Ri Xuan 10 - Quiché Bible

Ri ajyuk' rachil ri e u chij

¹ “Kastzij, kastzij quinbij chiwe: Ri jun ri man coc ta chupam ri roquibal ri quewar wi ri chij, xane' pa jun chi wi ri cäpaki' wi, eläk'om ri', xukuje' ch'ayanel eläk'om.

² Are' c'ut ri coc pa ri oquibal, cajyuk' ri chij wa'.

³ Ri chajinel cujak ri oquibal chuwäch ri are'. Ri chij cäquita' ri u ch'abal. Ri are' quebusiq'uij ri u chij che ri qui bi', queresaj c'u bic.

⁴ Aretak e resam chi bic conojel ri e rech, cänabej na chquiwäch. Ri chij queteri chrij, rumal rech chi queta'm ri u ch'abal.

⁵ Man c'u queteri ta chrij ri jun chiwi ri man cäquich'ob ta u wäch, xane' quebanimaj chuwäch. Man queta'm ta c'u ri qui ch'abal ri e jule' chi wi.”

⁶ Ri Jesus xubij we c'ambal no'j ri' chque. Ri e are' c'ut man xquich'ob taj jas ri xutzijoj chque.

Ri Jesus are' ri utzalaj ajyuk'

⁷ Xubij chi c'u ri Jesus jumul: “Kastzij, kastzij quinbij chiwe: In ri' ri oquibal ri quek'ax wi ri chij.

⁸ Conojel ri xepe can nabe chnuwäch in, e eläk'omab, xukuje' ech'ayanelab tak eläk'omab. Man xetatabex ta c'u cumal ri chij.

⁹ In ri' ri oquibal. We c'o jachin coc pa ri in, cäcolotaj na. Coc na ulok, quel na bic, curik na recha'.

¹⁰ Ri eläk'om xuwi cäpetic che eläk'anic, che cämisanic, xukuje' che sachan wächaj. Ri in in petinak rech cäc'oji' qui c'aslemal, c'aslemal ri sibalaj q'ui.

¹¹ In ri' ri utzalaj ajyuk'. Ri utzalaj ajyuk' cuya' ri u c'aslemal rumal quech ri u e chij.

¹² Are c'u ri xa' tojom, ri man are' ta cajyuk', ri man e rech ta ri chij, xak cäca'y ri' che ri utiw cäpetic, quebuya' can ri chij, canimaj c'ut. Ri utiw quebuchap ri chij, quebutuquij c'ut.

¹³ Je c'u ri' ri xa' tojom canimajic, rumal rech chi xa' tojom, man querilij ta ri chij.

^14-15 In ri' ri utzalaj ajyuk'. Quinch'ob c'u qui wäch ri nu chij, ri e wech cäquich'ob nu wäch, jacha' ri nu Tat cuch'ob nu wäch in, xukuje' jacha' ri in quinch'ob u wäch ri Tataxel. Quinya' c'u ri nu c'aslemal rumal quech ri chij.

¹⁶ E c'o chi c'u niq'uiaj nu chij, ri man e rech ta we warabal ri'. E are c'u ri' xukuje' rajawaxic quebenc'ama' na ulok. Cäquitatabej na ri nu ch'abal. Cäc'oji' na xa' jumulaj chij, xukuje' xa' jun ajyuk'.

¹⁷ Rumal rech wa' quinulok'ok'ej ri Tataxel, chi ri in quinya' ri nu c'aslemal, che u c'amic chic.

¹⁸ Man c'o ta jun quesan chwe, xane' in quinyo'w pa we wi. C'o pa nu k'ab ri u ya'ic ri nu c'aslemal, xukuje' c'o pa nu k'ab ri u c'amic chic. We takanic ri' xinc'am che ri nu Tat.”

¹⁹ Jumul chic, aretak ri aj judeyib xquita' we tzij ri', man junam ta ri qui chomanic che.

²⁰ E q'ui chque xquibij: “Itzel uxlabal c'o che, ch'ujarinak. ¿Jasche quitatabej?”

²¹ Niq'uiaj chic xquibij: “We tzij ri' man e rech ta jun ri c'o itzel uxlabal che. ¿La cäcuin lo jun itzel uxlabal che qui jakic ri qui bak'wäch ri moyab?”

Ri aj judeyib man xecojon ta che ri Jesus

²² Chi' c'ut coc'owisax ri nimak'ij pa Jerusalen che u nataxic ri u yaquic ri rachoch Dios. Pa ri k'ij re ri tew c'u ri'.

²³ Ri Jesus cäbin pa ri rachoch Dios, pa ri u rakan ja ri Salomon.

²⁴ Ri aj judeyib c'ut xquisutij rij, xquibij che: “¿C'ä jampa' xak cuban quieb ka c'u'x chawe? We at ri' ri Crist, chabij chke ruc' sakil.”

²⁵ Ri Jesus xutzelej u bixic chque: “Nu bim chic chiwe, man quicoj ta c'ut. Ri chac ri quinban pa ri u bi' ri nu Tat, e are wa' quek'alajisan ri nu banic.

²⁶ Are c'u ri ix man quicoj taj, rumal rech chi man ix ta jujun chque ri nu chij.

²⁷ Ri e nu chij cäquitatabej ri nu ch'abal. Ri in quinch'ob qui wäch, ri e are' queteri chwij.

²⁸ In quinya' junalic c'aslemal chque. Mawi jumul cäsach na qui wäch chbe k'ij sak. Man c'o ta jun quetokin na pa nu k'ab.

²⁹ Ri nu Tat, ri xebuya' chwe, nim na chquiwäch conojel. Man c'o ta c'u jun cäcuin che qui tokixic pa u k'ab ri Tataxel.

³⁰ Ri in ruc' ri Tataxel xa uj jun.”

³¹ Jumul chic ri aj judeyib xquic'am abaj che u cämisaxic.

³² Ri Jesus xubij chque: “Q'ui utzalaj tak u chac ri Tataxel xebenc'ut chiwäch; ¿Jas rumal ri nu chac quinicämisaj che abaj?”

³³ Ri aj judeyib xquibij che: “Man rumal ta rech jun utzalaj chac catkacämisaj che abaj, xane' rumal rech chi cawetz'bej u wäch ri Dios, xukuje' rumal rech chi ri at, at winak, cajaluj awib chi at Dios.”

³⁴ Ri Jesus xubij chque: “¿La ma ta tz'ibatal pa ri i pixab: ‘In xinbij: Ri ix ix diosib?’

³⁵ Are ri Tz'ibatalic man cuya' taj catuquixic, cubij c'u diosib chque ri winak ri xopan wi ri u tzij ri Dios,

³⁶ we ri Tataxel xinutaso in, xinutak ulok cho we uwächulew ri', ¿Jas c'u che quinitzujuj chi quinban wib chi in Dios rumal rech ri xinbij chi in u C'ojol ri Dios?

³⁷ We man quinban ri u chac ri nu Tat, mixcojon chwe.

³⁸ We c'u quinbano, pune' man quixcojon chwe in, chixcojon chque ri nu chac, rech quiwetamaj xukuje' quich'obo chi ri Tataxel c'o pa ri in are c'u ri in in c'o pa ri Tataxel.”

³⁹ C'äte ri', jumul chic xquitzucuj u chapic ri Jesus. Xel c'u bic pa qui k'ab.

⁴⁰ Xbec, xopan chi jumul ch'käp che ri nima' Jordan, pa ri c'olbal ri xc'oji' wi ri Xuan nabe pa ri chaplebal cuban ri qui bautism ri winak, xcanaj can chila'.

⁴¹ E q'ui xebopan ruc', xquibij: “Pune' ri Xuan man c'o ta jun etal xubano, ronojel ri xubij chrij we achi ri', are kastzij.”

⁴² E q'ui c'u ri xecojon che ri Jesus chila'.