Romanos 11 - Quiché Bible

Jujun chque ri aj israelib e colotajinak

¹ Quinban c'ut ri c'otoj chi'aj: ¿La u xutum lo ri Dios ri u tinimit? ¡Man je ta ri'! Ri in c'ut in jun chque ri aj israelib, pa ri rija'l ri Abraham xinalax wi, chquixo'l ri e ramak' ri Benjamin.

² Ri Dios man xebuxutuj taj ri aj israelib ri e aj u tinimit, ri ojer u ch'obom ulok qui wäch. ¿La ma ta iweta'm jas cubij ri Tz'ibatalic chrij ri Eliy?: xch'aw ruc' Dios chrij ri Israel, xubij:

³ “Ajawaxel, e qui cämisam ri e k'axal tak tzij la, e qui yojim tak ri porobal ri queya' wi tabal tok'ob chwäch la. Xa' nu tuquiel chic in canajinak canok. Cäquitzucuj c'u nu cämisaxic.”

⁴ Are c'u ri Dios xubij che: “E nu c'olom can wukub mil achijab chwe, ri man qui mejom ta quib chuwäch ri dios Baal.”

⁵ Je c'u wa' ri c'ulmatajinak, canajinak c'u can jubik' qui tz'akatil, are' c'u ri Dios, chupam ri rutzil, u cha'om.

⁶ We xcha' rumal ri u tok'ob ri Dios, man xcha' ta ri' rumal ri u chac. We ta ba' rumal chac, ri u tok'ob ri Dios ma ta tok'ob chi ri'.

⁷ ¿Jas c'ut? Ri sibalaj xquitzucuj ri winak aj israelib, man xquirik taj. Are c'u ri winak ri e cha'om e are' xerikowic. Ri e jule' chic xcowirisax ri canima'.

⁸ Jas ri tz'ibatalic: “Ri Dios xuya' jun uxlabal siquirinak chque bak'wächaj ri man queca'y taj, xiquinaj ri man quetan taj, c'ä pa ri k'ij camic.”

⁹ Xukuje' xubij ri David: “Aretak cäquiban tak wa'im pa mexa, chux tzakibal xukuje' chapbal, rech cäquichak'ij ri cakan, tojbal q'uexel chque.

¹⁰ Chban chque chi je ta ne quek'ekumar ri qui bak'wäch rech man queca'y ta chic. Chban chque chi je ta ne c'o jun alalaj eka'n chquij amak'el.”

Ri man aj israelib taj quecolotajic

¹¹ Quinta' c'ut: ¿La kastzij lo chi man cäquiyac ta chi quib ri aj judeyib we xetzakic? ¡Man je ta ri'! Xane' rumal chi man xeniman taj, xya' chque ri jule' chic chi quecolotajic. Rech ri aj judeyib sibalaj cäquirayij na que ri utzalaj jasach ri qui rikom ri niq'uiaj winak chic.

¹² We rumal ri qui mac ri aj judeyib xya' jun utzalaj jasach je ta ne jun k'inomal chque ri winak cho ronojel ri uwächulew, we xya' jun utzalaj jasach chque ri man aj judeyib taj rumal chi ri aj judeyib xetzakic, ¡sibalaj utz na cäquirik ri winak aretak ri aj judeyib cäquic'am chi na che ri Dios ronojel ri cäraj chque!

¹³ C'o c'ut ri quinbij na chiwe ix ri man ix aj judeyib taj in u takom c'u ne ri Dios chque ri man aj judeyib taj, ri in sibalaj nim quinwil wi ri in takom che u banic.

¹⁴ Quinwaj ta ne in chi ri e nu winakil sibalaj chquirayij ta que ri utzalaj jasach ri i rikom ix, rech quecolotaj jujun chque.

¹⁵ We ri quesaxic can ri aj judeyib are xbanowic chi xquirik ri jamaril ri winak cho ri uwächulew ruc' ri Dios, ¿jas c'u lo cäc'ulmax na aretak quec'am chi na ri aj judeyib rumal ri Dios? ¡Are jun c'astajibal ri' chque ri cäminakib!

¹⁶ We tastal che ri Dios ri nabe wa ri quel che ri k'or, jeri' conojel ri wa e tastalic. We ri u xe' ri che' tastalic, jeri' conojel ri e u k'ab e tastalic.

¹⁷ Chkabana' che chi c'o jun u che'al aseitun, ri at at jun u k'ab aseitun re juyub. We xesax apan jujun chque ri kas u k'ab aseitun, ri at c'ut at catch'ap ocok chquixo'l ri e u k'ab, jeri' catc'asi' na rumal ri u c'amal ri benak pa ri ulew xukuje' rumal ri u räxal ri u che'al aseitun, ri caquiq'uex wichij ri aj judeyib.

¹⁸ Machomaj chi sibalaj nimak'ij chquiwäch ri u k'ab ri che'. We c'u canimarisaj awib, chnataj chawe chi man at ta ri' ri catyo'w u c'aslemal ri u c'amal ri che' ri benak pa ri ulew, xane' are' ri u c'amal cäyo'w a c'aslemal.

¹⁹ At c'ut cabij na: “Xebesax ri e u k'ab ri che' rech xinch'ap ocok in.”

²⁰ Tzij, xebesax ri aj judeyib rumal rech chi man xecojon taj. At c'ut rumal ri a cojonic xatch'ap ocok. Manimarisaj ba awib, xane' chaxe'j awib.

²¹ We c'u ri Dios man xutok'obisaj ta qui wäch ri kas u k'ab ri che', mawi ne ri at cutok'obisaj a wäch.

²² Chawila' ba' chi ri Dios ch'uch'uj, xukuje' c'a'n. Are c'a'n chque ri winak ri xetzakic. Ch'uch'uj c'u chawe at, we catjeki' pa ri utzil ri cuban chawe. Are c'u we caya' canok, xukuje' ri at catesax na apanok.

²³ Xukuje' c'u ne ri aj judeyib, we man caquitakej ri jekelem chupam ri man qui cojonic taj, quech'ap chi na puwi' ri che'. Ri Dios c'ut cäcuin che qui ch'apic jumul chic.

²⁴ We ri at man at ta aj judey, xatesax che ri juyubal aseitun, xatch'ap c'u ocok man je ta c'u wa' ri takal u banic che ri utzalaj aseitun, ¡e ta c'u lo ri aj judeyib kas e u k'ab ri che' quetik chi na che ri che' ri xebesax wi bic!

Ri qui colotajic ri aj israelib chuq'uisbalil

²⁵ Wachalal, quinwaj chi quich'ob we awatalic ri', rech man quichomaj taj chi ri ix nim na ri i no'j. Xcowirisax na apan jubik' ri canima' ri aj israelib, c'ä aretak queboc na conojel ri man aj israelib taj ri quecojon na.

²⁶ Te c'u ri' ronojel ri Israel cäcolotaj na, jas ri tz'ibatalic: “Quel na ulok pa Sion ri tzokopil que ri winak, cäresaj na ri etzelal che ri Jacob.

²⁷ Are nu c'ulwächinic wa' cuc' aretak chinwesaj ri qui mac.”

²⁸ Rumal c'u rech ri utzalaj c'ac' tzij ri aj judeyib xquic'ulelaj ri Dios rech caya' k'ijol chiwe ix; c'aquelok'ok'ex c'u ne rumal ri Dios, man e sachinak ta c'u ne ri e i mam pa u jolom.

²⁹ Ri Dios man c'u q'uex ta u c'u'x chi u cha'om jun xukuje' u tewichi'm ri winak, man cuq'uex ta ri u chomanic.

³⁰ Je jas ri ix, nabe canok man xixniman ta che ri Dios. Camic c'ut ri Dios xel u c'u'x chiwe rumal rech chi ri aj judeyib man xeniman taj.

³¹ Jewa' xukuje', ri e are' man e nimaninak ta camic, xa' c'u rech quel u c'u'x ri Dios chiwe ix rech c'ut xukuje' camic quel u c'u'x chque.

³² Ri Dios xuban chque conojel chi man queniman taj, rech quel u c'u'x chque conojel.

³³ ¡Sibalaj nim ri u k'inomal ri Dios! ¡Sibalaj nim ri u no'j! ¡Sibalaj nim ri retamabal! Man c'o ta jun cäch'obow ri u chomanic. Man c'o ta jun cäcuin che retamaxic ri cuban ri Dios.

³⁴ ¿Jachin ta cäch'obow ri u chomanic ri Ajawaxel? ¿Jachin ta xyo'w u no'j?

³⁵ ¿Jachin ta ri c'o jas xuya' che ri Dios nabe, rech cätoj ta u q'uexel che?

³⁶ Ruc' are' e elinak wi ulok conojel ri jastak, rumal are' xukuje' che are' e c'o wi. Chnimarisax u k'ij ri Dios amak'el chbe k'ij sak. Je chbanok.