Ri Soponiy 2 - Quiché Bible

Cäpe ri nimalaj royowal ri Ajawaxel

¹ Chimulij iwib, chirika' iwib ix, winak ri man c'o ta i q'uixbal,

² c'ä majok chixq'uiak bic jacha' ta ne ri pajo, ri xa' pa jun k'ij casach u wäch; c'ä majok chkaj ri nimalaj royowal ri Ajawaxel piwi' ri canicowic; c'ä majok chkaj piwi' ix ri k'ij re ri nimalaj royowal ri Ajawaxel.

³ Chitzucuj ri Ajawaxel iwonojel ix ri imach'om iwib ri ix aj we uwächulew ri', ri quebinimaj tak ri e u takomal. Chicolomaj iwib xukuje' chi mach'a' iwib we je qui ban wa' craj ne quirik to'bal iwib pa ri k'ij ri cäpe ri nimalaj royowal ri Ajawaxel.

Ri c'äjisabal wächaj ri caquic'am na tak ri nimak tak tinimit

⁴ Ri tinimit re Gaz cajamajob canok, xukuje' ri Ascalon, catolobax canok; pa tiq'uil k'ij queq'uiak na bic ri e jekel pa Asdod, xukuje' ri aj Ecron quebok na bic c'ä chquixe'.

⁵ ¡Tok'ob i wäch ix, winak ri ix c'o pa Cret, ri ix jekel chuchi' ri plo! Ri Dios u yo'm u bixic chi jewa' qui c'ulmaj na: “¡Canaan, ulew ri aj pilisteyib, quensachisaj na a wäch man c'o ta a winakil quebenya' ta canok!

⁶ Ri ulew ri c'o chuchi' ri plo cak'ayeser na jawije' ri caquimulij wi na quib ri ajyuk'ab, xukuje' tak qui warabal ri jumulaj chij.”

⁷ Ri queto'taj can che ri tinimit Juda queboc na che rechbexic we ulew ri' aretak chpe ri Ajawaxel ri qui Dios che qui to'ic cuq'uex c'u na ri qui taklebem. Chila' quequichajij wi na tak ri qui jumulajaj, quebuxlan c'u na chak'ab chquipam tak ri ja re Ascalon.

Ri macaj ri Moab xukuje' ri Amon

^8-9 Are wa' cujiquiba' u bixic ri Ajawaxel ri c'o ronojel u cuinem, ri u Dios ri Israel: “Nu tom ri qui tzurunic ri aj moabib xukuje' tak ri qui yok'onic ri aj amonib rumal rech chi we winak ri' e qui tzurum ri e nu winak e uxinak c'u nimak qui k'ij rumal ri u chuk'ab ri culew. Rumal ri', quinban ri chi'nic ri kas cäban na quincha' rumal ri nu c'aslemal chi ri Moab je cuc'ulmaj na jacha' ri Sodom e are c'ut ri aj Amon quecanaj canok jacha' ri Gomor, quejalwächitaj pa u juyubal q'uix, pa u q'uiyibal atz'am, pa jun c'olbal ri xak catoli' na. Ri queto'taj can che ri nu tinimit quebe qui c'otij na quecanaj c'u na can cuc' tak ri culew.”

¹⁰ Are tojbal wa' ri caquic'am na ri Moab xukuje' ri Amon u mac rech chi xquitzur ri u tinimit ri Ajawaxel, u mac rech chi e uxinak nimak qui k'ij rumal ri u chuk'ab ri u tinimit ri Ajawaxel ri c'o ronojel u cuinem.

¹¹ Ri Ajawaxel cux na xibibal chque. Cusachisaj na qui wäch conojel ri e u diosib ri ulew, cäk'ijilax c'u na ri are pa ronojel c'olbal, xukuje' ne cumal ri winak ri e c'o chquipam ri ch'akatak tak ulew ri e c'o tak chupam ri plo.

¹² ¡Xukuje' ri ix, ri ix aj etiopiyib, quixsocotaj na rumal ri u ch'ich' re ch'o'j ri Ajawaxel!

¹³ Cuyuk c'u na are ri u k'ab che u banic c'ax pa ri iquiak'ab che u sachisaxic u wäch ri Asiriy, cutoloba' c'u na canok ri tinimit Ninibe, cujalwächij c'u na pa jun chaki'jalaj chaki'j uwo sak.

¹⁴ Ri che' ri e c'o chque tak ri cachoch quebok na, chquipam c'u tak wa' quebuxlan wi na ri jumulaj tak chij xukuje' ronojel qui wäch juyubal tak awaj. Ri tucur xukuje' ri awaj ri q'uix quij quewar na paquiwi' ri tac'atak tak rakan ja, e are tak c'u ri joj caquirakala' na qui chi' pa tak ri wenta'n xukuje' paquiwi' tak ri apalib.

¹⁵ Are tinimit wa' ri nojinak che nimal ri jekelic ri u cuban u c'u'x, ri caquibij wi ri winak ri e jekel chupam chi man c'o ta chi jun junam ta ruc' ri c'o ta cho ri uwächulew. ¡Tolobam c'u canok jalwächitajinak pa qui warabal juyubal tak awaj! Joropa' ri queboc'ow chunakaj, quexulk'ubic caquiban c'u na qui palaj che retzelaxic u wäch.