Romanos 12 - Quiché Bible

Rajawaxic chi cäkajach ri ka c'aslemal pa u k'ab ri Dios

¹ Jeri' wachalal, quixinbochi'j pa ri u tok'ob ri Dios chi quijach ri i cuerp pa u k'ab ri Dios, che jun tabal tok'ob cho ri Dios, jun tastalic sipanic, ri c'aslic, ri cäkaj chuwäch ri Dios. Are wa' ri kas k'ijilanic ri quiya' che ri Dios.

² Mitakej c'aslemal jas ri u cholajil tak ri e u chomanic tak ri k'ij junab ri uj c'olic; xane', chiq'uexa' ri chomanic ri i nak'atisam wi iwib rech jeri' quiq'uex ri ruc'axic ri i c'aslemal ri iwuc'am quixcuin c'u che retamaxic u wäch ri u rayibal ri Dios, ri u bixic, ri utz na, ri cakaj chuwäch, ri tz'akat.

³ Rumal c'u ri tok'ob ri yo'm chwe, quinbij chiwe chijujunal, c'o jun muchomaj chi nim u banic, xane xak jas ri takal che. Chijujunal chichomaj iwib ruc' utzalaj chomanic, jas ri cojonic ri xujach ri Dios chiwe chijujunal, we nim o xa jubik'.

⁴ Je jas jun cuerp e c'o q'ui u tz'akatil. Man conojel ta c'ut xak ta junam ri qui chac,

⁵ je c'u ri' ri uj, pune' sibalaj uj q'ui xa' uj jun cuerp pa ri Crist kanuc'ulam c'u kib jacha' uj u tz'akatil xa' jun cuerp.

⁶ C'o c'u jalajoj tak cuinem kuc', ri xusipaj ri Dios chke, chkajujunal. Je jas ri xraj ri are'. We c'o jun yo'm che chi quebuk'axej tak ri tijonic ri yo'm che rumal ri Dios, chubana' wa' jas ri cojonic ri yo'm che.

⁷ We yo'm che jun chi cäpataninic, chpatanin ba'. We yo'm che jun chi cätijonic, chtijonok.

⁸ Ri u c'amom ri sipanic che u ya'ic chajin anima'aj, chucojo' ri u k'ij che u ya'ic chajin animaj. Ri cäyanic chyan ruc' ronojel animaj; ri yo'm rekle'n utz ruc'axic ri rekle'n chubana'; ri cuya' to'banic chque ri e c'o qui rajawaxic chubana' ruc' quicotemal.

Ri rajawaxic cuban jun cojonel

⁹ Kas chi lok'ok'ela' iwib, man ruc' ta quieb c'uxaj. Chiwetzelaj u wäch ri lawaloyil chitakej c'u u banic ri utzilal.

¹⁰ Chilok'ok'ela iwib chi ix jacha' achalaxelab, chebiyala' tak i k'ij nim c'u chebiwila' wi tak iwib.

¹¹ Chebicojo tak i chuk'ab mixsak'orinic chipatanij c'u ri Ajawaxel ruc' jun anima' ri carokowic.

¹² Chixquicot pa ri cu'lbal i c'u'x. Chich'ija' ri c'axc'olil. Amak'el chibana' ch'awem.

¹³ Chebito' ri winak ri e aj Dios pa tak ri qui rajawaxic. Chebic'ulaj ruc' utzil ri quebopan che i solixic.

¹⁴ Chebitewichi'j ri winak ri quixquic'axc'obisaj. Chebitewichi'j, mibij c'axalaj tzij chquij.

¹⁵ Chixquicot cuc' ri quequicotic. Chixok' cuc' ri quebok'ic.

¹⁶ Chc'ol xa' jun anima' chixo'l. Mebibanala' nimal. Xane' chiwachilala' iwib cuc' ri man nimak ta qui banic. Michomaj iwib chi c'o i no'j,

¹⁷ we cäban etzelal chiwe, mitoj u q'uexel ruc' etzelal. Are chicojo' i chuk'ab che u banic utzil chquiwäch conojel ri winak.

¹⁸ We cuya', chibana' ronojel ri quixcuin che u banic rech cäc'oji' jamaril chixo'l cuc' conojel ri winak.

¹⁹ Lok'alaj tak wachalal, mitoj u q'uexel ri etzelal xane' chiya' can che ri royowal ri Dios. Tz'ibatal c'ut: “Wech in ri tojow q'uexel, in quintojow na, cächa' ri Ajawaxel.”

²⁰ Xukuje' c'u ne: “Ri u banom u c'ulel chawe we canumic, chaya' ri cutijo, we c'u cachaki'j u chi' chaya' ri caruq'uiaj; jeri' caban na chi cak'ak'ar ri u palaj che q'uixbal.”

²¹ Match'äctaj rumal ri etzelal, xane' chatch'äcan puwi' ri etzelal ruc' ri utzil.