junam qui banic ri winak chuwäch.

²³ Conojel c'ut e macuninak. E najtajisam che ri u juluwem ri Dios.

²⁴ Ri Dios cuk'alajisaj chi uj suc' chuwäch rumal ri u tok'ob, e colotajinak c'u rumal ri Crist Jesus, man c'o ta cäquitoj che.

²⁵ Ri Dios xuya' ri Jesucrist che cojol utzil chquixo'l ri winak ruc' are'. Cäquirik we utzil ri' we quecojon che ri Crist, ri xturuw ri u quiq'uel rumal quech. Xc'ulmataj wa' che u k'alajisaxic chi ri Dios are suc' aretak xebucuy ri mac ri qui banom ulok ri winak, man xenataj ta chi che,

²⁶ chuk'alajisaxic ri u suq'uil pa tak we k'ij ri': rech kas suc' wi ri are', ri xukuje' cäk'alajisanic chi e suc' chuwäch ri quecojon che ri Jesus.

²⁷ ¿Jawi, c'u c'o wi ri nimarisan ib? Esam bic. ¿Rumal jachique pixab? ¿La rumal ri pixab aj chac? Jayi', xane' rumal ri pixab aj cojonic.

²⁸ Je c'u ri', cäkilo chi ri Dios cuk'alajisaj chi suc' ri winak chuwäch rumal ri cojonic, man rumal ta u banic ri cubij ri pixab.

²⁹ Ri Dios, ¿la xuwi lo Dios chque ri aj judeyib? ¿La ma ta xukuje' chque ri man aj judeyib taj? Kastzij chi are Dios chque conojel ri nimak tak tinimit,

³⁰ xa' c'u jun ri Dios. Rumal ri cojonic, ri Dios cäk'alajisanic chi e suc' chuwäch ri are' ri aj judeyib ri cojom quetal re kopinic che ri qui tz'umal ri e achijab wi. Xukuje', rumal ri cojonic, ri Dios cäk'alajisanic chi e suc' chuwäch ri are' ri winak ri man cojom ta ri quetal re kopinic che ri qui tz'umal ri e achijab wi.

³¹ ¿La cäkaban c'u che ri pixab chi man c'o ta u patan rumal ri cojonic? Man cäkaban taj. Xane' xa' sibalaj cäkajiquiba' ri u chuk'ab ri pixab.