Romanos 16 - Quiché Bible

Ri Pawl cuya' rutzil qui wäch chquijujunal

¹ Quinwaj chi quiwetamaj u wäch ri utzalaj kachalal Peb. We chuchu' ri' are jun pataninel chquixo'l ri cojonelab ri e c'o pa Sencrey.

² Quinwaj chi quic'ulaj ri Peb pa u bi' ri Ajawaxel, jas ri takal chiwe ri ix cojonelab ri c'o i cojonic. Quinwaj chi quito' pa ronojel ri rajawaxic che. E q'ui c'ut ri e u to'm, xukuje' ri in in u to'm.

³ Chiya' rutzil qui wäch ri Prisil xukuje' ri Aquil, are wach tak pataninel re ri Crist Jesus.

⁴ Ri e are' rajxecämic rumal nu to'ic. Man xuwi ta ri in quinmaltioxin chque, xane' xukuje' conojel ri kachalal ri e c'o cuc' ri cojonelab ri man aj judeyib taj.

⁵ Xukuje' chiya' rutzil qui wäch ri kachalal ri cäquimulij quib pa cachoch ri Prisil rachil ri Aquil. Chiya' rutzil u wäch ri Epenet, ri are' aj Asiy are' nabe cojonel che ri Crist.

⁶ Chiya' rutzil u wäch ri Mariy, nimalaj chac u banom ri are' iwuc' ix.

⁷ Chiya' rutzil qui wäch ri nu winakil ri Andron xukuje' ri Juniy, e are' xenwachilaj pa che'. Nimak qui k'ij chquixo'l ri takomxenlab, nabe c'u xecojon che ri Crist chnuwäch in.

⁸ Chiya' rutzil u wäch ri Ampliat, ri lok'alaj wachil rumal ri Ajawaxel.

⁹ Chiya' rutzil u wäch ri Urban, are kach pataninel re ri Crist Jesus. Chiya' rutzil u wäch ri Estacs, ri are' lok' chnuwäch.

¹⁰ Chiya' rutzil u wäch ri Apels. Cäkil rumal ri u chac chi ri are' kastzij c'o u cojonic che ri Crist. Chiya' rutzil qui wäch ri e aj uwo rachoch ri Aristobulo.

¹¹ Chiya' rutzil u wäch ri nu winakil Herodion. Xukuje' chiya' rutzil qui wäch ri e aj uwo rachoch ri Narsis ri e cojoninak che ri Ajawaxel.

¹² Chiya' rutzil qui wäch ri chuchuyib Tripen xukuje' ri Tripos. Ri e are' nimalaj chac qui banom pa ri u chac ri Ajawaxel. Xukuje' chiya' rutzil u wäch ri lok'alaj kachalal chuchu' Persida, sibalaj nim ri chac u banom pa ri u chac ri Ajawaxel.

¹³ Chiya' rutzil qui wäch ri Rup ri cha'om rumal ri Ajawaxel, rachil ri u nan. Ri u nan u banom chwe chi je ta ne in ral.

¹⁴ Chiya' rutzil qui wäch ri Asincrito, ri Plegont, ri Hermes, ri Patrob, ri Hermas xukuje' ri cachalal ri e c'o cuc'.

¹⁵ Chiya' rutzil qui wäch xukuje' ri Pilologo, ri Juliy, ri Nerey ruc' ri rana'b, xukuje' ri Olimps cuc' conojel ri kachalal ri c'o qui cojonic chila'.

¹⁶ Chebiyala' rutzil tak i wäch. Ri cojonelab pa tak conojel ri u comon cojonelab cäquiya' rutzil i wäch.

¹⁷ Quixinbochi'j, wachalal, chi chajij iwib chquiwäch ri winak ri quequitas jujun cojonelab chquij niq'uiaj chic, ri cäquiban chque chi cuban quieb canima' che ri tijonic ri xiwetamaj. Chitasa' iwib chquij wa'.

¹⁸ Ri e je tak wa' man cäquipatanij ta ri Crist Ajawaxel, xane' cäquibano jas ri cäcaj ri e are'. Ruc' ch'uch'ujalaj tak tzij xukuje' je'lalaj tak tzij quequisub ri winak ri man c'o ta quetamabal.

¹⁹ Conojel quetamam chi ri ix quinimaj ri u tzij ri Dios. Rumal c'u ri' c'o quicotemal pa ri wanima'. Quinwaj chi cäc'oji' i no'j che u banic ri utz, man che ta u banic ri etzelal.

²⁰ Ri Dios aj jamaril, cuban na' chi cuxak'alej ri Satanas chuxe' ri iwakan. Ri u tok'ob ri Ajawaxel Jesus quixtewichinic.

²¹ Cäya' rutzil i wäch rumal ri Timotey ri wach aj chac, ri Lusiy, ri Jason xukuje' ri Sosipater, are' e nu winakil.

²² In ri' in Ters quinya' rutzil i wäch pa u bi' ri Ajawaxel, ri xintz'ibam we wuj ri'.

²³ Cäya' rutzil i wäch rumal ri Gay. Wokxanim c'u ne wib pa ri rachoch, quebuc'ulaj c'u ne conojel ri comon cojonelab. Ri Erast, chajil u puak ri tinimit, cuya' rutzil i wäch. Xukuje' ri kachalal Cuart cuya' rutzil i wäch.

²⁴ Are ri Ajawaxel Jesucrist cuban tok'ob chiwe chi nimalaj iwonojel. Je chbanok.

Ri Pawl cunimarisaj u k'ij ri Dios

²⁵ Chkanimarisaj ba' u k'ij ri Dios ri cäcuin che i tac'abaxic, jas ri cubij pa ri tzij re colobal ib ri quintzijoj, jas cubij ri tzij chrij ri Jesucrist, jas ri xketamaj aretak xec'ut chkawäch ri jastak ri man etamatal ta can nabe, ri man tzijom ta ulok kas aretak majok cätiquiritaj ri uwächulew.

²⁶ K'alajisam chi c'u camic rumal ri qui tz'ibam can ri k'axal tak u tzij ri Dios, jas ri u takanic ri junalic Dios, ri quetamam conojel ri nimak tak tinimit rech quecojon che ri u tzij xukuje' cäquinimaj.

²⁷ ¡Che ri xa' jun Dios ri c'o u no'j, chyok wi ri nimarisabal k'ij rumal ri Jesucrist chbe k'ij sak! Je chbanok.