Ri Tzijonel 4 - Quiché Bible

¹ Xinya' c'u nu wäch chque ri c'axc'olil ri quec'ulmataj cho we uwächulew ri'. Xinwil c'ut chi ri banom c'ax chque quebok'ic, man c'o ta c'u jachin jun cacu'bisan ta qui c'u'x; ri e banal tak c'ax quequicoj tak chuk'ab chque, man c'o ta c'u jachin jun cacu'bisan ta qui cux.

² Rumal c'u ri' are' xinya' na qui k'ij ri k'e'tz' tak cäminakib chi are utz na quech chquiwäch ri c'ä e c'asc'oj;

³ pune' c'u are utz na quech ri c'ä maja' quebil qui wäch chquiwäch we cak'at ri', c'ä maja' c'u ne caquil ri etzelal ri caban cho we uwächulew ri'.

⁴ Xinwilo xukuje' chi ri sibalaj u q'uisic ib che u banic ri chac xukuje' aretak utz quel jun comon chac cuwalijisala' quiäk rayinic, xukuje' c'u wa' man c'o ta u beya'l, xak lok', xukuje' xa cajwax u chapic ri quiakik'.

⁵ Ri winak cubij: “Ri man c'o ta u no'j quebuk'aluj ri quieb u k'ab cusachisaj c'u u wäch chbil rib.”

⁶ Are c'u ri in quinbij: “Chi are utz na jubik' uxlanem chuwäch ri casowem che u chapic ri quiakik'.”

⁷ Aretak c'u xinca'y chi apan jela', xinwil chic jun jasach ri man c'o ta u beya'l, xak lok', pa we uwächulew ri':

⁸ Jun winak ri c'o xak u tuquiel, ri man e c'o ta rachil, mawi tak ralc'ual, mawi tak rachalal, ri mawi cuxlan ta jubik, ri kas man cäcos ta che u ca'yexic ri u k'inomal, mawi c'u ne cuc'ot ta u chi' chbil rib: “¿Jachin c'u lo che cätajin quinchacun wi? ¿Jasche quink'il ri utzil chwe?” Xukuje' ba' wa' xak cawächibal, xak jun alalaj eka'n.

Ri mulin ib cabanow ri chuk'ab

⁹ Are c'o na qui patan quieb chuwäch xa jun, are c'o na ri caquechbej che ri qui chac.

¹⁰ We jun chque cätzakic ri jun chic cuyaco. ¡Tok'ob c'u u wäch ri cätzakic ri xak u tuquiel c'olic, man c'o ta ba' jachin ta cäwalijisanic!

¹¹ We c'u ne c'o quieb junam quek'oyic, caquimik'isala' tak quib ri' qui cabichal; jun c'ut ri xa u tuquiel, ¿Jas ta ri cubano cumik'isaj ta rib?

¹² Jun xa u tuquiel cäban cuinem che u ch'äquic, we c'u e quieb quecuinic caquito' quib. Xukuje' c'ut we oxib u wäch cäban che jun colob man xak ta u t'okopixic ri'.

Ri no'j man are ta ri u junab ri winak cäyowic

¹³ Are c'u ne c'o na cajwataj wi ri ac'al ala ri meba' ri c'o u no'j chuwäch ri ri'jalaj ajawinel ri man c'o ta u no'j, wa' man cuc'amowaj ta chic ri pixbenic.

^14-15 Pune' ri ac'al ala ri cajawin na pa ri u c'olbal we ajawinel ri' c'äte' relic ulok pa che', cäk'ax c'u pa ri tem re ajawibal, craj ne c'äte relic pa ri mebayil cak'ax pa ri ajawinic, e wilom ri winak re we uwächulew ri' caquiya' qui tzij che u to'ic.

¹⁶ Pune' c'u man e ajilatal ri winak ri cajawin na paquiwi', mawi ri e are' mawi ri e rachalaxic quequicot ta na rumal. Xukuje' wa' man c'o ta u beya'l, xak lok', xa cajwax c'ut u chapic ri quiakik'.