Romanos 14 - Quiché Bible

Jas rajawaxic cäkaban cuc' ri kachalal pa ri cojonic

¹ Utz u c'ulaxic ri tukar pa ri u cojonic chibana'. Mixk'atan tzij puwi' ri jalan tak chomanic.

² E c'o jujun cäquichomaj chi utz quetij conojel ri jastak. E c'o jujun chic ri man e co ta pa ri qui cojonic, xa' c'u ichaj cäquitijo.

³ Ri jun ri cutij ronojel, märetzelaj u wäch ri jun chic ri man cutij ta jujun jastak. Ri jun ri man cutij ta jun jasach, mubij tzij chrij ri jun ri cutij ronojel, rumal rech chi c'amom ri are' rumal ri Dios.

⁴ ¿Jachin ri at, rech cak'at tzij puwi' ri pataninel rech jun chic? Are quilow ri rajaw we utz cubano o man utz taj. Utz c'u quel na, rumal rech chi ri Ajawaxel cäcuinic cuto' che u banic ri utz.

⁵ Ri jun nim cäril ri jun k'ij chuwäch ri jun k'ij chic. Ri jun chic junam queril wi conojel ri k'ij. Rajawaxic ba chkajujunal kas keta'm jas ri kas ka chomanic.

⁶ Ri jun ri nim cäril wi jun k'ij, cuban wa' che u ya'ic u k'ij ri Ajawaxel. Ri jun chic ri man nim ta cäril wi jun k'ij, xukuje' cuban wa' che u ya'ic u k'ij ri Ajawaxel. Ri jun ri cutij jun jasach, cuban wa' che u ya'ic u k'ij ri Ajawaxel, cämaltioxin c'u che ri Dios. Ri jun chic ri man cutij taj, xukuje' cuban wa' che u ya'ic u k'ij ri Ajawaxel, xukuje' cämaltioxin che ri Dios.

⁷ Man c'o ta c'u jun chke cäc'asi xa' pa re wi, xukuje' man c'o ta jun cäcäm xa' pa re wi.

⁸ We cujc'asi'c, cujc'asi' che ri Ajawaxel. We cujcämic, cujcäm che ri Ajawaxel. Jeri', we cujc'asi'c, o cujcämic, uj rech ri Ajawaxel.

⁹ Rumal c'u wa' xcäm ri Crist, xc'astaj c'ut chi xc'asi' chi c'u jumul, rech cux Ajawaxel paquiwi' ri cäminakib jacha' xukuje' paquiwi' ri e c'asc'oj.

¹⁰ Ri at, ¿jasche cak'at tzij puwi' ri awachalal? Ri at xukuje', ¿jasche cawetzelaj u wäch ri awachalal? Konojel c'ut cujetac'al na chuwäch ri Dios aretak cuk'at na tzij pakawi'.

¹¹ Tz'ibatal c'ut: “In c'aslic, cächa' ri Ajawaxel. Kastzij conojel ri winak quexuqui' na chnuwäch in, conojel quek'alajisan na chuwäch ri Dios.”

¹² Chkajujunal c'ut quekaya' na u bixic chuwäch ri Dios jas ri xkabano.

Maban che ri awachalal chi cätzakic

¹³ Je c'u ri', mäkak'atala' chi tzij pakawi'. Xane' are chichomaj chi man quiban ta chque ri iwachalal chi quetzakic o quekaj pa mac.

¹⁴ In weta'm rumal rech chi in cojonel che ri Ajawaxel Jesus, chi man c'o ta jun jasach tz'il pa re wi, xane' apachin ri cuchomaj chi tz'il jun jasach, che ri are' tz'il wi.

¹⁵ We caban che ri awachalal chi cäbisonic xa' rumal ri catijo, man calok'ok'ej ta ri'. ¡Maban che jun winak chi cäsach u wäch rumal ri catijo! ¡Xcäm c'u ri Crist rumal rech ri are'!

¹⁶ Miya' ba c'olbal chque ri winak chi cäquiyok' ri utzil ri i rikom.

¹⁷ Ri rajawibal c'u ri Dios man wa ja' taj, xane' suq'uil, jamaril xukuje' quicotemal rumal ri Ruxlabal ri Dios.

¹⁸ Conojel c'u ri je cäquiban wa' che u patanixic ri Crist, utz quebil wi rumal ri Dios, xukuje' ri winak cäquibij chi utz.

¹⁹ Chkabana' ba' ri jastak ri cäquiya' jamaril chkaxo'l xukuje' ri cäquiya' ka chuk'ab pa ri ka cojonic.

²⁰ Mayojij ri u chac ri Dios rumal ri catijo. Ronojel kastzij utz quetijic. We c'u catzak jun winak rumal ri catijo, are ri' ri man utz taj.

²¹ Are utz na ri man u tijic ta ti'j, mawi ruq'uiaxic u wa'l uva, mawi caban ta jun jasach ri cuchak'ij ta wi rib ri awachalal.

²² Ri cojonic ri c'o awuc', awech at wa' chuwäch ri Dios. ¡Utz c'u re ri winak ri cuchomaj chi utz jun jasach, we man cuna' pa ranima' chi mac cubano!

²³ Apachin c'u ri cuban quieb u c'u'x che ri cutijo, c'o u mac, rumal rech chi man xutij ta ruc' cojonic. Ronojel c'u ri cäbanic we man ruc' cojonic, mac wa'.