Ri Tzijonel 5 - Quiché Bible

Rajawaxic catz'akatisax ri cächi'xic

¹ Aretak catbe pa ri rachoch Dios, chachajij ri a c'aslemal: Che u q'uexwäch ri qui chi'xic tabal tak tok'ob jacha' ri cuchi'j ri winak ri man c'o ta u no'j ri e are' man caquich'ob taj chi cätajin caquiban lawaloyil, chatkebok a yo'm a tzij che nimanic.

² Maban chi'nic ruc' aninakil che ri Dios, mawi ruc' ri a chi', mawi ruc' ri a chomanic, c'o c'ut ri Dios pa ri caj are c'u ri at at c'o cho ri uwächulew. Rumal ri', chak'ila' awib che qui bixic q'ui tak tzij,

³ rumal c'u rech ri q'ui chomanic quepe c'axalaj tak ichic', xukuje' rumal c'ut ri e q'uialaj tak tzij quebix tak ch'ujilal.

⁴ Aretak caban jun chi'nic che ri Dios, mabey ri u tz'akatisaxic, rumal rech chi ri are' man utz ta queril ri man c'o ta qui no'j. Chatz'akatisaj ri cachi'j,

⁵ are utz na chi man c'o ta jas cächi'xic che u q'uexwäch ri c'o cächi'xic ri man catz'akatisax ta c'ut.

⁶ Maya' c'olbal chi ri e achi' catquikasaj pa ri macunic, cabij ta c'u chuwäch ri takom rumal ri Dios chi xa rumal sachinakil xabano. ¿Jasche cabano chi cayac royowal ri Dios rumal ri cabij cusach c'u u wäch ri a banom?

⁷ Rumal c'u ri', chquixo'l ri c'axalaj tak ichic' xukuje' e q'ui tak tzij xukuje' jastak ri man c'o ta quel caquibij, ri at rajawaxic cac'utu chi nim cawil wi ri Dios.

C'ulelanic tak pa ri c'aslemal

⁸ Mamayo chi we pa jun ulew chic cawilo chi cäban c'ax che ri meba' catokix c'ut ri suq'uilal xukuje' ri takal u banic, jun c'u nim rekle'n xch'uk u wi' rumal jun chic ri nim na rekle'n, niq'uiaj chi c'ut ri nimak chi na quekle'n quequich'uk qui wi' chic we quieb ri'.

⁹ ¡U q'uiyem ri ulew cuchi'x c'u wa' are c'u wa' ri u c'olem ri ajawinel che u patanixic ri ulew!

¹⁰ Ri culok'ok'ej ri puak, amak'el cäraj chi niq'uiaj; ri culok'ok'ej ri k'inomal mawi jubik' cucojo chi q'ui chic ri c'o ruc'. Xukuje' c'u wa' xak cawächibal, xak lok',

¹¹ we c'u e q'ui chic ri jastak e c'olic nim na ri cäsachic. ¿Jas c'ut ri cäch'ac che ri k'inomal ri c'olic, xuwi ri u ca'yexic ri c'olic rumal ri winak?

¹² Ri ajchac we catz'akat u pam o man cätz'ak taj, amak'el cawar pa jun nimalaj utzil; ri k'inom man je ta cubano, ri e u k'inomal man caquiya' ta che chi cawaric.

¹³ Jun jasach kastzij ri sibalaj bisobal wilom cho we uwächulew ri': chi ri u mulixic k'inomal cabe che u banic c'ax che ri ajchak'e,

¹⁴ jun c'u itzel ajc'ay cacuinic cuq'uistzij puwi' ronojel we k'inomal ri', we c'u ne c'o jun u c'ojol, man c'o ta chi jas c'o ruc' ri cuya' ta chi can che.

¹⁵ Je c'ut jacha' ri u petic cho we uwächulew ri', jeri' ri u bic: sibalaj ch'analic jacha' aretak xil u wäch, man c'o ta c'u jas cuc'am bic che ri u wächinic ri u chac.

¹⁶ Kastzij chi sibalaj bisobal: chi jacha' ri u petic cho ri uwächulew, jeri' xukuje' ri u bic. ¿Jas c'ut ri xresaj che ri sibalaj chac ri xuq'uis rib che u banic ri man c'o ta cupatanij?

¹⁷ Xak c'u che u tz'akatil, ronojel ri u c'aslemal xroc'owisaj pa k'ekumalil, xukuje' ruc' sibalaj latz', k'oxomal tak xukuje' nimak tak bis.

¹⁸ Nu rikom c'ut chi ri utz na xukuje' sibalaj je'l na are ri wa'im, xukuje' ri uq'uianic, xukuje' ri u quicotisaxic ib che u wächinic ri sibalaj chacunic cho we uwächulew ri' pa ri quieb oxib k'ij c'aslemal ri cuya' ri Dios chke, are c'u wa' ri ka taklebem.

¹⁹ Xukuje' che apachin ta ne ri cuya' wi q'ui k'inomal ri Dios, cuya' c'u che chi cäcuin che u tijic re chque xukuje' ri u c'amic ri ya'tal che, are c'ut ri u cojic ri u wächinic ri sibalaj chac cäpe ruc' ri Dios.

²⁰ Canojisax c'ut ri ranima' che quicotemal rumal ri Dios, man kas ta coc chi il che ri u beya'l ri u c'aslemal.