Ri Osey 6 - Quiché Bible

Ri Israel cutzijoj chi cätzelej ruc' ri Ajawaxel

¹ Tisaj iwonojel chujtzelej c'u ruc' ri Ajawaxel. Are' xujmuchuwic cujrutzirisaj c'u na xukuje'; xujusoco, cujucunaj c'u na xukuje'.

² Xa pa jun jok'otaj cutzelej na ri rutzil ka wäch, cujuwalijisaj na rech cujjeki' na chuwäch.

³ ¡Ka tija' ka k'ij che retamaxic u wäch ri Ajawaxel! Ri Ajawaxel cäpe na kuc', kastzij jacha' ri relic ulok ri k'ij, kastzij jacha' ri u ja'xic ri uwächulew rumal ri jäb pa ri u q'uisbal ri junab xukuje' pa ri u chaplebal ri junab.

Ri xutzelej u bixic ri Ajawaxel

⁴ Cächa' ri Ajawaxel: “¿Jas ta ri quinban chawe, Eprain? ¿Jas ta ri quinban chawe Juda? Ri lok'ok'ebal c'uxaj ri c'o iwuc' chwe xa' jacha' ri mayul re ri ak'abibal, jacha' ri räxk'ab re ri u sakaribal, ri ak'ab casachic.

⁵ Rumal ri' e nu muchum cumal tak ri e k'axal nu tzij; cumal tak ri tzij ri e elinak ulok pa nu chi' e nu cämisam. Ri nu suq'uilal caq'uiy ulok jacha' ri sakilal.

⁶ Ri quinwaj chiwe chi quinilok'ok'ej, man are ta quinwaj chi quebiya' tabal tak tok'ob chnuwäch; chi qui ch'ob nu wäch chi in jacha' Dios chque, man are ta c'ut chi quichi'j ta tabal tak tok'ob chnuwäch ri quechajirisaxic.

⁷ Are c'u ri nu tinimit xak junam ruc' ri Adan, man xu tz'akatisaj taj ri nu c'ulwächinic uxinak c'u man jic taj chnuwäch.

⁸ Ri Galaad, are jun qui tinimit ri e banal tak etzelal, conojel e nojinak che quetal tak quic'.

⁹ Ri e cojol tabal tok'ob e juk'at eläk'omab e c'o che qui yuxlexic tak ri winak; quecämisanic quequiban nimak tak il pa ri be re Siquem.

¹⁰ Pa Israel e wilom jastak ri e xibibal; ri Eprain uxinak junam cuc' ri quech ri nim ch'utin, ri Israel u tz'ilom rib.

¹¹ Xukuje' c'u ne chawe at, Juda, c'ututajinak chic ri k'ij che u c'äjisaxic a wäch.” “Aretak quinwaj quinq'uex ri cutaklebej ri nu tinimit Israel,