Ri Osey 5 - Quiché Bible

¹ “E cojol tak tabal tak tok'ob, chitatabej wa'; chaya' a xiquin tinimit re Israel; chixtatabenok ix ri ix aj uwo rachoch ri ajawinel: Piwi' ix cakaj wi na ri c'äjisabal wächaj ix c'u uxinak jun c'amibal ri cojom pa Mizpa, jun c'at ri lic'om puwi' ri juyub Tabor,

² jun c'ua' ri naj kajinak u pam chupam ri beya' re Sitim. Rumal ri' quinc'äjisaj na qui wäch.

³ In weta'm u wäch ri Eprain; ri Israel ma ta ne ma ta weta'm u wäch. Ri Eprain uxinak junam cuc' ri quech ri nim ch'utin; ri Israel u tz'ilom rib.”

⁴ Ri e itzel tak u banoj ri tinimit man cäyo'w ta che chi cätzelej ruc' ri u Dios. Kajinak pa u k'ab ri u mac quech ri nim ch'utin, man cuya' ta u k'ij ri Ajawaxel.

⁵ Ri nimal ri cac'amow ri Israel cäk'ijin puwi'. Ri Eprain cuchak'ij rib chupam ri kas retzelal, ¡junam c'ut cuc' ri e are' xukuje' ne ri Juda cuchak'ij na rib!

⁶ Quecachilaj tak ri qui chij xukuje' tak ri e qui wacax quebe na che u tzucuxic ri Ajawaxel, man c'u caquirik ta na rumal rech chi e tzakom can rumal.

⁷ Man e uxinak ta jic ruc' ri Ajawaxel, e c'o calc'ual ri e rech jun achi chic. Rumal ri man qui jiquil taj xa' pa jun ic' ri culew tak quebik'taj na.

Ri c'äjisabal u wäch ri Israel xukuje' ri Juda

⁸ ¡Chiwok'isaj ri uc'a' re ch'o'j pa Gabaa xukuje' ri trompet pa Rama! ¡Chicojo' ri xe'n ib pa Bet-aben! ¡Chitica' ri tuquinibal ib pa Benjamin!

⁹ In quinya' u bixic chquixo'l tak ri ramak' ri Israel ri sibalaj jic quec'ulmataj na: Ri Eprain cäyojyobisax pa ri k'ij re c'äjisabal wächaj.

¹⁰ Jewa' cubij ri Ajawaxel: “Ri e c'amal tak u be ri Juda xak e junam tak cuc' we winak ri' ri quequiq'uex tak ri e qui c'ulbatil tak ri ulew. ¡Quebenbik'tajisaj c'u na chupam ri nimalaj woyowal!

¹¹ Ri Eprain mejmobinak, c'o c'äjisabal wächaj puwi', u mac rech ri benam chquij ri e subunelab tak diosib.

¹² Are c'u ri in je ri quinbantaj puc'pubanel che ri Eprain, jacha' ri kuchunel che ri tinimit Juda.

¹³ Aretak cäril ri Eprain ri yabil ri c'amowinak, xukuje' c'u ri Juda queril tak ri e u socotajic, ri Eprain cabe na pa Asiriy che u tz'onoxic ri u to'ic rumal ri nimalaj ajawinel, are c'u ri are' man cäticar ta na che cutzirisaxic mawi qui cunaxic tak ri socotajic.

¹⁴ Jacha' ri cuban jun coj cuq'uiak rib je quinban na in aretak quinq'uiak wib chrij ri Eprain xukuje' chrij ri Juda; kas in quebenmuch tak canok, quinbextax c'ut; quebenmajij tak na, man c'o ta c'u jun jachin ta quebesan pa nu k'ab.

¹⁵ Quintzelej na pa ri nu c'olbal, c'ä chquich'obo na ri qui mac chepet c'u che nu tzucuxic. ¡Aretak c'u e c'o chupam ri qui c'axc'olil, quinquitzucuj na!”