Ri Soponiy 1 - Quiché Bible

Ri k'ij re ri nimalaj royowal ri Ajawaxel

¹ Are tzijobelil wa' ri xuya' u bixic ri Ajawaxel che ri Soponiy pa ri k'ijol aretak ri Josiy ajawinel c'u wa' re Juda (ri u tat ri Josiy are' ri Amon). Ri u tat ri Soponiy are' ri Cusi, ri u tat ri Cusi are' ri Jedaliy, ri u tat ri Jedaliy are' ri Amariy, ri u tat ri Amariy are' ri Ezequiy.

² Are wa' cujiquiba' u bixic ri Ajawaxel: “Ruc' tz'akatil quinsachisaj na u wäch ronojel ri c'o cho ri uwächulew.

³ Quinsachisaj na qui wäch ri winak xukuje' tak ri awaj, quinsachisaj na qui wäch tak ri chicop ri c'o qui xic' xukuje' tak ri car, quink'atij na qui wäch ri e banal tak etzelal quinsachisaj na u wäch ri winak cho ri uwächulew.” Are' wa' cujiquiba' u bixic ri Ajawaxel:

⁴ “Quinyuk na ri nu k'ab che u banic c'ax che ri tinimit Juda xukuje' chque ri e jekejoj pa Jerusalen. Quinchupisaj na chupam we c'olbal ri' ronojel ri u nataxic ri dios Baal, xukuje' tak ne ri qui bi' tak ri e u cojol tabal tok'ob.

⁵ Quinsachisaj na qui wäch ri quepaki' paquiwi' tak ri ja che qui k'ijilaxic tak ri ch'imil, xukuje' tak ri quexuquic ri quequiban ri chi'nic ri kas cäban na pa ri nu bi' xukuje' pa ri u bi' ri dios Milcom.

⁶ Xukuje' quinsachisaj na qui wäch ri caquitas tak quib chwij, ri man quetzucun ta chwe mawi quebopan ta wuc' che u tz'onoxic qui no'j chwe.”

⁷ ¡Xak ba' chixyinil chuwäch ri Ajawaxel, rumal rech chi ri u k'ij ri Ajawaxel nakaj c'o wi! ¡Ri Ajawaxel u suc'umam jun tabal tok'ob e u tasom c'u tak ri e rula'!

⁸ Cacha' ri Ajawaxel: “Pa ri k'ij ri cacoj ri tabal tok'ob quenc'äjisaj na qui wäch ri e c'amal tak be, ri e u c'ojol tak ri ajawinel xukuje' conojel ri e quicojom jalan tak atz'iak.

⁹ Xukuje' quinc'äjisaj na qui wäch pa ri k'ij ri' ri quequixalk'atij tak apal, xukuje' ri caquinojisaj ri rachoch ri cajaw ruc' tokinic xukuje' tak subunic.”

¹⁰ Are' wa' cujiquiba' u bixic ri Ajawaxel: “Pa ri k'ij ri' quetataj na rakoj tak chi'aj re u tz'onoxic to'banic c'ä chuchi' ri Coquibal ri Cär. Caquirak na qui chi' ri winak che ri Ucab u Ch'akapil ri tinimit cätataj c'u na nimalaj wilijem c'ä paquiwi' tak ri juyub.

¹¹ ¡Chixawunok ix, ri ix jekel pa ri u ch'akapil ri ulew re Siloe conojel c'ut ri ajc'ayib quebe cämok, conojel ri caquiban qui ch'äcoj chrij ri puak cäsachisax na qui wäch!

¹² Pa ri k'ijol ri' quinc'am na jun chäj quintzucun c'u na chupam ri Jerusalen. Quinc'äjisaj c'u na u wäch ri winak ri xak cat'uyic ri man cubisoj taj jacha' ta ne ri u wa'l uva ri xak chemelic, ri cubij c'u chbil rib: ‘¡Ri Ajawaxel man c'o ta jas cubana', mawi utzilal mawi etzelal!’

¹³ Rumal ri' ri e u k'inomal quec'otix na bic xukuje' tak rachoch queyojix na. Quequiyac tak na cächoch, man c'u quejeki' ta na tak chquipam; quequitic tak na uva, man caquitij ta c'u na ri u wa'l uva ri quel chque.”

¹⁴ ¡Nakaj chic c'o wi ri nimalaj u k'ij ri Ajawaxel! ¡Nakaj chic c'o wi, aninak petinak! Ri u tininem ri u k'ij ri Ajawaxel kas c'a na: ¡xukuje' c'u ne ri sibalaj e c'o na qui chuk'ab caquirak na qui chi'!

¹⁵ Cux na jun k'ij re nimalaj oyowarem, re c'axc'olil xukuje' rikoj c'ax, re etzeletajic xukuje' tolobenic, re k'ekumalil xukuje' re räxcanacojil, re sutz'al xukuje' tzatzalaj mujal;

¹⁶ cux na jun k'ij re trompet xukuje' re rakoj chi'aj che u banic c'ax chque ri tinimit tak ri e c'o tak tapia chquij xukuje' e tac'atak tak ja.

¹⁷ Je wa' cächa' ri Ajawaxel: “Quebencoj na ri winak pa aninakil. Quebin c'u na e jacha' ta ne moyab, rumal rech chi xemacun chnuwäch. Ri qui quiq'uel cajamix na jacha' ta ne puc'uc' ulew, ri qui ti'jal camulubax na jacha' ta ne qui mes awaj.”

¹⁸ Pa ri k'ij re ri nimalaj royowal ri Ajawaxel, man cäto'tajisax ta na ri winak mawi rumal ri u sak puak mawi rumal ri u k'an puak, ri u k'ak'al c'ut ri royowal ri Ajawaxel cäjarisan na ronojel ri uwächulew. ¡Conojel ri winak ri e jekel cho ri uwächulew cäsachisataj na qui wäch xa' pa jun jok'otaj!