Ri Tzijonel 10 - Quiché Bible

Paquiwi' conojel ri jastak, no'j

¹ Jun cäminak amalo cächuchutic caretzelaj ri utzalaj c'oc'al. Are q'ui na ri cutzijoj ri conil ri kas cawerer na chuwäch ri no'j ri nim na u banic.

² Ri u chomabal ri ajno'j are cuya' u tzij che u banic utzilal, are c'ut ri rech ri man c'o ta u no'j are cuya' u tzij che u banic ri etzelal.

³ Ri man c'o ta u no'j, pa ronojel ri cubano, cuc'ut ri u mebayil ri e u chomanic pune' c'u cätajin cubij chi ri man c'o ta qui no'j e are' ri niq'uiaj chic.

⁴ We ri k'atal tzij coyowar awuc', masach ri a jolom; ri cunabal chque ri nimak tak sachinakil are ri quimajixic ri jastak chi nojimal.

⁵ Wilom jun sachinakil ri cäban cho we uwächulew ri', ri caq'uiy ulok cuc' tak ri e k'atal tak tzij:

⁶ Chi cäya' jun ekle'n nim u banic che ri man c'o ta u no'j, are c'u ri winak ri nim u k'ij c'o chupam jun ekle'n ri man nim ta u banic.

⁷ E wilom tak lok'om pataninelab ri quebin chquij tak quiej, xukuje' ri e qui c'ojol tak ajawinelab ri quebin chcakan ri e jacha' ta ne lok'om tak pataninelab.

⁸ Ri cäc'otow ri jul, chupam cätzak wi. Che ri cac'apow ri pimalaj tapia, ri cumätz cacatzowic.

⁹ Ri cutzoc' abaj, cusoc rib che u banic. Ri cupak' si', xak quieb cubij cuwech' rib.

¹⁰ We quel u pa u chi' ri icäj we c'u ne man cäban chic u pa u chi', rajawaxic ri' cacoj na chuk'ab che u cojic. Are utz na utz qui banic ri jastak quebanic xukuje' ruc' no'j.

¹¹ Man c'o ta cubej ri ch'äcanel we nabe cacatzan ri cumätz.

¹² Ri e u tzij tak ri ajno'j quebuc'am ulok utzil che, e are tak c'ut ri e rech ri man c'o ta u no'j e are quec'amow ulok ri kas e retzeletajic:

¹³ Cuchaplej quebubij xuwi tak conil, cutakej c'u na qui bixic sachinakil.

¹⁴ ¡Ri man c'o ta u no'j man queq'uis ta ri u tzij! ¿Jachin ta ri cäcuin che u bixic ri quec'ulmatajok, man c'o ta c'u jun c'o reta'm che ri petinak?

¹⁵ Ri man c'o ta u no'j sibalaj cucämisaj rib che u banic ri chac, man reta'm ta c'u ne ri be ri cäbe pa ri tinimit.

¹⁶ ¡Tok'ob u wäch ri ulew ri c'o jun rajawinel ri xa' je u banic jun ac'al ri quesakarisan c'u ne tak ri e u c'ojol chupam tak ri nimak'ij!

¹⁷ ¡Utz rech ri ulew ri c'o jun rajawinel ri nim u banic, ri quewa' ri e u k'atal tak tzij pa ri u k'ijol, che u to'ic u wi' ri qui chuk'ab man che ta c'u k'abaric!

¹⁸ Ri sak'or cayojyob ri u wi' ri ja puwi'; ri man c'o ta jas cubano catz'uj c'u ronojel ri ja.

¹⁹ Ri wa che u tijic, ri u wa'l uva che u quicotisaxic ri c'aslemal; cajwataj c'u puak che wa'.

²⁰ Matyok'on che ri ajawinel mawi ta ne ruc' ri a chomabal. Mabij itzel tzij chrij ri k'inom, pune' xa' a tuquiel at c'olic' querapap c'ut ri chicop ri c'o ri qui xic' cuya' c'ut quequitzijoj che.