Ri Xuan 14 - Quiché Bible

Ri Jesus are ri be rech quebopan ri winak ruc' ri Tataxel

¹ “Masach ri i c'u'x. Chixcojon che ri Dios, xukuje' chixcojon chwe in.

² Cho rachoch ri nu Tat e c'o q'uialaj c'olbal ri quixc'oji' wi. We ta ma ta jeri', nu bim ta ri' chiwe. Quinbe c'ut che u suc'umaxic c'olbal chiwe.

³ We c'u quinbe che u suc'umaxic c'olbal chiwe, quinpe chi na, quixinc'am c'u na bic wuc', rech jawije' ri quinc'oji' wi, xukuje' ri ix chila' quixc'oji' wi na.

⁴ Ri quinbe wi, iweta'm ri be.”

⁵ Xubij ri Max che: “Kajaw, man keta'm taj jawije' ri cabe wi la. ¿Jas ta c'u cäkabano cäketamaj ri be?”

⁶ Ri Jesus xubij che: “In ri' ri be, ri kastzij, ri c'aslemal. Man c'o ta jun copan ruc' ri Tataxel, we ta ma ta wumal in.

⁷ We ri ix quich'ob nu wäch in, xukuje' quich'ob na u wäch ri' ri nu Tat. Kas camic quich'ob u wäch ri are', iwilom c'u u wäch.”

⁸ Xubij ri Pelip che: “Kajaw, c'utu' la ri Tataxel chkawäch, cuban c'u wa' chke.”

⁹ Ri Jesus xubij che: “Q'ui k'ij chic in c'o iwuc'. ¿La ma ta a ch'obom nu wäch, Pelip? Jachin ri rilom nu wäch in, rilom u wäch ri Tataxel. ¿Jas c'u che cabij at: ‘C'utu' la ri Tataxel chkawäch?’

¹⁰ ¿La ma ta cacojo chi ri in xa' in jun ruc' ri Tataxel, xukuje' ri Tataxel xa jun wuc'? Ri tzij ri quinbij chiwe, man quebenbij taj pa we wi. Ri Tataxel ri jekel pa ri in, are' cäbanow ri e u chac.

¹¹ Chinicojo' chi ri in xa in jun ruc' ri Tataxel xukuje' ri Tataxel xa jun wuc'. We man quixcojonic jeri', chinicojo' rumal ri chac ri quinbano.

¹² Kastzij, kastzij quinbij chiwe: Ri jun ri cäcojon chwe in, are ri' cäbanow na ri chac ri quinban in, cuban c'u na nimak tak jastak chuwäch ri quinban in, rumal rech chi ri in quinbe ruc' ri Tataxel.

¹³ Ronojel c'ut ri qui tz'onoj pa ri nu bi', in quinban na, rech rumal ri C'ojolaxel cac'utun ri u juluwem ri Tataxel.

¹⁴ We c'o jas quita' pa ri nu bi', ri in quinban na.”

Xubij ri Jesus xuchi'j u takic ulok ri Ruxlabal ri Dios

¹⁵ “We quinilok'ok'ej, quebinimaj na ri' ri e nu takomal.

¹⁶ In quinbochi'j na ri Tataxel, ri are' cuya' na jun cu'bisal c'uxaj chic chiwe, rech cäc'oji' na iwuc' amak'el.

¹⁷ Are wa' ri Uxlabaxel re ri kastzij. Ri e aj uwächulew man quecuintaj caquic'amowaj, rumal rech chi man cäquil taj mawi queta'm u wäch; are c'u ri ix iweta'm u wäch. Ri are' jekel c'u iwuc', cäc'oji' na pa iwanima'.

¹⁸ Man quixinwonoba' ta canok; Quinpe chi na iwuc'.

¹⁹ Xa jubik' chic, ri winak aj uwächulew man quinquil ta chic. Are c'u ri ix kas quiniwil wi. Rumal rech chi in c'aslic, ri ix xukuje' quixc'asi' na.

²⁰ Pa ri k'ij ri' ri ix qui ch'ob na chi ri in in c'o pa ri nu Tat; are c'u ri ix, pa ri in; xukuje' c'u ri in pa ri ix.

²¹ Jachin ri c'o ri nu takomal ruc', ri u nimam c'ut, are ri' ri quinulok'ok'ej. Jachin c'ut ri quinulok'ok'ej, ri are' cälok'ok'ex na rumal ri nu Tat, ri in quinlok'ok'ej c'u na, quinc'ut c'u na wib chuwäch.”

²² Xubij ri Juds che, man are ta ri Iscariot: “Kajaw, ¿Jas c'u che cäc'ut na ib la chkawäch uj, man chquiwäch ta c'u conojel ri winak?”

²³ Ri Jesus xubij che: “We c'o jachin quinulok'ok'ej, cunimaj ri nu tzij; cälok'ok'ex c'u na rumal ri nu Tat, cujpe c'u na ruc', cujjeki' na ruc'.

²⁴ Ri man quinulok'ok'ej taj, are jun ri' ri man cunimaj taj ri nu tzij. Ri tzij ri i tom, man wech ta in, xane' rech ri Tataxel ri xinutak ulok.

²⁵ We jastak ri' nu tzijom chiwe, aretak c'ä in c'o iwuc'.

²⁶ Ri cucu'bisaj c'uxaj, are' ri Ruxlabal ri Dios, ri cutak na ulok ri Tataxel pa ri nu bi', are ri' quixutijoj na chque conojel ri jastak, cunataj na chiwe ronojel ri nu bim chiwe.

²⁷ Ri jamaril quinya' can chiwe. Ri nu jamaril quinya' chiwe. Man je ta c'u u ya'ic quinya' chiwe jacha' ri u ya'ic ri caquiya' ri e aj uwächulew. Mäk'oxow ri iwanima', mawi muxe'j rib.

²⁸ I tom jas ri xinbij chiwe: Quinbec, quinpe c'u iwuc'. We ta quinilok'ok'ej, xixquicot ta ri' chi quinbe ruc' ri Tataxel, rumal rech chi ri Tataxel nim na u k'ij chnuwäch.

²⁹ Nu bim apan chiwe camic, aretak c'ä majok cäbanic, rech aretak chbanic, quicoj na.

³⁰ Man quintzijon ta chi na q'ui k'ijol iwuc'. Cätajin c'u copan ri u nimal we uwächulew ri'. Man c'o ta c'u u takanic panuwi' in.

³¹ Xane' rech cäquetamaj ri winak aj uwächulew chi ri in quinlok'ok'ej ri Tataxel, jacha' c'u ri takanic ri xuya' ri Tataxel chwe, jeri' quinbano. Chixwalijok, chujel bic waral.”