Ri Tzijonel 11 - Quiché Bible

Paquiwi' conojel ri jastak, no'j

¹ Chaq'uiaka' ri a wa chupam ri ja', oc'owinak chi c'u jun k'ijol cärik na.

² Chajachaja' ri c'o awuc' joropa ri catcuin che u ya'ic, man aweta'm ta c'ut we ne cäpe etzelal puwi' ri ulew.

³ We e k'ekarinak ri sutz', cäkaj na ri jäb puwi' ri ulew. Cäkaj ri che' pa u wiquiak'ab ri elebal k'ij o cäkaj ri che' pa ri u mox elebal k'ij, pa ri c'olbal jawije' ri cakaj wi chi' cäcanaj wi na.

⁴ Ri coc che u ca'yexic ri quiakik' man caticonij taj, jachin c'ut ri are cuca'yej ri sutz', man c'o ta wächinic cuyaco.

⁵ Je c'ut jacha' chi man aweta'm taj jawije' ri cabe wi ri quiakik', mawi aweta'm ri u winakirisaxic ri ac'al pa ri u c'u'x ri nanaxel, mawi c'u ne c'o aweta'm che ri cuban ri Dios, che conojel ri jastak.

⁶ Chajopij ri awija' ak'abil, xukuje' chajopij benak k'ij, mawi c'u jubik' etamatalic jas ri utz quel na, we are ri nabe o are' ri ucab.

⁷ Sibalaj je'lic ri sakilal, utz c'ut chi ri bak'wächaj queril ri k'ij;

⁸ pune' c'u cac'asi' jun q'ui junab caquicot ta c'u cumal conojel wa', rajawaxic chretamaj chi ri k'ij tak re ri k'ekumalil sibalaj e q'ui na, chi ronojel c'ut ri oc'owem cubano, man c'o ta u beya'l, xak lok'.

Yo'w no'j chque ri c'ä e ac'alab

⁹ Chaquicotisaj awib, ala o ali, camic ri at nojinak che c'aslemal; chatija' chacojo' ri utz camic ri c'ä catcuinic. Chanimaj ri cubij ri awanima' chawe xukuje' che ronojel ri cawilo, chnataj c'u chawe chi ronojel wa' ri Dios cutok'ij na chawe chi cacholajij na chuwäch.

¹⁰ Chebanajtajisaj che ri a chomabal ri oquem tak il, chebaq'uiaka' c'u bic tak ri c'axc'olil jela', xukuje' c'u ne tak ri e utzalaj tak k'ij rech ri awalc'alal xa' e cawächibal xak lok'.