Ri Osey 8 - Quiché Bible

C'okotajinak ri Israel u mac qui k'ijilaxic ri diosib

¹ “Chawok'isaj ri trompet, jacha' yuxlenel ri cächajin puwi' ri u tinimit ri Ajawaxel. Rumal rech chi man qui tz'akatisam taj u banic ri nu c'ulwächinic quiwalijisam quib che u c'ulelaxic ri nu tijonic.

² Quepe c'u wuc', caquirak qui chi': ‘¡cakaya' k'ij la jacha' chi lal u Dios ri Israel!’

³ Are c'u ri Israel u xutum ri utz, rumal ri' cätakex na u banic c'ax che cumal ri e u c'ulel.

⁴ Man c'o ta u bixic chwe cumal e quicojom tak ajawinelab, e quicojom c'u c'amal tak be ri man xinwetamaj taj in. Qui c'amom ri qui sak puak xukuje' ri qui k'an puak che qui banic tak diosib Dios che c'u u sachisaxic qui wäch chquibil tak quib.

^5-6 Samar, ¡man quinch'ij ta rilic u wäch ri alaj ama' wacax ri caquik'ijilaj! Ri woyowal nicowinak che u banic c'ax che. ¿Joropa' lo ri qui beytajem rech quecanaj ch'ajch'oj ri aj israelib? ¡Wa' we alaj ama' wacax ri c'o pa Samar man Dios taj! Xel puwi' u k'ab jun ajchac, cäban c'u na ch'akatak che.

⁷ We winak ri' xequitic quiakik' qui wächinic tak cakulja quequiyac na; man e c'o ta na culew ri quequiyac ta na qui wäch, mawi caquesaj na c'äj che ri qui trico; we c'u ne caquesaj, e are tak ri man e qui winakil taj quetijow na.

⁸ ¡Ri Israel bik'tajnak! Ri jule' nimak tak tinimit chic caquilo chi jacha' ta ne jun jasach ri man c'o ta u k'ij,

⁹ u mac rech chi xbe ruc' ri Asiriy jacha' jun tacalaj juyubal bur. ¡Ri Eprain xebuya' tak sipanic che qui lok'ic e nimak tak tinimit rech quebuto'!

¹⁰ Pune' ta c'u ne quebuya' tak sipanic chquixo'l nimak tak tinimit, ri in quebenjabuj na, c'o c'u jun k'ijol ri caquitanaba' na qui takexic tak ajawinelab xukuje' c'amal tak be.

¹¹ Are' c'u ri Eprain quebuwoc jumulaj tak porobal ri xuwi quebajwataj che u banic mac.

¹² Pune' ri in xebentz'ibaj e q'ui nu tijonic che, ri are' xuban che chi e je ta ne jun jasach ri ma ta c'o u patan.

¹³ We winak ri' quekaj ri tabal tak tok'ob chquiwäch, quepilon c'ut; are c'u ri in, ri Ajawaxel man quinquicot ta cuc': quenataj na chwe ri etzelal tak ri e qui banom, quinc'äjisaj c'u na qui wäch rumal ri qui mac, quinban c'u na chque chi quetzelej pa Ejipt.

¹⁴ Ri Israel quebuyac nimak tak ja cäsach c'ut ri u winakirisanel pa u jolom. Ri Juda q'ui tak tinimit quebuyaco ri e c'o nimak tak tapia chrij, quinban c'u na in chque chi quenicow pa jun k'ak' ri quebuchajirisaj na ri nimak tak rachoch.”