Ri Xuan 20 - Quiché Bible

Ri u c'astajic ri Jesus chquixo'l ri cäminakib

¹ Pa ri nabe k'ij re ri seman, ri Mariy Magdalen sibalaj ak'ab xbe chuchi' ri mukubal aretak c'ä maja' cäsakaric. Xrilo chi esam chic ri abaj chuchi' ri mukubal.

² C'äte ri' xbe c'u aninak, xopan cuc' ri Simon Lu' xukuje' ri jun tijoxel chic, ri lok' chuwäch ri Jesus, xubij chque: “C'amom bic ri Kajaw xesax bic chupam ri jul, man keta'm taj jawije' yo'm wi.”

³ Xebel ulok ri Lu' ruc' ri jun tijoxel chic, xebe chuchi' ri mukubal.

⁴ Ri e quieb junam cätajin quexiq'uinic. Are c'u ri jun tijoxel chic aninak xxiq'uin na chuwäch ri Lu', nabe xopan chuchi' ri mukubal.

⁵ Xpachi' che rilic, xeril ri sak tak atz'iak ri e yo'm can chila'. Man xoc ta c'u bic.

⁶ Chanim xopan ri Simon Lu' u terenem, xoc bic chupam ri mukubal, xeril ri sak atz'iak ri e yo'm can chila'.

⁷ Ri su't, ri xc'oji' chujolom, man c'o ta can cuc' ri sak tak atz'iak, xane' botz'talic yo'm can pa jun c'olbal chic.

⁸ C'äte ri' xoc bic xukuje' ri jun tijoxel chic, ri nabe xopan chuchi' ri mukubal, xrilo, xcojonic.

⁹ C'ä maja' c'u cäquich'ob ri Tz'ibatalic, chi rajawaxic chi ri Jesus cäc'astaj na chquixo'l ri cäminakib.

¹⁰ C'äte ri' ri tijoxelab xebel bic, xetzelej chi jumul cho ja.

Ri Jesus xuc'ut rib chuwäch ri Mariy Magdalen

¹¹ Are c'u ri Mariy tac'al chunakaj ri mukubal, cok'ic. Cätajin cok'ic, xpachi' che rilic ri u pam ri mukubal.

¹² Xeril quieb tako'n aj caj, sibalaj sak ri catz'iak, e t'uyut'oj, jun pa u jolom, jun pa rakan ri xc'oji' wi ri u cuerp ri Jesus.

¹³ Ri e are' xquibij che: “Chuchu', ¿jasche catok'ic?” Ri Mariy xubij chque: “Xc'am bic ri Wajaw; man weta'm ta c'ut jawije' yo'm wi.”

¹⁴ Xbitaj wa' rumal, xutzolk'omij rib chrij, xril ri Jesus tac'alic. Man reta'm ta c'ut chi are' ri Jesus.

¹⁵ Xubij ri Jesus che: “Chuchu', ¿jasche cok' la? ¿Jachin ri catzucuj la?” Ri Mariy xuchomaj chi are' ri chajinel re ri ticonijibal, xubij c'u che: “Tat, we lal xc'amow la bic, bij la chwe jawije' yo'm wi la, quinc'am c'u bic.”

¹⁶ Xubij ri Jesus che: “¡Mariy!” Ri are' xutzolk'omij rib, xubij che pa hebrey: “¡Raboni!” ri je quel cubij wa', “¡Ajtij!”

¹⁷ Ri Jesus xubij che: “Minachapo, c'ä maja' c'u quinpaki' ruc' ri Tataxel. Jät cuc' ri wachalal, chabij chque: ‘Quinpaki' ruc' ri nu Tat, xukuje' i Tat, ruc' ri nu Dios, xukuje' i Dios.’ ”

¹⁸ Xbe ri Mariy Magdalen, xuya' u bixic chque ri tijoxelab chi xril ri Ajawaxel, chi are' xbin we jastak ri' che.

Ri Jesus xuc'ut rib chquiwäch ri u tijoxelab

¹⁹ Pa ri xk'ekal re ri k'ij ri', ri nabe k'ij re ri seman, qui mulin quib ri tijoxelab. E tz'apitz'oj ri e u chi' tak ja rumal rech chi cäquixe'j quib chquiwäch ri aj judeyib. Te c'u ri' xpe ri Jesus, xtaq'ui' pa qui niq'uiajil, xubij chque: “Chc'ol ri jamaril iwuc'.”

²⁰ Xbitaj wa' rumal, xebuc'ut ri u k'ab chquiwäch, xuc'ut ri u c'alc'a'x chquiwäch. Ri tijoxelab xequicotic aretak xquil ri Cajaw.

²¹ Xubij chi c'u jumul ri Jesus chque: “Chc'ol ri jamaril iwuc'. Jacha' ri Tataxel xinutak ulok in, je xukuje' ri in quixintak bic ix.”

²² Xbitaj wa' rumal, xwupinic, xubij chque: “Chic'ama' ri Ruxlabal ri Dios.

²³ Jachin tak ri quebicuy ri qui mac, quecuyatajic; jachin tak c'ut ri man quebicuy ta wi, man quecuyutaj taj.”

Ri Max xril ri Ajawaxel chi c'astajinak chic

²⁴ Are c'u ri Max, jun chque ri cablajuj, ri cäbix “Yo'x” che, man c'o ta apan cuc' aretak xopan ri Jesus.

²⁵ Ri niq'uiaj tijoxelab xquibij che: “Kilom ri Kajaw.” Xubij c'u ri Max chque: “We man quebenwil ri quetal ri clawux chque ri u k'ab, we man quinnim ri u wi' nu k'ab pa ri qui c'olbal ri clawux, we man quinnim ri nu k'ab pa ri u c'alc'a'x, man quincoj taj.”

²⁶ Oc'owinak chic wajxakib k'ij, jumul chic e c'o ri u tijoxelab pa ri ja, xukuje' ri Max c'o cuc'. Pune' e tz'apitz'oj ri e u chi' ri ja, xopan ri Jesus, xtaq'ui' pa qui niq'uiajil, xubij: “Chc'ol jamaril iwuc'.”

²⁷ Xubij c'u che ri Max: “Tasaj, chacojo ri u wi' a k'ab waral, chebawila' ri nu k'ab. Tasaj, chanima' ri a k'ab pa ri nu c'alc'a'x. Maquieblaj a c'u'x. Chatcojonok.”

²⁸ Ri Max xubij che: “¡Wajaw, xukuje' nu Dios!”

²⁹ Ri Jesus xubij che: “Max, ¿la rumal rech chi xinawilo, xatcojonic? E tewichital ri man caquil taj, quecojon c'ut.”

Xtz'ibax we wuj ri' rech quixcojonic

³⁰ Chquiwäch ri u tijoxelab, ri Jesus xukuje' xuban niq'uiaj q'ui mayibal chic, q'ui etal xubano, ri man e tz'ibam ta chupam we wuj ri'.

³¹ E tz'ibam c'u wa' rech quicojo chi ri Jesus are' ri Crist, u C'ojol ri Dios, rech aretak quicojo, cäc'oji' i c'aslemal pa ri u bi'.