Ri Tit 3 - Quiché Bible

Jas ri rajawaxic cäquiban ri cojonelab

¹ Chanataj chque ri cojonelab chi cäquiya' quib pa takic chque ri k'atal tak tzij xukuje' ri c'o qui takanic, chi queniman chque ri e c'o paquiwi'. Chanataj chque chi chquisuc'umaj quib che ronojel utzalaj chac;

² man quequiyok' ta niq'uiaj chic, man caquiyac ta ch'o'j ruc' ri qui tzij xukuje' e banal tak utzil, chiquic'utu' quib chi e mach'ol ruc' canima' chque conojel.

³ Xukuje' ri uj man c'o ta ka no'j nabe canok, man uj nimanelab taj, uj subutajnak, ka yo'm kib pa u k'ab ri xa' ka rayibal xukuje' ronojel u wäch jastak ri xkaj chkawäch. Xkaban etzelal, xpe koyowal we jun chic xurik utzil. Itzel xekil niq'uiaj winak chic, xukuje' itzel xujquil uj ri e are'.

⁴ Aretak c'ut xpe ri ka Colonel Dios, xuc'ut chkawäch chi cuban utzil chke xukuje' quebulok'ok'ej ri winak,

⁵ xujucolo, man rumal ta suc'alaj chac ri ka banom, xane' rumal rech chi xel u c'u'x chke. Xujuch'ajo, xuban c'ac' tak winak chke, jas jun alaj ne' c'äte xalaxic. Jewa' xubano rumal ri Ruxlabal ri Dios,

⁶ ri xutak ulok pa kanima' rumal ri Jesucrist ri ka Colonel, ri pa u q'uiyal xuya' ri Uxlabaxel chke.

⁷ Jeri' k'alajisam chic chi uj suc' chuwäch rumal ri u tok'ob, cu'l c'u ka c'u'x chi cäkechbej na ri junalic c'aslemal.

⁸ Kastzij we tzij ri'. Quinwaj c'ut chi cabij we jastak ri', muban quieb a c'u'x, rech ri e cojoninak che ri Dios queboc il che qui banic utzalaj tak chac. We jastak ri' e utz chque ri winak, c'o cäquechbej chque.

⁹ Maya' c'u qui k'ij ri conalaj tak chomanic xukuje' ri jo'sanic ri cabix chquij ri e i mam, mayac ch'o'j cuc' ri winak, miban ch'o'j chrij ri pixab. Man c'o ta c'u quechbex chque we jastak ri', man c'o ta qui patan.

¹⁰ We c'o jun ri cuban chque ri cojonelab chi cäquitasala' quib, chaya' u no'j jumul camul. Mawuc'aj chic awib ruc'.

¹¹ Aweta'm c'ut chi ri je u banic wa' sachinak, u yo'm can ri suc'alaj be, cämacunic. Ri mac ri cubano, are cac'utuwic chi c'okotajinak.

Ri Pawl cubij che ri Tit jas cuban na

¹² Aretak quintak bic ri Artems awuc', o ri Tiquico, chanim chatpet wuc' pa Nicopolis. Quinchomaj chi quinwoc'owisaj ri ic' re tew chila'.

¹³ Chebajacha' bic ruc' utzil ri Zens ri aj pixab xukuje' ri Apols chaya' bic ri cajwataj chque.

¹⁴ Xukuje' rajawaxic chi ri e c'o kuc' cäquetamaj queboc il che utzalaj tak chac rech cäquirik ri rajawaxic, rech c'o u patan ri qui c'aslemal, je ta ne jun tico'n cuya' u wächinic.

Ri Pawl cuya' rutzil u wäch ri Tit

¹⁵ Conojel ri e c'o wuc' cäquiya' apan rutzil a wäch. Chaya' rutzil qui wäch ri lok'alaj tak kachalal pa ri cojonic. Ri Dios chubana' tok'ob chiwe chi nimalaj iwonojel.