Ri Xuan 16 - Quiché Bible

¹ “We jastak ri' nu tzijom chiwe, rech man quixtzak taj.

² Quixesax na bic pa tak ri ja ri cäquitijoj wi quib ri aj judeyib che ri pixab. Cäpe c'u na ri k'ij, aretak apachin ri quixquicämisaj, cäquichomaj wa' chi patanijic wa' che ri Dios.

³ We jastak ri' quequiban na, rumal rech chi man cäquich'ob ta u wäch ri Tataxel, mawi cäquich'ob nu wäch in.

⁴ Are c'u we jastak ri' nu tzijom chiwe, rech aretak copan we k'ijol, cänataj na chiwe chi nu bim chi ulok chiwe. We jastak ri' man xinbij ta chiwe kas pa ri tiquiritajic, rumal rech chi c'ä in c'o iwuc'.”

Ri cuban ri Ruxlabal ri Dios

⁵ “Chanim ri' quinbe ruc' ri' ri xinutak ulok. Man c'o ta c'u jun chiwe cäc'otow nu chi': ‘¿Jawije' ri cabe wi la?’

⁶ Xane' rumal rech chi nu tzijom we jastak ri' chiwe, xnojisax ri iwanima' che bis.

⁷ Ri in c'ut quinbij ri kastzij chiwe: Are c'o quiwechbej na chi quinbec. We ta c'u ma ta quinbec, ri Cucu'bisaj i C'u'x man cäpe ta ri' iwuc'. We c'u quinbec, quentaka ulok ri are' iwuc'.

⁸ Aretak cäpe ri are', culuc'utu' na chquiwäch ri winak re e aj uwächulew ri qui mac, ri suq'uilal xukuje' ri k'atan tzij.

⁹ Ri macaj cac'utun na rumal rech chi man quecojon ta chwe in;

¹⁰ ri suq'uilal, chiquinbe ruc' ri Tataxel, man quiniwil ta chi c'ut,

¹¹ ri k'atan tzij, chi c'okotajinak chic ri catakan puwi' we uwächulew ri'.

¹² C'ä c'o q'ui jastak wuc' che u bixic chiwe. Camic c'ut man quixcuin taj che qui ch'ijtajic.

¹³ Aretak c'ut cäpe ri Uxlabaxel ri kastzij, are quelc'amow na i be pa ronojel ri kastzij. Man queltzijon ta c'u na pa re wi, xane' culutzijoj na ri cutatabej, quebulutzijoj na chiwe ri jastak ri quepe na.

¹⁴ Ri are' cunimarisaj na nu k'ij, rumal rech chi cuc'am c'u na ulok rech ri wech in, culutzijoj na chiwe.

¹⁵ Ronojel ri c'o ruc' ri Tataxel, wech in. Rumal c'u wa' xinbij chiwe chi cuc'am na ulok rech ri wech in, culutzijoj na chiwe.”

¹⁶ Xa' jubik' cäraj man quiniwil ta chic, coc'ow c'u na jubik' quiniwil chi na.”

Ri bis cux na quicotemal

¹⁷ Jujun c'ut chque ri u tijoxelab xquibila' chbil quib: “¿Jas wa' ri cubij chke?: ‘Xa' jubik' cäraj, man quiniwil ta chic, coc'ow c'u na jubik', quiniwil chi na.’ ¿Jas wa' ri cubij?: ‘Quinbe ruc' ri Tataxel.’ ”

¹⁸ Xquibij: “¿Jas wa' ri cubij: ‘Ri xa jubik'’? Man keta'm taj jas ri cutzijoj.”

¹⁹ Reta'm ri Jesus chi cäcaj quequita' jujun jastak che, xubij c'u chque: “¿La cätajin quichomaj rij chixo'l ri xinbij?: ‘Xa' jubik' cäraj man quiniwil ta chic’, jumul chic, ‘coc'ow c'u na pa jubik' quiniwil chi na’.

²⁰ Kastzij, kastzij quinbij chiwe, chi quixok' na, quiban na ok'ej, e are c'ut ri winak aj uwächulew quequicot na. Pune' c'u ri ix ix c'o pa bis, ri i bis caq'uextaj na pa quicotemal.

²¹ Aretak jun ixok quealc'ualanok, c'o u bis, petinak c'u ri u k'ijol. Aretak ralam chi c'u ri ac'al, ri u c'axc'olil man cänataj ta chi che, rumal rech ri u quicotemal chi xalax jun ac'al cho ri uwächulew.

²² Xukuje' ri ix camic c'o i bis. Quinwil chi c'u na i wäch jumul, cäquicot c'u na ri iwanima', ri man c'o ta c'u jun quesan ta na chiwe.

²³ Pa ri k'ij ri' man c'o ta chi quic'ot wi na nu chi'. Kastzij, kastzij quinbij chiwe, chi ronojel ri quitz'onoj che ri Tataxel pa ri nu bi', cuya' na chiwe.

²⁴ C'ä camic man c'o ta jas i tz'onom che pa ri nu bi'. Chixtz'ononok, quic'am c'u na rech cätz'akatisax ri i quicotemal.”

Ri Jesus ch'äcaninak puwi' ri uwächulew

²⁵ “Are c'u we jastak ri' nu tzijom chiwe pa tak c'ambal no'j. Cäpe ri k'ij aretak man quixinch'abej ta chic pa tak c'ambal no'j, xane' chi sakil quintzijoj na ri Tataxel chiwe.

²⁶ Pa ri k'ij ri' quixtz'onom na pa ri nu bi' man quinbij ta chiwe, chi ri in quinbochi'j na ri Tataxel piwi',

²⁷ kas are' c'u ri Tataxel quixulok'ok'ej, rumal rech chi inilok'ok'em i cojom c'ut chi xinel ulok ruc' ri Dios.

²⁸ Xinel ulok ruc' ri Tataxel, xinul cho ri uwächulew. Xukuje' quinya' can ri uwächulew, quinbe ruc' ri nu Tat.”

²⁹ Xquibij c'ut ri u tijoxelab che: “Chilampe la, camic kas catzijon la chi sakil, man c'o ta jun c'ambal no'j cäbij la.

³⁰ Camic cakach'obo chi eta'm la conojel ri jastak. Chi man cajwataj taj chi c'o jachin cuban c'otoj chi'aj che la. Rumal wa' cäkacojo chi lal elinak ulok ruc' ri Dios.”

³¹ Ri Jesus xutzelej u bixic chque: “¿La je ba ri' chi quixcojon camic?

³² Chiwilampe', cäpe ri jok'otaj, opaninak c'ut, aretak ri ix quituquij na iwib, chijujunal quixbe pa tak ri i c'olbal, quiniya' na can nu tuquiel. Man xa' ta c'u nu tuquiel in c'olic, c'o ri Tataxel wuc'.

³³ We jastak ri' nu tzijom chiwe, rech quirik jamaril chupam ri u junaxic iwib wuc'. Pa ri uwächulew quirik na c'axc'olil. Chijiquiba' ba' i c'u'x, ri in in ch'äcaninak puwi' ri uwächulew.”