Ri Soponiy 3 - Quiché Bible

Ri macaj xukuje' ri u torotajic ri Jerusalen

¹ ¡Tok'ob u wäch ri Jerusalen, ri tinimit ri man ch'abexic ta cäraj, tz'ajtajinak xukuje' pak'alenel!

² Man xutatabej taj ri u ch'abal ri Ajawaxel man xujiquiba' ta u c'u'x chrij, man xutzucuj taj ri u Dios.

³ Ri e c'amal tak qui be xak e junam cuc' tak ri coj ri quewu'nic; ri e qui k'atal tzij xak e junam cuc' tak ri utiw ri e c'o pa ri chaki'j uwo sak ri man c'o ta jun bak ri caquiya' ta can che re chwek.

⁴ Ri e k'axal tak tzij ri e c'o cuc' e nimol tak quib, e jachinelab quieb qui wäch; ri e u cojol tabal tok'ob cäcawasij ri k'ijilabal man caquiya' ta u k'ij ri u pixab ri Ajawaxel.

⁵ C'o c'ut ri Ajawaxel chupam ri tinimit; ri are' are cuban ri utz, man are ta ri lawaloyil. Ronojel ak'abibal cujekeba' u banic ri u suq'uilal. Are c'u ri itzel winak, mawi ne reta'm jas ri' ri q'uixbal.

⁶ Cacha' ri Ajawaxel: “E nu yojim ri nimak tak tinimit, e nu lilobisam tak ri tac'atak tak ja ri e c'o paquiwi' tak ri qui nimak tak tapia e nu tolobam c'u canok ri e u xo'l tak cachoch, man c'o ta chi winak ri queboc'ow ta chi chquipam. ¡Chquipam tak ri qui tinimit ri e canajinak can qui tuquiel man c'o ta jun u winakil cajeki' ta can chquipam!

⁷ Xinchomaj: ‘Jeri' ri Jerusalen cuxe'j na rib chnuwäch cuc'amowaj c'u na chi quinjic'o; jeri' man cäsach ta na u wäch ri u c'olbal rumal rech chi xinc'äjisaj u wäch.’ E are tak c'ut ri e are are xcanej qui banic ronojel qui wäch tak etzelal.

⁸ Rumal ri', chiweyej ix ri k'ij aretak chinwalij che u bixic ri c'ax ri qui c'ulmaj na. In, ri Ajawaxel, quinjiquiba' u bixic: Xchomataj wumal qui mulixic ri nimak tak tinimit xukuje' tak ri ajawibal rech quinkasaj ri nicowelalaj woyowal paquiwi'. ¡Ronojel ri uwächulew cäsachisataj na u wäch rumal ri u k'ak'al ri nu c'anal!

⁹ Aretak chopan wa', quinch'ajch'ojirisaj na ri qui tzij tak ri tinimit rech conojel quinquinataj, rech conojel xa' junam qui wäch che nu k'ijilaxic.

¹⁰ Ch'käp chque tak ri nima' re Etiopiy, ri nu tinimit ri jabutalic cäpe na ruc' bochi'nic quebuc'am na ulok tak sipanic chwe.

¹¹ Pa ri k'ijol ri', nu tinimit, man catnoj ta chi na che q'uixbal che ta jun chque tak ri banoj ri xebac'ululebej wech, quebenwesaj c'u na chawe ri nimarisabal tak ib xukuje' ri banoj tak nimal, mawi chi c'u jumul quebac'ut ta chi na ri qui banic nimal chupam ri tastalicalaj nu juyub.

¹² In quebenya' canok awuc' winak ri e mach'amoj ri man nim ta qui banic, ri caquijiquiba' na qui c'u'x chrij ri nu bi'.

¹³ Ri queto'taj can che ri tinimit Israel man caquiban ta chi c'ut ri man suq'uilal taj, mawi quequibij chic banoj tak tzij, mawi quequinojisaj ta chic ri qui chi' chque tak jech'balil. Cuya' qui tzuktzubej iwib xukuje' quixuxlanic man c'o ta chi jun xe'n ib.”

Bix re quicotemal rumal ri Jerusalen

¹⁴ ¡Chatbixonok, tinimit re Sion! ¡Chebaraka' tak achi' ruc' quicotemal, tinimit re Israel! ¡Chatquicotok, Jerusalen, chatquicot ruc' ronojel awanima'!

¹⁵ Ri Ajawaxel u najtajisam chawe ri u c'äjisaxic a wäch e u najtajisam c'u bic ri qui banom qui c'ulel chawe. Ri Ajawaxel, ri Rajawinel ri Israel, c'o pa a niq'uiajil man c'o ta chi c'u etzelal caxe'j ta chi wi awib.

¹⁶ Pa ri k'ijol ri' cäbix na che ri Jerusalen: “¡Maxe'j awib, Sion, maya' c'olbal chi chechukchub ri a k'ab!”

¹⁷ Ri Ajawaxel ri a Dios c'o pa a niq'uiajil; ¡Ri are c'o ronojel u cuinem, catuto'tajisaj c'u na! Ri Ajawaxel caquicot na chawe. Rumal ri u lok'ok'ebal c'uxaj cuya' na c'ac' a c'aslemal; chupam ri u quicotemal cabixon na

¹⁸ jacha' ta ne pa jun k'ij re nimak'ij. Cacha' ri Ajawaxel: “In catinto'tajisaj c'u na che ri lawaloyil ri kajem cuban pawi', che ri q'uixbalil ri c'o pawi'.

¹⁹ Pa ri k'ijol ri' quink'atij na qui wäch conojel ri quebanow c'ax chawe. Quinto' na ri chij ri cach'ocopic quinyukej na ri sachinak; quinjalwächij na pa nim ilic xukuje' pa utzalaj tzijol pa ronojel ri uwächulew, ri etzelam tak wächaj ri xeban chiwe.

²⁰ Pa ri k'ijol ri' quixinc'am na ulok ix, quixinmulij na; quinban na chi caq'uextaj ri qui taklebej, quinya' c'u na utzalaj i tzijol xukuje' nim iwilic chquixo'l tak ri tinimit ri e c'o chuwäch ri uwächulew. In, ri Ajawaxel, nu bim.”