Ri Xuan 1 - Quiché Bible

Ri u tzij ri Dios xuc'am u ti'jal winak

¹ Pa ri chapletajic c'o ri Tzij, ri Tzij c'o ruc' ri Dios, xukuje' ri Tzij are' Dios.

² Ri are' c'o pa ri chapletajic ruc' ri Dios.

³ Conojel ri jastak rumal are' xebanic. Man c'o ta jun chque ri jastak ri e banom, ri ma ta xban rumal are'.

⁴ Pa ri are' c'o wi ri c'aslemal, ri c'aslemal are ri u chäj ri winak.

⁵ Ri chäj cäjuluw pa ri k'eku'm, ri k'eku'm man xuchup taj.

⁶ Xc'oji' jun achi takom ulok rumal ri Dios, Xuan u bi'.

⁷ Are' xpe che u ya'ic k'alajisanic rech cuk'alajisaj ri chäj, rech conojel winak quecojon rumal are'.

⁸ Ri are' man are ta ri chäj, xane' c'o che u k'alajisaxic ri chäj.

⁹ Ri kas chäj, ri cätunun paquiwi' conojel ri winak, ulinak c'u cho ri uwächulew.

¹⁰ Cho ri uwächulew c'o wi, ri uwächulew xban rumal. Ri winak c'ut ri e c'o cho ri uwächulew man xquich'ob ta u wäch.

¹¹ Xul cho ri rulew, ri e rech man xquic'amowaj taj.

¹² Conojel c'ut ri xec'amowic, ri quecojon che ri u bi', xuya' ri c'olbal chque chi quebux ralc'ual ri Dios.

¹³ Ri e are' man e alc'ualam ta rumal quic', mawi rumal qui rayibal ri ti'jal, mawi rumal u rayibal jun achi, xane' e alc'ualam rumal ri Dios.

¹⁴ Ri Tzij xuc'am ri qui banic winak, xc'oji' chkaxo'l. Xkil ri u juluwem, jacha' ri u juluwem ri xa jun chi C'ojolaxel ri elinak ulok ruc' ri Tataxel, nojinak che tok'ob xukuje' kastzij.

¹⁵ Ri Xuan are' xuk'alajisaj chrij ri C'ojolaxel, co xch'awic, xubij: “Are wa' ri xintzijoj aretak xinbij: ‘Ri jun ri petinak chwij, nim na u k'ij chnuwäch. Are' c'u nabe can chnuwäch.’ ”

¹⁶ Konojel uj kac'amom ke ri u nojiquil, xukuje' tewichibal puwi' tewichibal.

¹⁷ Ri pixab xya' rumal ri Moises, are c'u ri tok'ob xukuje' ri kastzij rumal ri Jesucrist.

¹⁸ Mawi jubik' c'o ta jun ilowinak ta u wäch ri Dios; are' c'u ri xa' jun chi C'ojolaxel, ri c'o pa uxcut ri Tataxel, are' ri xk'alajisanic.

Ri Xuan Bautist xutzijoj ri Jesucrist

¹⁹ Are' wa' ri u k'alajisanic ri Xuan, aretak ri aj judeyib ri e c'o pa Jerusalen xequitak bic e cojol tabal tak tok'ob cuc' ri aj levitib che u ta'ic che: “¿Jachin c'u ri at?”

²⁰ Ri Xuan xuk'alajisaj, man xresaj ta rib chupam, xk'alajisan c'ut, xubij: “Man in taj ri Crist.”

²¹ Ri e are' xquic'ot u chi': “¿Jachin c'u ri at? ¿La at ri Eliy?” Xubij: “Man in taj.” “¿La at ri K'axal Tzij?” Xubij chque: “Jayi'.”

²² Xquibij chi c'ut che: “¿Jachin c'u ri at? rech quekabij chque ri xujquitak ulok. ¿Jas cabij at chbil awib?”

²³ Ri Xuan xubij: “In ri' ri ch'abal ri curak u chi' chupam ri chaki'j uwo sak, ri cubij: ‘Chicolomaj ri u be ri Ajawaxel’, jas ri xubij ri Isaiy ri k'axal tzij.”

²⁴ Ri e takom ulok e are jujun chque ri pariseyib.

²⁵ Xquic'ot u chi': “¿Jas c'u che cäban ri qui bautism ri winak, we man at ri' ri Crist, mawi ri Eliy, mawi ri K'axal Tzij?”

²⁶ Ri Xuan xutzelej u bixic chque, xubij: “Ri in quinban ri bautism pa ri ja'. C'o c'u jun tac'al chxo'l alak, ri man eta'm ta alak u wäch.

²⁷ Are c'u wa' ri petinak chwij. Man takal ta chwe chi quinquir ri ximibal re ri u xajäb.”

²⁸ Are we jastak ri' xeban pa Betan, ch'käp che ri nima' Jordan, jawije' ri xuban wi ri qui bautism ri winak ri Xuan.

Ri Jesus are ri alaj u chij ri Dios

²⁹ Chucab k'ij chic ri Xuan xril ri Jesus cätajin cäpe ruc', xubij “Chiwilampe', ri Alaj u Chij ri Dios, ri cäresaj ri qui mac ri winak.

³⁰ Are' wa' ri xintzijoj aretak xinbij: ‘Petinak jun achi chwij ri nim na u k'ij chnuwäch, rumal rech chi are' nabe can chnuwäch.’

³¹ Ri in nabe man weta'm ta u wäch. Rech cäc'utunisax chquiwäch ri aj israelib, xinpe c'ut, xinban ri qui bautism ri winak pa ri ja'.”

³² Ri Xuan xk'alajisanic, xubij: “Xinwil ri Uxlabaxel cätajin cäkaj ulok pa ri caj je ta ne ri u banic jun palomax, xc'oji' puwi'.

³³ Ri in man weta'm ta u wäch, are' c'ut ri xintakowic chi quinban ri bautism pa ri ja', wa' xubij chwe: ‘Jachin puwi' cawil wi chi cäkaj wi ri Uxlabaxel cabeytaj c'u puwi', are' wa' ri cäcojow ri winak pa ri Ruxlabal ri Dios.’

³⁴ In wilom, xukuje' nu k'alajisam, chi are' wa' ri u C'ojol ri Dios.”

Ri nabe tak e u tijoxelab ri Jesus

³⁵ Chucab k'ij c'o chi jumul ri Xuan chi' e rachil quieb chque ri u tijoxelab.

³⁶ Xca'y c'u apan che ri Jesus cätajin cäbin apanok, xubij: “Chiwilampe' ri Alaj u Chij ri Dios.”

³⁷ Aretak ri quieb u tijoxelab ri Xuan xquita' ri xubij, xquiterenej bic ri Jesus.

³⁸ Ri Jesus xutzolk'omij rib, xerilo chi e terenic, xubij chque: “¿Jas quitzucuj?” Xquibij che: “Rabi” (je quel wa' pa ri ka ch'abal: Ajtij), “¿jawije' ri jekel wi la?”

³⁹ Xubij chque: “Tisaj, chiliwila'.” Xebec c'ut, xquilo jawije' ri jekel wi, xecanaj can ruc' pa ri k'ij ri'. Chunakaj c'ut ri ucaj rajilabal ri benak k'ij.

⁴⁰ Ri Trix, rachalal ri Simon Lu', are' jun chque ri quieb ri qui tom jas ri xubij ri Xuan xukuje' ri xeteri bic chrij ri Jesus.

⁴¹ Ri are' nabe xurik apan ri Simon ri rachalal, xubij che: “Xkarik ri Mesiy” (je quel wa' pa ka ch'abal: ri Crist.)

⁴² Chanim ri Trix xuc'am ulok ri Simon ruc' ri Jesus. Ri Jesus xrilo, xubij che: “At ri' ri Simon, u c'ojol ri Xuan. Cäbix c'u na Seps chawe.” (“Seps” je quel wa' “jun abaj”).

Ri Jesus xebusiq'uij ri Pelip xukuje' ri Natanael

⁴³ Chucab k'ij ri Jesus xuchomaj xbe pa Galiley. Xurik c'u ri Pelip, xubij che: “Chinaterenej.”

⁴⁴ Ri Pelip are' aj Betsaid, qui tinimit ri Trix xukuje' ri Lu'.

⁴⁵ Ri Pelip xurik ri Natanael, xubij che: “Xkarik ri jun ri xtz'ibam ri Moises chrij chquipam ri wuj re ri pixab, ri xukuje' xetz'ibam ri e k'axal tak tzij chrij. Are' ri Jesus, u c'ojol ri Jose aj Nazaret.”

⁴⁶ Xubij ri Natanael che: “¿La cuya' ta c'u lo quel ulok jun utzalaj jasach pa Nazaret?” Xubij ri Pelip che: “Tasaj, chalawilampe'.”

⁴⁷ Aretak ri Jesus xril ri Natanael cätajin copan ruc', jewa' xubij chrij: “Chiwilampe' jun kas aj israel, ri man c'o ta wi subunic.”

⁴⁸ Xubij ri Natanael che: “¿Jawije' xetamaj wi la nu wäch?” Ri Jesus xubij che: “C'ä majok chatusiq'uij ulok ri Pelip, aretak at c'o chuxe' ri u che'al higo, xatinwilo.”

⁴⁹ Ri Natanael xubij che: “Ajtij, lal ri' ri u C'ojol ri Dios. Lal ri' ri Rajawinel ri Israel.”

⁵⁰ Ri Jesus xubij che: “¿La catcojonic rumal rech chi xinbij chawe chi xatinwil chuxe' ri u che'al higo? Quebawil na jastak ri sibalaj e nimak na chuwäch wa'.”

⁵¹ Ri Jesus xubij c'u che: “Kastzij, kastzij quinbij chiwe: Quiwil na ri caj jakalic, xukuje' ri e tako'n aj caj re ri Dios quexuli ulok, quepaki' bic puwi' ri Rija'l Winak.”