Ri Tzijonel 3 - Quiché Bible

Ronojel c'o u k'ijol

¹ Pa we uwächulew ri' ronojel c'o u k'ijol; c'o jun jok'otaj che ronojel ri cac'ulmatajic:

² Jun jok'otaj che alanic, jun jok'otaj chic che cämic. Jun jok'otaj che ticonijic jun jok'otaj chic che u bokic ri ticom.

³ Jun jok'otaj che cämisanic, jun jok'otaj chic che cunanic. Jun jok'otaj che yojinic, jun jok'otaj chic che yacanic.

⁴ Jun jok'otaj che ok'enic, jun jok'otaj chic che tze'nic. Jun jok'otaj che c'olem pa bis, jun jok'otaj chic che c'olem pa nimak'ij.

⁵ Jun jok'otaj che qui jabuxic abaj, jun jok'otaj chic che qui molic. Jun jok'otaj che u lak'apuxic ib, jun jok'otaj chic che tzokopim ib.

⁶ Jun jok'otaj che tijtobenic, jun jok'otaj chic che u k'iloj ib. Jun jok'otaj che c'olonic, jun jok'otaj chic che q'uiakanic.

⁷ Jun jok'otaj che jisonic, jun jok'otaj chic che t'isomanic. Jun jok'otaj che yinelem, jun jok'otaj chic che tzijtzotem.

⁸ Jun jok'otaj che lok'ok'enic, jun jok'otaj chic che xutunic. Jun jok'otaj che ch'o'j, jun jok'otaj chic che jamaril.

⁹ ¿Jas ri cuch'äc ri winak che ri sibalaj chac ri cubano?

¹⁰ Quinwil c'ut ri eka'n ri u cojom ri Dios paquiwi' ri winak che qui mach'irisax ruc'.

¹¹ Are', pa ri jok'otaj ri rajawaxic, ronojel je'lic u banic xubano; xucoj c'ut chupam ri u chomanic ri winak ri ch'obonic re ri man q'uistajel taj pune' c'u ne ri winak man curik ta u ch'obic pa ronojel ri u nimalil ri u banom ri Dios xukuje' ri cubana' na.

¹² In weta'm chi ri utz na ri cuya' cuban ri winak are ri u quicotisaxic rib, chubana' c'u ri utzil pa ronojel ri u c'aslemal,

¹³ we c'u cujwa'ic cujuq'uianic xukuje' cakil u wäch ri cuya' ri ka chac chke, rumal c'u rech chi are' ri Dios yowinak chke.

¹⁴ Weta'm c'ut chi ronojel ri u banom ri Dios cajeki' amak'el. Man c'o ta jas ri cätik ta chi che mawi c'o jas ri quesax ta chi che; je u banic wa' u banom ri Dios, rech nim quilic.

¹⁵ Man c'o ta jun jasach c'olic ri ma ta c'olinak ulok nabe, man c'o ta chi c'u jas cac'oji' na ri ma ta c'o chic. Ri Dios cubano chi cätzelej ri oc'owinak.

Ri jech'balil pa ri c'aslemal

¹⁶ In cuininak che rilic xukuje' chi pa we uwächulew ri' c'o chuwil xukuje' etzelal ri jawije' rajawaxic c'o ta wi suq'uilal xukuje' colomal.

¹⁷ Quinbij c'ut chi ri Dios cuk'at na tzij puwi' ri winak ri tz'akatisanel xukuje' ri banal etzelal, c'o c'ut jun jok'otaj che ronojel ri cac'ulmatajic xukuje' che ronojel ri cäbanic.

¹⁸ Xukuje' quinbij, chrij ri qui c'aslemal ri winak, chi ri Dios cätajin quebutijtobej ri winak rech caquich'obo chi xukuje' ri e are' e junam cuc' tak ri awaj.

¹⁹ Kas c'u ne tzij, winak xukuje' tak ri awaj xak junam ri caquitaklebej: ri jule' xukuje' ri jule' chic xak e junam, quecämic, ri uxlabic re c'aslemal xak junam chque conojel. Man c'o ta u jalbem ta wi rib ri winak chuwäch ri awaj: ronojel c'ut xa cawächibal ri xak lok',

²⁰ conojel quebetakal xa' chupam ri junam c'olbal; puc'uc' ulew xbanbex quech conojel quetzelej chi c'u na conojel chupam ri puc'uc' ulew.

²¹ ¿Jachin ta ri cacuinic cujiquiba' chi ri ruxlabal ri winak capaki' pa tak ri chicajil que ri caj, xukuje' ta c'ut chi ri ruxlabal ri awaj cakaj ta c'ä chuxe' ri ulew?

²² Xinch'obo chi man c'o ta chi jun jasach ri utz ta na che ri winak chi chutija' chucojo' ri cuya' ri u chac che, are c'u wa' ri u taklebem, man c'o ta c'u ya' ri cac'amow ta ulok rech cariltaj ri cac'ulmatajic aretak cäminak chic.