Ri Tzijonel 8 - Quiché Bible

¹ ¿Jachin ta ri cacuinic cujunamaj ta rib ruc' ri ajno'j? ¿Jachin ta ri reta'm ri quel quequibij ri jastak? Ri no'j cutunuj ri u palaj ri winak; cuban che chi cuq'uex ri cowilaj u palaj.

Ri nimanic che ri ajawinel

² Chebatz'akatisaj ri e u takanic ri ajawinel, je c'u chi'nic wa' ri kas cäban na, wa' a bim chuwäch ri Dios.

³ Nojimal catel ulok chuwäch, manim awib che qui banic itzel tak jastak, rumal rech chi ri are' cacuinic cubano jachique ri cäraj.

⁴ Ri xubij ri ajawinel man c'o ta caq'uexowic, man c'o ta c'u jachin jun cacuinic cubij ta che chi chubij che jas ri cätajin cubano.

⁵ Che ri cutz'akatisaj u banic jun takanic man c'o ta jun etzelal cuc'ulmaj na, are' c'u ri c'o u no'j cuch'obo jampa' xukuje' jas cuban che u tz'akatisaxic.

⁶ Kastzij, c'o jun jok'otaj xukuje' jun u banic ronojel ri cäbanic, are c'u ri nimalaj latz' che ri winak

⁷ chi ri are' mawi jubik' reta'm ri quec'ulmatajok, mawi c'o ta jachin jun ri cacuin ta che u bixic che.

Man c'o ta jun c'o u cuinem puwi' ri c'aslemal xukuje' ri cämical

⁸ Man c'o ta jachin jun ri c'o ta u cuinem puwi' ri c'aslemal, jacha' ri cacuin ta che u k'ilic, mawi c'o xukuje' jachin ta c'o u cuinem puwi' ri cämical. Man c'o ta c'u jachin jun ri ma ta coc chupam we tijoj chuk'ab ri'. Ri banal etzelal man cäto' taj rumal ri retzelal.

⁹ Ronojel wa' wilom aretak kas xinjach wib che retamaxic ri caban cho we uwächulew ri' xukuje' ri cuinem ri c'o ruc' ri winak che u banic c'ax che ri rajil u tz'akat.

E c'o jastak ri man c'o ta qui beya'l

¹⁰ Xukuje' wilom chi ri winak ri itzel ri xunajtajisaj rib che ri tastalicalaj c'olbal, cäya' u k'ij pa ri k'ij aretak cämukic; chupam c'ut ri tinimit jawije' ri xuban wi ri etzelal, man c'o ta chi jun cänatan ta chi na. Wa' man c'o ta u beya'l,

¹¹ we c'u man cäc'äjisax taj u wäch ri etzelal, cäya' be che ri winak xuwi cuchomaj u banic ri lawaloyil.

¹² ¡Ri quel wi wa' chi ri cämacunic cutakej c'u macunic sibalaj q'ui junab cac'asi' na! (Ri weta'm cänok in chi ri nim cäquil wi ri Dios xukuje' caquina' quib chuwäch, utz caquitaklebej;

¹³ e are' c'ut, ri e banal tak etzelal itzel caquitaklebej coc'ow c'ut ri qui c'aslemal jacha' jun mumu'j rumal rech chi man caquina' ta quib chuwäch ri Dios.)

¹⁴ We jewa' ri cac'ulmataj cho we uwächulew ri' chi man c'o ta u beya'l chi ri utzalaj tak winak caquirik c'ax e jacha' ta ne e itzel tak winak, xukuje' ri itzel tak winak ri quequicotic e jacha' ta ne e utzalaj tak winak. ¡In quinbij chi xukuje' wa' man c'o ta u beya'l!

¹⁵ Rumal ri' quinbij chi are utz na ri jajatem. Are c'u ri utz na ri cäcuin ri winak che u banic cho we uwächulew ri' are ri wa'im, ri uq'uianic xukuje' chuquicotisaj rib, xuwi c'u wa' cäcanaj ruc' che ri u chac pa tak ri k'ij re ri u c'aslemal ri cuya' ri Dios che cho we uwächulew ri'.

¹⁶ Aretak sibalaj xinjach na wib che retamaxic che u ch'obic xukuje' che u ca'yexic ronojel ri cäban cho we uwächulew ri'. Copan ri jok'otaj aretak jun man cacuintaj cäwar ta jubik'.

¹⁷ Sibalaj c'u xincuin che u ch'obic chi ri winak man cacuin ta che u ch'obic ri cuban ri Dios mawi ri cac'ulmataj cho we uwächulew ri'. Pune' ta sibalaj cucoj u chuk'ab cutzucuj taj ri tzelebal u wäch, man curik ta wi pune' ta ne cubij ri ajno'j chi reta'm u wäch kastzij man cuininak ta che u rikic.