Ri Xuan 3 - Quiché Bible

Ri Jesus xukuje' ri Nicodem

¹ C'o jun achi chque ri pariseyib, Nicodem u bi', are' jun qui nimal ri aj judeyib.

² Ri are' xopan ruc' ri Jesus chak'ab, xubij che: “Ajtij, keta'm chi lal jun ajtij ri elinak ulok ruc' ri Dios. Man c'o ta c'u jun ri cäcuin che u banic tak we etal ri' ri caban la, we ta ma ta c'o ri Dios ruc'.”

³ Ri Jesus xubij che: “Kastzij, kastzij quinbij chawe, apachin ri man calax ta chi na jumul, man cäcuin ta che rilic ri rajawibal ri Dios.”

⁴ Ri Nicodem xubij che: “¿Jas ta ri cuban ri winak ri ri'j chic cäcuinic calax chi na jumul? ¿La cäcuin lo coc chucamul pa ri u c'u'x ri u nan, rech calax ta chi na?”

⁵ Ri Jesus xubij che: “Kastzij, kastzij quinbij chawe, apachin ri man calax ta rumal ri ja' xukuje' rumal ri Uxlabaxel, man cäcuin taj coc pa ri rajawibal ri Dios.

⁶ Ri alc'ualam cumal ri winak, winak ri'. Ri alc'ualam rumal ri Uxlabaxel, uxlabal ri'.

⁷ Mamay ba' ri xinbij chawe: Rajawaxic chi catalax chi na jumul.

⁸ Ri quiakik' cäbe xa apawije' cäraj cäbe wi, cätataj ri u jininem. Man aweta'm ta c'ut jawije' cäpe wi, mawi jawije' cäbe wi. Jewa' xukuje' conojel ri e alc'ualam rumal ri Uxlabaxel.”

⁹ Ri Nicodem xubij che: “¿Jas ta c'u lo u banic wa'?”

¹⁰ Ri Jesus xubij che: “At ajtij re Israel, ¿la ma ta c'u aweta'm wa'?

¹¹ Kastzij, kastzij quinbij chawe, chi ri uj cäkatzijoj jas ri keta'm, cäkak'alajisaj jas ri kilom. Ri ix c'ut man quic'am ta ri ka k'alajisanic.

¹² We e nu bim jastak aj uwächulew chiwe, man quicoj ta c'u ne, ¿jas ta quiban ri' quixcojonic we ta quintzijoj jastak aj chicaj chiwe?

¹³ Man c'o ta jun benak chicaj, xuwi ri jun ri xkaj ulok pa ri caj, ri Rija'l Winak.

¹⁴ Je jas xuban ri Moises pa ri chaki'j uwo sak, xuwalijisaj ri cumätz, xukuje' jeri' rajawaxic chi ri Rija'l Winak cäwalijisax na.

¹⁵ Rech conojel ri quecojon che ri are', quec'oji' junalic qui c'aslemal.”

Ri u lok'ok'ebal u c'u'x ri Dios chque conojel ri winak

¹⁶ “Chi' cäkil wi chi ri Dios sibalaj quebulok'ok'ej ri winak cho ri uwächulew, xuya' c'ut ri u C'ojol, ri xa' jun c'olic, rech conojel ri quecojon che, man cäsach ta qui wäch, xane' cäc'oji' na junalic qui c'aslemal.

¹⁷ Are c'u ri Dios man xutak ta ulok ri u C'ojol cho ri uwächulew che u k'atic tzij paquiwi' ri winak, xane' rech quecolotaj ri winak rumal.

¹⁸ Ri cäcojon che are', man cäk'at ta tzij puwi. Are c'u ri man cäcojon taj, k'atom chi tzij puwi', rumal rech chi man xcojon ta che ri u bi' ri u C'ojol ri Dios, ri xa jun c'olic.

¹⁹ Are c'u wa' ri k'atoj tzij: chi xul ri chäj cho ri uwächulew, ri winak c'ut are xquilok'ok'ej na ri k'eku'm chuwäch ri chäj, rumal rech chi e itzel tak jastak ri quequibano.

²⁰ Conojel c'ut ri cäquiban etzelal, cäquetzelaj u wäch ri chäj. Xukuje' man quepe ta cho ri chäj, rech man cäk'alajisax ta ri cäquibano.

²¹ Apachin c'u ri cuban ri kastzij, cäpe cho ri chäj, rech quek'alajisaxic ri cubano cäjunamataj ruc' ri u rayibal ri Dios.”

Jumul chic ri Xuan Bautist xutzijoj ri Jesus

²² Oc'owinak chi c'u wa', xbe ri Jesus pa ri ulew ri e c'o pa Judey, e rachilam ri u tijoxelab. Xcanaj can chila' cuc', xuban c'ut ri qui bautism ri winak.

²³ Xukuje' ri Xuan xuban ri qui bautism ri winak pa Enon chunakaj ri Salim, e c'o c'u q'ui ja' chila'. Xebopan c'u ri winak rech xeban ri qui bautism.

²⁴ C'ä maja' c'u cäya' ri Xuan pa che'.

²⁵ Xyactaj c'u jun chomanic chquixo'l ri u tijoxelab ri Xuan ruc' ri jun aj judey, chrij josk'inic.

²⁶ Xebopan ruc' ri Xuan, xquibij che: “Ajtij, ri jun ri xc'oji' can awuc' ch'käp che ri Jordan, ri xaya' k'alajisanic chrij jas ri u banic, chawilampe', ri are' cuban ri qui bautism ri winak, conojel c'ut quebopan ruc'.”

²⁷ Ri Xuan xubij chque: “Man cäcuin ta jun winak c'o cuc'amo, we ta ma ta cäyataj che chicaj.

²⁸ Ix ri' quixk'alajisan chwij xinbij: ‘Man in taj ri Crist, xane' xintak ulok chuwäch ri are'.’

²⁹ Pa jun c'ulanem, ri uc'aninak ri alibatz are' ri achajilaxel. Are c'u ri rachil ri achajilaxel ri tac'al ruc', sibalaj cäquicotic aretak cuta' ri u ch'abal ri achajilaxel. Je c'u wa' tz'akat ri nu quicotemal ri'.

³⁰ Ri are' rajawaxic cänimarisax u k'ij; ri in c'ut rajawaxic cäkasax nu k'ij.”

Ri elinak ulok chicaj

³¹ Ri elinak ulok chicaj c'o paquiwi' conojel. Ri aj uwächulew, aj uwächulew, cach'aw c'ut jacha' ri aj uwächulew. Are c'u ri elinak ulok chicaj, are c'o paquiwi' conojel.

³² Cuk'alajisaj jas ri rilom, jas ri u tom. Man c'o ta c'u jun cäc'amow ri u k'alajisanic.

³³ Ri cäc'amow ri u k'alajisanic, cujiquiba' ruc' wa' chi ri Dios man c'o ta jubik' banoj tzij ruc'.

³⁴ Are' c'ut ri takom ulok rumal ri Dios, ri e u tzij ri Dios quebutzijoj; man cupaj ta c'ut ri Uxlabaxel ri cuyao.

³⁵ Ri Tataxel culok'ok'ej ri C'ojolaxel, conojel ri jastak e u yo'm pa u k'ab.

³⁶ Ri cäcojon che ri C'ojolaxel, c'o junalic u c'aslemal. Ri man cäcojon ta che ri C'ojolaxel, man c'o ta u c'aslemal, xane' ri royowal ri Dios cakaj na puwi'.