Ri Tzijonel 7 - Quiché Bible

Are utz na u ya'ic u k'ij ri c'o u patan

¹ Are utz na ri utzalaj tzijol chuwäch ri utzalaj c'oc'al. Are utz na ri k'ij re cämical chuwäch ri k'ij re alanic.

² Are utz na ri benam ruc' ri cäminak chuwäch ri benam pa nimak'ij; ri cämical are q'uisbal u c'aslemal ronojel winak, e are' c'ut ri e c'aslic rajawaxic ta ri' u nataxic cumal.

³ Are utz na ri ok'enic chuwäch ri t, cäraj ne caretzelaj ri palajaj utz c'u cuban na che ri anima'aj.

⁴ Ri c'o u no'j cuchomaj rij ri cämical are c'u ri man c'o ta u no'j, are ri u bic che u quicotisaxic rib.

⁵ Are utz na qui tatabexic ri qui pixbenic ri ajno'jab che u q'uexwäch ri qui tatabexic ri qui bixonic ri man c'o ta qui no'j.

⁶ Ri e u tze' ri man c'o ta u no'j quejunamataj cuc' ri qui kuch'uch'ic ri xic'ay q'uix pa ri k'ak', xukuje' wa' man c'o ta u beya'l, xak lok'.

⁷ Ri tokinic cuconorisaj ri ajno'j, xukuje' ri banoj u pa k'abaj cuchuwirisaj ri u chomabal.

⁸ Are utz na ri u q'uistajic u banic jun jasach chuwäch ri u chaplexic. Are utz na ri u cojic ri coch'onic che u q'uexwäch ri cucoj ri chuk'ab.

⁹ Maya' awib chi catumajij ri oyowaric, rumal rech chi ri oyowaric are wa' ri kas c'o ruc' ri winak ri man c'o ta u no'j.

¹⁰ Mawi jumul chac'oto' ta a chi' jasche ronojel ri k'ijol ri oc'owinak are utz na, jun c'otoj chi'aj c'u wa' ri man cac'oxoman taj.

¹¹ Utz xukuje' c'o quechbex che ri no'j cumal ri quejeki' cho we uwächulew ri', we c'u ne achilatal na rumal jun echbal.

¹² Rumal rech chi ri no'j are jun to'bal ib junam ruc' ri puak, are c'u ri no'j c'o na ri u jalbem rib che u ya'ic u c'aslemal ri ajno'j.

¹³ Kas chatoc il che rilic ri u banom ri Dios: ¿Jachin ta lo ri cäcuin ta che u colomaxic ri u jech'obisam ri are'?

¹⁴ Aretak c'u utz at benak, chatquicot chupam we utzil ri'; aretak c'u man utz ta catelic chachomaj chi ri jun xukuje' ri jun chic pa u k'ab ri Dios e c'o wi, ri winak mawi jubik' reta'm ri petinak puwi'.

¹⁵ Ronojel wa' wilom chupam ri man c'o ta u beya'l, xak lok' are' c'u nu c'aslemal wa': utzalaj tak achijab ri quecämic pune' c'o sibalaj cutzil, xukuje' itzel tak winak ri e banal tak etzelal q'ui junab quec'asi'c.

¹⁶ Matux sibalaj at utz, mawi ta sibalaj at ta nawinel. ¿Jas ta che xak ta cäretzelaj rib jun pa rech wi?

¹⁷ Matux sibalaj itzel winak, mawi matux sibalaj at con. ¿Jas ta che catcäm chanim c'amajok copan ri a k'ijol?

¹⁸ Ri utz na are ri utzalaj u chapic wa' matzokopij c'u bic ri c'o pa k'ab. Jachin ri man caresaj taj u q'uixbal ri Dios utz quel na pa conojel we jastak ri'.

¹⁹ C'o na ri chuk'ab ri cuya' ri no'j che ri c'o u no'j che u q'uexwäch ri caquiya' lajuj k'atal tak tzij che jun tinimit.

²⁰ Man c'o ta c'u jun cho ri uwächulew ri sibalaj ta tz'akat ri cuban ta amak'el ri utz ri mawi ta jumul ma ta cämacunic.

²¹ Maya' a xiquin che ronojel ri cabixic, je c'u ri' man coc ta pa a xiquin aretak ri pataninel awech catuyok'o.

²² Pune' c'u ne aweta'm at xukuje', chi q'ui mul a yok'om chi jule'.

U tzucuxic ri no'j

²³ Ronojel wa' xinnic'oj ruc' no'j, nu cojom c'u pa nu jolom chi quinux ajno'j; man c'u ya'tal ta u rikic wumal.

²⁴ ¡Man ya'tal ta u rikic wumal ronojel ri c'olic! ¡Sibalaj c'u naj u pam man c'o ta c'u jun cacuin ta che u ch'obic!

²⁵ Xinjach c'u wib che u rikic etamanic, che u ch'obic xukuje' quitzucuxic jujun aj no'jalaj tak q'uisbalil. Xincuin c'u che u ch'obic chi man utz ta ri man c'o ta u no'j, jun ch'ujilal c'ut ri cuban rib chi sachinak.

²⁶ Nu rikom jun jasach ri c'o na chuwäch ri cämical: ri ixok ri cucoj ri ranima' che qui cojic c'amibal ri caximan ruc' tak ri e u k'ab. Ri utz u binibal chuwäch ri Dios canimaj na chuwäch, are c'u ri cäbin pa ri mac cäkaj na pa tak ri e u c'amibal.

²⁷ Chupam ri nu tijow chuk'ab che u rikic jasche quec'ulmataj ri jastak, in ri tzijonel nu rikom wa':

²⁸ ¡Chi c'ä maja' quinrik ri kas quintzucuj! ¡Nu rikom jun achi chuxo'l jun mil, mawi c'u ne xa ta jun ixok nu rikom ta chquixo'l conojel ri ixokib!

²⁹ Xuwi c'u nu rikom ri quinya' u bixic: chi ri Dios tz'akat u banic ri winak xubano, are c'u ri winak u yojim ri u c'aslemal.