Ri Osey 9 - Quiché Bible

Ri u c'äjisaxic u wäch ri Israel ri cäya' u bixic rumal ri Osey

¹ Mat quicotic Israel; mat ch'oplinic chi utz at c'olic jacha' ri jule' tak tinimit chic, at uxinak c'u junam cuc' ri quech ri nim ch'utin aretak xaxutuj can ri a Dios. Pa tak ri era ri cayak' wi ri trico, cäkaj c'u chawäch quebac'am tak ri tojbal re ri e a mac jacha ri cuban ri quech ri nim ch'utin.

² Ri tinimit Israel man cac'oji' ta na u trico mawi u wa'l uva; ri c'ac' u wa'l uva man cubana' ta na che.

³ Ri Eprain cätzelej na pa Ejipt, pa Asiriy quebutija' na tz'ilalaj tak k'obisabal. Man quitakej ta c'u na jekelem chupam ri rulew ri Ajawaxel:

⁴ Man cacuq'uiaj ta chi na u wa'l uva che u ya'ic u k'ij ri Ajawaxel, mawi quequichi'j chic chi' ri e qui tabal tak tok'ob. Ri wa ri chquitijo, junam ruc' ri wa ri cätijowic aretak c'o jun cäminak, jachin tak c'ut ri chetijowic quecanaj can tz'il. Ri e are' quequitij na we wa ri', man cuya' ta c'ut caquic'am ta bic chupam ri rachoch ri Ajawaxel.

⁵ ¿Jas c'u lo ri quiban na ix chupam ri k'ij re ri nimak'ij, ri nimalaj u nimak'ij ri Ajawaxel?

⁶ Ri e are' e animajininak bic chuwäch ri sachbal wächaj; Ri Ejipt quebumulij na quemuk c'u na pa Memps. Ri e qui k'inomal tak re sak puak quenoj na che tak la, chquipam tak ri e qui kajebal queq'uiy tak na q'uix.

⁷ ¡E opaninak tak ri k'ij rech ri c'äjisabal wächaj! ¡E opaninak tak ri k'ij rech ri u ya'ic ri tojbal ri takalic! ¡Ri Israel queretamaj chi e opaninak chic! Ri ix quibij: “Ri k'axal tzij xa' jun con. Ri achi ri uxlabisam jun tak.” Je c'u quibij wa' rumal rech chi nojinak che etzelal, u mac rech chi nim ri iwoyowal.

⁸ Ri Dios u cojom ri k'axal tzij che yuxlenel che ri Eprain, are c'u ri ix quebicoj tak c'amibal pa ri u be; ¡C'ä ne chupam ri rachoch Dios quiwetzelaj wi u wäch!

⁹ Xitz'akatisaj u chuwirisaxic iwib, jacha' ri pa tak ri k'ijol pa Gabaa. Are c'u ri Ajawaxel quenataj na ri e iwetzelal che cusolij na ri e i mac.

Ri Israel cucoch' na ri quetaken ri u macaj

¹⁰ Je wa' xubij ri Ajawaxel: “Aretak xinrik ri Israel, xinquicotic jacha' ri quebuban ri queburik uva chupam ri chaki'j uwo sak. Ri e i mam xebux tak che ri nu bak'wäch e jacha' ri nabe tak higo. Aretak c'u xebopan pa Baal-peor xquijach quib che qui patanixic ri e subunelab tak diosib, xquiban c'u quib chi xebux xawebal e jacha' ri diosib ri quequilok'ok'ej.

¹¹ Ri u nimalil ri Eprain carapin na jacha' jun chicop ri e c'o ri u xic'. Man quebalax ta chi na alaj tak alabom, man c'o ta chi ixokib e yawab tak winak, man quebil ta chi na qui wäch alc'ualaxelab.

¹² We c'u ne queticar che qui q'uiyisaxic tak calc'ual, in quebentokij na chque man c'o ta c'u jun quinya' ta can chque. ¡Tok'ob qui wäch we winak ri' aretak man in c'o ta chic cuc'!

¹³ Quinwilo chi ri Eprain cuban chque ri e u c'ojol e jacha' ta ne ri quekaj pa qui k'ab tzucunelab: queresaj bic che qui jachic rech quecämisaxic.

¹⁴ ¡Cheya' la chque Ajawaxel ri caya' la chque! ¡Cheya' la pamaj chque ri man quebalan taj xukuje' e uwo tak c'uxaj ri man c'o ta tu' chquipam!”

Royowal ri Ajawaxel che ri Eprain

¹⁵ Je wa' cubij ri Ajawaxel: “Pa Jilgal xquiban wi ronojel u wäch lawaloyil, chila' c'u xinchaplej wi retzelaxic qui wäch. Qui mac ri e itzel tak qui banoj quebenwesaj bic chupam ri wachoch; man quintakej ta qui lok'ok'exic, conojel c'ut ri e c'amal tak qui be man cäcaj ta ch'abexic.

¹⁶ Ri Eprain socotajinak: jacha' juwi' che ri e chaki'jarinak tak ri e u xera' u tanabam c'u u ya'ic u wächinic. Pune' ta e c'o ralc'ual quinban na chque chi quecämic.

¹⁷ We tinimit ri' man u yo'm ta u xiquin che u tatabexic ri nu Dios rumal ri' cäxutux na rumal ri nu Dios, xak c'u querabacat na chquixo'l nimak tak tinimit.”