Ri Xuan 15 - Quiché Bible

Ri juwi' uva xukuje' tak ri e u k'ab

¹ “In ri' ri kas juwi' uva, ri nu Tat are' ri josk'inel.

² Conojel ri nu k'ab ri man quewächin taj, ri are' queresaj na. Conojel ri nu k'ab ri quewächinic, ri are' quebujosk'ij rech cutakej wächinic.

³ Ri ix ix josk'im chic rumal ri tzij ri nu tzijom chiwe.

⁴ Chitakej u tikic iwib wuc', xukuje' ri in quintakej u tikic wib iwuc'. Jacha' ri jun u k'ab ri juwi' uva man cäcuin taj cäwächin pa rech wi we man tikil che ri u nimal, jeri' xukuje' ri ix man quixcuin taj quixwächinic we man ix tikil chwe.

⁵ In ri' ri juwi' uva, ix c'ut ri ix u k'ab. Jachin ri tikil chwe, xukuje' c'u ri in in tikil che, cuya' na q'ui u wächinic. We ta c'u ma ta wumal in ri ix man c'o ta jas quixcuin che u banic.

⁶ Jachin ri man tikil ta chwe, are ri' quesax apanok jas jun u k'ab che', cächaki'jar c'u na. Are wa' quemulix c'u na, queq'uiak c'u na pa ri k'ak', ri cänicowic.

⁷ We ri ix quixjeki' wuc' rech xa ix jun wuc' xukuje' ri nu tzij cäjeki' pa ri iwanima', chita' apachique ta ne jasach ri quiwaj, cäyataj na chiwe.

⁸ We sibalaj quiya' wächinic xukuje' quixux na nu tijoxelab, jeri' ri nu Tat cänimarisax u k'ij.

⁹ Jacha' ri Tataxel quinulok'ok'ej, jeri' in xukuje' quixinlok'ok'ej. Chixjekel pa ri lok'ok'ebal nu c'u'x.

¹⁰ We quinimaj ri e nu takomal, quixjeki' na pa ri lok'ok'ebal nu c'u'x, jas ri in xukuje' e nu nimam ri e u takomal ri nu Tat, in jekel pa ri lok'ok'ebal u c'u'x.

¹¹ We jastak ri' nu tzijom chiwe, rech ri nu quicotemal cäc'oji' na pa ri iwanima', rech ri i quicotemal cätz'akatic.

¹² Are wa' ri nu takomal: Chi chilok'ok'ela' iwib, jacha' ri in ix nu lok'ok'em.

¹³ Man c'o ta jun nim na u lok'ok'ebal c'u'x chuwäch wa', chi cuya' ri u c'aslemal che qui q'uexwäch ri rachil.

¹⁴ Ix ri' ri ix wachil, we quibano jas ri quixintak wi.

¹⁵ Man quinbij ta chi pataninel tak wech chiwe. Are c'u ri pataninel man reta'm taj jas ri cuban ri rajaw. Xane' quinbij wachil chiwe. Conojel c'u ri jastak ri nu tom ruc' ri nu Tat nu bim chiwe rech quiwetamaj.

¹⁶ Ri ix man xinicha' taj, xane' ri in xixincha', xixincojo rech quixbec, quiya' wächinic, cäjeki' c'u ri i wächinic, rech ronojel ri qui tz'onoj che ri Tataxel pa ri nu bi', cuya' na chiwe.

¹⁷ Are c'u wa', ri quixintak wi: Chi chilok'ok'ela' iwib.”

Ri winak aj uwächulew cäquetzelaj u wäch ri Jesus xukuje' ri e rech

¹⁸ We ri winak aj uwächulew cäquetzelaj i wäch, chiwetamaj chi nabe xquetzelaj nu wäch in.

¹⁹ “We ta ix aj uwächulew, ri winak aj uwächulew queraj ta ri' ri e rech. Man ix ta c'u aj uwächulew, xane' ix nu cha'om chquixo'l ri aj uwächulew. Rumal ri' ri winak re ri uwächulew cäquetzelaj i wäch.

²⁰ Chnataj chiwe ri tzij ri nu bim chiwe: Ri pataninel man are ta nim u k'ij chuwäch ri rajaw. We ri in xban c'ax chwe, xukuje' ri ix cäban na c'ax chiwe. We inimam ri nu tzij, xukuje' cäquinimaj ri i tzij ix.

²¹ Conojel c'u we jastak ri' queban na chiwe rumal rech ri nu bi', rumal rech chi man queta'm ta u wäch ri' ri xinutak ulok.

²² We ta ma ta xinpetic, we ta ma ta xintzijon cuc', ma ta c'o qui mac ri'. Camic c'ut man c'o ta esbal quib pa ri qui mac.

²³ Jachin ri caquetzelaj nu wäch in, xukuje' cäquetzelaj u wäch ri nu Tat.

²⁴ We ta ma ta e nu banom tak ri chac chquixo'l ri man c'o ta jun chic banowinak, ma ta c'o qui mac ri'. Camic c'ut quilom chic ri nu chac, xukuje' cäquetzelaj nu wäch xukuje' cäquetzelaj u wäch ri nu Tat.

²⁵ Cabantaj c'u wa' rech quetz'akatisax na ri tzij ri tz'ibatal chupam ri qui pixab: Xquetzelaj nu wäch, man c'o ta jasche.

²⁶ Aretak c'u cäpe ri cucu'bisaj c'uxaj, ri quintak na ulok chiwe, ri aj nu Tat, ri Uxlabaxel aj kastzij ri quel ulok ruc' ri nu Tat, are' ri' cuk'alajisaj na chwij.

²⁷ Xukuje' ri ix quixk'alajisan na, rumal rech chi ix c'olinak c'u wuc' kas pa ri tiquiritajic.”