Ri Xuan 17 - Quiché Bible

Ri Jesus xuban ch'awem paquiwi' ri u tijoxelab

¹ Aretak ri Jesus u bim chi we jastak ri', xca'y chicaj, xubij: “Tat, petinak chic ri jok'otaj. Chnimarisaj la u k'ij ri C'ojol la, rech xukuje' ri C'ojol la cunimarisaj na ri k'ij la.

² Je jacha' ri yo'm la takanic pa u k'ab puwi' conojel winak, rech cuya' junalic c'aslemal chque conojel ri e yo'm la che.

³ Are c'u wa' ri junalic c'aslemal: Chi cäquich'ob wäch la, xuwi ri lal kas Dios, xukuje' cäquich'ob u wäch ri Jesucrist, ri takom la ulok.

⁴ Ri in xinnimarisaj ri k'ij la cho ri uwächulew. Xintz'akatisaj ri chac ri xya' la chwe rech quinbano.

⁵ Camic c'ut, Tat, chnimarisaj la nu k'ij chxcut la ruc' ri juluwem ri xc'oji' wuc', aretak c'ä majok ri uwächulew.

⁶ Nu k'alajisam ri bi' la chquiwäch ri winak ri e cha'om la chquixo'l ri winak ri e aj uwächulew che quiya'ic chwe. E ech la nabe, xeya' c'u la chwe, quinimam c'ut ri tzij la.

⁷ Camic queta'm chi ronojel ri yo'm la chwe, uc' la elinak wi ulok,

⁸ ri tzij ri yo'm la chwe, ri in nu yo'm chque. Qui c'amom c'ut, kastzij queta'm chi uc' la xinel wi ulok, qui cojom chi ri lal xintak la ulok.

⁹ Ri in quinbochi'n che la paquiwi'. Man quinbochi'n ta paquiwi' ri winak re ri uwächulew, xane' quinbochi'n paquiwi' ri e yo'm la chwe, rumal rech chi e ech la.

¹⁰ Ronojel ri wech, ech la; xukuje' ri ech la, wech; ri nu juluwem cäc'utun cumal quech.

¹¹ In man quinbeytaj ta chic cho ri uwächulew. Ri e are' quebeytaj na cho ri uwächulew, ri in quinbe uc' la. Suc'alaj nu Tat, chec'olo' la ri e are' pa ri bi' la ri e yo'm la chwe, rech quebux xa' e jun, e jacha' ri uj xa' uj jun.

¹² Aretak xinc'oji' cuc', xebenchajij pa ri bi' la ri xeya' la chwe, xebenbechajij. Man c'o ta jun chque xsach qui wäch, xane' xuwi ri ralc'ual sachbal wäch, rech cäbantajic jas ri cubij ri Tz'ibatalic.

¹³ Chanim quinbe uc' la. Quintzijoj we jastak ri' cho ri uwächulew, rech cäc'oji' ri nu quicotemal cuc' ri e are', cätz'akatisax ri nu quicotemal pa ri canima'.

¹⁴ Ri in nu yo'm ri tzij la chque. Ri winak aj uwächulew xquetzelaj qui wäch, rumal rech chi man e aj uwächulew taj, jas ri in xukuje' man in aj uwächulew taj.

¹⁵ Man quinbochi'n ta che la chi quebesaj la cho ri uwächulew, xane' quinbochi'n che la chi quechajij la chuwäch ri etzelal.

¹⁶ Man e aj uwächulew taj, jas ri in xukuje' man in aj uwächulew taj.

¹⁷ Chetasa' che la rumal ri kastzij. Ri tzij la are ri kastzij.

¹⁸ Jacha' ri nu takic ulok umal la cho ri uwächulew, ri in xukuje' xebentak bic chquixo'l ri e aj uwächulew.

¹⁹ Rumal quech ri e are' nu tasom wib chbil wib, rech xukuje' ri e are' quetastaj rumal ri kastzij.

²⁰ Man xuwi ta quinbochi'n che la paquiwi' ri e are', xane' xukuje' quinbochi'n paquiwi' ri quecojon na chwe rumal ri qui tzij ri e are',

²¹ rech conojel xa' e jun. Jas ri lal, Tat, ri lal c'o la wuc' in, xukuje' ri in in c'o uc' la, rech xukuje' ri e are' e c'o kuc' uj, rech ri winak aj uwächulew cäquicojo chi ri lal xintakow la ulok.

²² Ri in nu yo'm chque e are' ri juluwem ri yo'm la chwe, rech ri e are' xa' e jun, je jas ri uj xa' uj jun.

²³ Ri in in c'o cuc' are', xukuje' ri lal lal c'o wuc' in, rech kas quebux xa' e jun, rech ri winak aj uwächulew cäquetamaj chi lal xintakow la ulok, cäquetamaj chi e lok'ok'em la je jas ri nu lok'ok'exic umal la.

²⁴ Tat, lal xeyo'w la chwe, quinwaj c'ut chi quec'oji' wuc' jawije' ri quinec'ola wi, rech cäquil ri nu juluwem ri yo'm la. In lok'ok'em c'u la aretak c'ä majok ri u tiquiritajic ri uwächulew.

²⁵ Suc'alaj Tataxel, ri winak aj uwächulew man cäquich'ob ta wäch la. Ri in c'ut quinch'ob wäch la. We winak ri' queta'm chi ri lal xintakow la ulok.

²⁶ Ri in nu yo'm retamaxic ri bi' la chque, quinbij chi c'u na chque, rech ri lok'ok'ebal c'u'x la chwe cäc'oji' na cuc' are' xukuje' rech quinc'oji' in cuc' are'.”