Ri Tzijonel 2 - Quiché Bible

Ri u no'j ri tzijonel ri xresaj

¹ Xukuje' xinbij chbil wib: “Camic quenbana' ri tijtobenic quenquicotisaj wib; quenya' jun je'licalaj c'aslemal chwe.” ¡Xukuje' c'u ne wa' man c'o ta u beya'l, xak lok'!

² Xinch'ob c'ut chi ri tze' xukuje' ri cäkaj chwächaj man c'o ta cupatanij.

³ Ruc' ri nu chomanic ri c'o chuxe' ri no'j, xinwaj xintijtobej jas cuban ri u wa'l uva chwe, xinjach c'u wib che ruq'uiaxic rech quinwetamaj we are wa' ri sibalaj takal na che ri winak pa ri ajilatal tak k'ij ri cac'oji' cho we uwächulew ri',

⁴ xebentak qui banic nimak tak chac; xebentak qui yaquic nimak tak ja; xec'oji' nu ticbal tak uva pa wech wi.

⁵ Xintak qui tajixic ticbal tak wichaj pa wech wi xukuje' tak nu ticbal cotz'i'j, xebentic c'u ronojel qui wäch tak che' ri quequiya' qui wäch.

⁶ Xebenban c'olbal ja' che qui nojisaxic che ja' che qui ja'xic tak ri che ri e ticom;

⁷ xebenlok' lok'om pataninelab achijab xukuje' lok'om pataninelab ixokib, xec'oji' c'u ne nu pataninelab ri xebalax cho ja; xukuje' e q'ui na ri ati'tab tak nu wacax xukuje' tak nu chij chuwäch apachique jun chic ri xc'oji' can nabe chnuwäch pa Jerusalen.

⁸ Xeben mulij jutak mulaj k'an puak xukuje' sak puak k'inomal ri e quech can jule' tak ajawinelab chic xukuje' e quech can jule' tak u k'ab tinimit chic. Xec'oji' nu bixonelab ixokib xukuje' achijab, quicotemal wa' aj winak, xukuje' xquiterebela' tak quib e q'uialaj tak ixokib ri man e kas ta e wixokilal ri xec'oji' wuc'.

⁹ Xinux jun winak ri sibalaj nim u banic, nim na ri nu k'inomal ri xc'oji' chquiwäch ri xec'oji' can nabe chnuwäch pa Jerusalen. Pune' c'u ruc' ronojel wa', ri no'j man quinuwonoba' taj.

¹⁰ Mawi jumul xink'il ta wib che jun jasach ri xinrayij; mawi jumul xink'il ta wib che jun quicotisabal chwe. Xinquicotisaj ri wanima' cuc' conojel tak ri nu chac, are c'u we quicotemal ri' are tojbal wech.

¹¹ Xinoc c'u che u chomaxic tak ri kas e nu chac, xukuje' ri c'ax ri xinrik che qui banic, xinch'ob c'ut chi ronojel man c'o ta cubej, xak lok', jun u k'atixic u chapic ri quiakik', ri man c'o ta quechbex che cho we uwächulew ri'.

¹² Xinoc chi c'u che chomanic puwi' ri no'j, ri man no'jil taj xukuje' ri man cäch'obom taj: ¿Jas ta chi c'u lo ri cacuin ta chi che u banic ri cajawin na pa nu q'uexwäch, we ta mat are ri banom chic nabe?

¹³ Xinrik c'ut chi are c'o quechbex na che ri no'j chuwäch ri man no'jinic taj, jacha' chi are c'o quechbex na che ri sakilal chuwäch ri k'ekumalil.

¹⁴ Ri c'o u no'j utz qui cojic ri e u bak'wäch quebucojo, are c'u ri man aj no'j ta cäbin pa k'ekumalil. Xinch'ob c'ut chi xak junam quebeyem conojel,

¹⁵ xinbij c'u chbil wib: “Ri queyem ri man ajno'j ta xukuje' quineyem in, je c'u ri' man c'o ta cupatanij q'uialaj no'j chwe. ¡Xukuje' ne wa' xa cawächibal ri xak lok'!

¹⁶ Mawi ri c'o u no'j mawi man c'o ta u no'j c'o ta quinataxic amak'el; pa tak c'u ri k'ij ri quepetic ronojel sachinak chic, cäcäm c'u na ri c'o u no'j jacha' xukuje' ri man c'o ta u no'j.”

¹⁷ Xinban woyowal che ri c'aslemal, ronojel c'ut ri caban cho we uwächulew ri' cac'ulelan chwe. Kastzij, ronojel xa cawächibal xak lok', ¡Xa' cajwax u chapic ri quiakik'!

¹⁸ Xinban woyowal xukuje' che ronojel ri chac ri xinban cho we uwächulew ri', ronojel quinya' na cänok che ri quinjalowic.

¹⁹ Jun jasach c'ut kas jic: chi jun we are' ri ajno'j, we man ajno'j taj, cubana' na rech che ronojel ri ruc' sibalaj chac xukuje' no'j xinticar che u rikic cho we uwächulew ri'. ¡Xukuje' c'u wa' xa cawächibal xak lok'!

²⁰ Aretak xinca'yej ri nu banom cho we uwächulew ri', xinbisoj chi sibalaj in chacuninak,

²¹ c'o c'u jachin cucoj no'j, etamanic xukuje' esbal no'j chupam ri u chac, xa c'u che u ya'ic can ronojel che ri man xchacun ta che u rikic. ¡Xukuje' wa' xa cawächibal xak lok' xukuje' jun nimalaj man suq'uil taj!

²² Chuq'uisbalil, ¿jas ri cuch'äc ri winak che ri sibalaj chac ri cubano xukuje' che ri sibalaj roquic il cho we uwächulew ri'?

²³ Ronojel ri u c'aslemal re rikoj c'ax, jun eka'n wa' ri cuya' latz'; mawi c'u ne cuxlan ri u chomanic chak'ab. ¡Xukuje' c'u wa' xa' cawächibal xak lok'!

²⁴ Ri utz na ri cuya' cuban ri winak chwok xukuje' chuq'uianok, chutija' chucojo' ri u wächinic ri u chac, nu rikom c'ut chi xukuje' wa' cäpe ruc' ri Dios.

²⁵ ¿Jachin ta c'ut ri cacuinic cäwa'ic, o cäquicotic, we ta mat rumal are'?

²⁶ Je c'u wa' ri cac'ulmatajic, ri Dios cuya' no'j, etamanic xukuje' quicotemal jachin ri carilo chi takal che; are' c'ut ri cämacunic cuya' ri eka'n che chi chpok'colijok chebumulij c'u tak k'inomal rech cuya' che jachin ri caril ri Dios chi cakaj chuwäch. ¡Xukuje' wa' xa cawächibal xak lok' xa cajwax u chapic ri quiakik'!