Ri Xuan 7 - Quiché Bible

Ri e rachalal ri Jesus man xecojon ta che

¹ E oc'owinak chi c'u we jastak ri', cäbinicat ri Jesus pa Galiley. Man cäraj taj cäbinicat pa Judey, rumal rech chi ri aj judeyib cäquitzucuj u cämisaxic.

² Nakajininak chi c'ut ri qui nimak'ij ri aj judeyib, quech ri cäbal.

³ Xquibij c'u ri rachalal che: “Chatel bic waral, jät pa Judey, rech xukuje' ri a tijoxelab cäquil tak ri chac ri cabano.

⁴ We jun cäraj chi queilitaj ri jastak ri quebubano, man cuban ta chi c'uyal. We caban we jastak ri', chac'utu' awib chquiwäch conojel ri winak.”

⁵ Mawi c'u ne ri rachalal xecojon che ri are'.

⁶ Xubij c'u ri Jesus chque: “C'ä maja' copan ri k'ijol. Are c'u ri chiwe ix, apachique k'ijol utz chiwe.

⁷ Ri e aj uwächulew man quecuin taj cäquetzelaj i wäch ix. Cäquetzelaj c'u nu wäch in, rumal rech chi quink'alajisaj jas ri qui banic, chi cäquiban etzelal.

⁸ Jix ix pa ri nimak'ij; ri in man quinbe taj iwuc', c'ä maja' c'u cätz'akat ri nu k'ijol.”

⁹ Aretak xbitaj wa rumal, xcanaj can pa Galiley.

Ri Jesus pa ri nimak'ij quech ri cäbal

¹⁰ Aretak e benak chic ri rachalal pa ri nimak'ij, c'äte ri' xukuje' ri Jesus xbec, man chi sakil taj, xane' chi c'uyal.

¹¹ Xquitzucuj c'u ri aj judeyib pa ri nimak'ij, xquibij: “¿Jawije' c'o wi ri achi ri'?”

¹² C'o nimalaj wixwitem chrij chquixo'l ri q'ui winak; jujun caquibij: “Jun utzalaj winak wa'.” Jujun chic c'ut caquibij: “Man utz taj, xane' quebusub ri winak.”

¹³ Man c'o ta jun cätzijon chrij chi sakil, rumal rech chi caquixe'j quib chquiwäch ri aj judeyib.

¹⁴ Pa ri u niq'uiajiric ri nimak'ij xpaki' ri Jesus pa ri rachoch Dios, cätijon c'ut.

¹⁵ Xquimay ri aj judeyib, xquibij: “¿Jasche wa' c'o retamabal ri are', man u tijom ta c'u rib?”

¹⁶ Ri Jesus xubij chque: “Ri nu tijonic man wech taj, xane' rech ri xintakow ulok.

¹⁷ We c'o jachin cäraj cuban ri u rayibal ri xintakow ulok, cäretamaj na we ri nu tijonic cäpe ruc' ri Dios, we xak quintzijoj pa we wi.

¹⁸ Ri' ri cätzijon pa re wi, cutzucuj ri u juluwem ri are' chbil rib. Ri cutzucuj ri u juluwem ri xtakow ulok, are wa' aj kastzij, man c'o ta c'u etzelal ruc'.

¹⁹ ¿La ma ta xuya' ri Moises ri pixab chiwe? Man c'o ta c'u jun chiwe cunimaj ri pixab. ¿Jas che quitzucuj nu cämisaxic?”

²⁰ Ri winak xquitzelej u bixic che: “C'o itzel uxlabal chawe. ¿Jachin cätajin cätzucun a cämisaxic?”

²¹ Ri Jesus xubij chque: “Jun chac xinbano, iwonojel c'ut quimayo.

²² Ri Moises xuya' chiwe chi quikopij ri u wi' ri u tz'umal ri ix achijab wi che iwetal, (man ruc' ta c'u ri Moises xtiquitaj wi, xane' cuc' ri e i mam). Pa ri k'ij c'ut re uxlanem quikopij ri qui tz'umal ri alabom ruc' ch'ich' che quetal.

²³ We pa ri k'ij re uxlanem cäkopix ri u wi' ri u tz'umal ri ala wi che retal, che u nimaxic ri u pixab ri Moises, ¿jasche cäpe iwoyowal chwij aretak pa k'ij re uxlanem xinwutzirisaj ronojel ri jun winak?

²⁴ Mik'at tzij rumal ri xak quiwilo. Xane' chik'ata' tzij ruc' ri suc'alaj k'atoj tzij.”

Ri Jesus cutzijoj jawije' cäpe wi

²⁵ Xquibij c'u jujun e aj Jerusalen: “¿La ma ta are wa' ri cätzucux u cämisaxic?”

²⁶ “Chiwilampe', cätzijon chi sakil, man c'o ta c'u jas cäbix che. ¿La xa lo kas queta'm ri nimak qui banic chi are wa' ri Crist?

²⁷ Ri uj keta'm aj jawije'. Aretak c'u cäpe ri Crist, man c'o ta jun reta'm aj jawije'.”

²⁸ C'äte c'u ri' ri Jesus co xch'awic aretak quebutijoj ri winak pa ri rachoch Dios, xubij: “Ri ix iweta'm nu wäch, xukuje' iweta'm jawije' quinpe wi. Ri in man in petinak ta pa wech wi. Are c'u ri xinutak ulok, are' kastzij, ri ix man iweta'm ta u wäch.

²⁹ Ri in weta'm u wäch, ruc' c'u ri are' in elinak wi ulok, ri are' xintakow ulok.”

³⁰ Xquitzucuj c'u u chapic. Man c'o ta jun xucoj ta u k'ab chrij, rumal rech chi c'ä maja' copan ri u jok'otaj.

³¹ E q'ui chque ri winak xecojon che, xquibij: “Aretak cäpe ri Crist, ¿la quebuban ta c'u na lo e q'uia tak etal chquiwäch ri e u banom we achi ri'?”

Ri pariseyib xequitak bic ri pataninel que che u chapic ri Jesus

³² Ri pariseyib xquita' ri jastak ri caquibij ri q'ui winak chrij ri Jesus; ri e are' xukuje' ri e quinimakil ri e cojol tabal tak tok'ob xequitak bic jujun chajinelab rech ri rachoch Dios che u chapic ulok.

³³ Xubij ri Jesus: “Xa jubik' chic quinc'oji' iwuc', c'äte ri' quinbe ruc' ri xinutak ulok.

³⁴ Quinitzucuj na, man quinirik ta c'ut. Jawije' ri in c'o wi, man quixcuin taj quixbe chila'.”

³⁵ Xquitzijobela' c'u quib ri aj judeyib: “¿Jawije' ta lo cäbe wi, ri ma ta cäkarik na? ¿La cäbe ta lo cuc' ri ka winakil ri e jabuninak chquixo'l ri aj Gres? ¿La cäbe cuc' ri aj Gres che qui tijoxic?

³⁶ ¿Jas u banic we tzij ri' ri xubij?: ‘Quinitzucuj na, man quinirik ta c'ut; jawije' c'ut ri in c'o wi, man quixcuin taj quixbe chila'.’ ”

Nima' re c'aslic ja'

³⁷ Pa ri q'uisbal k'ij, are c'u k'ij wa' ri nim na u banic re ri nimak'ij, ri Jesus xtaq'ui'c, co xch'awic, xubij: “We c'o jachin cächaki'j u chi', chpet wuc', chuq'uianok.

³⁸ Ri cäcojon chwe in, jas ri cubij ri Tz'ibatalic: ‘nima' re c'aslic ja' quebel na ulok pa ri ranima'.’ ”

³⁹ Xubij wa' chrij ri Uxlabaxel ri cäquic'am na ri winak ri quecojon che ri are'. C'ä maja' c'u ne cäpe ri Uxlabaxel, rumal rech chi c'ä maja' cajuluwirisax ri Jesus.

E c'o jujun winak xquitas quib chquij ri niq'uiaj chic

⁴⁰ Jujun c'ut chque ri winak, aretak xquita' we tzij ri', xquibij: “Kastzij are wa' ri K'axal Tzij.”

⁴¹ Jujun chic xquibij: “Are wa' ri Crist.” Ri niq'uiaj chic xquibij: “¿La pa Galiley ta lo cäpe wi ri Crist?

⁴² ¿La ma ta cubij ri Tz'ibatalic chi ri Crist are rija'l ri David, cäpe na pa Belen, ri alaj tinimit ri xpe wi ri David?”

⁴³ E q'ui c'u ri winak xquitas quib chquij ri niq'uiaj chic rumal rech ri Jesus.

⁴⁴ E c'o jujun chque are ta xcaj xquichap bic. Man c'o ta c'u jun xucoj u k'ab chrij.

Ri nimak qui banic man xecojon ta che ri Jesus

⁴⁵ Xepe ri chajinelab re ri rachoch Dios cuc' ri qui nimakil ri e cojol tabal tok'ob xukuje' cuc' ri pariseyib, xquibij c'u wa' chque ri chajinelab: “¿Jasche man xic'am ta ulok?”

⁴⁶ Ri e chajinelab xquitzelej u bixic chque: “Mawi jumul c'o jun winak tzijoninak jas ri cätzijon we achi ri'.”

⁴⁷ Ri pariseyib xquibij chque: “¿La xukuje' ba' ri ix xixsubutajic?

⁴⁸ ¿La c'o lo jun chque ri nimak qui banic, o chque ri pariseyib, ri e cojoninak che ri are'?

⁴⁹ Are c'u we q'uialaj winak ri', ri man queta'm ta ri pixab, e c'okotajinak wa'.”

⁵⁰ Ri Nicodem, ri xopan can nabe ruc' ri Jesus, are' jun chque ri pariseyib, xubij chque:

⁵¹ “¿La cubij lo ri ka pixab chi cäc'okox jun winak, we ma ta nabe cätatabex na ri u tzij, quetamax na jas ri u banom?”

⁵² Xquibij c'u che: “¿La at lo xukuje' aj Galiley? Chatzucuj pa ri Tz'ibatalic, chawila' chi man c'o ta jun k'axal tzij cäwalij pa Galiley.”

⁵³ Chquijujunal c'ut xebe cho cachoch.