Ri Osey 2 - Quiché Bible

¹ Quibij c'u na ix chque tak ri e iwachalal: “U tinimit ri Dios, chque tak c'ut ri e iwana'b: Tok'obisam i wäch.”

Ri man u jiquil taj ri tinimit Israel

² Ri Ajawaxel cubij: “¡Chic'ulelaj ri i nan, chic'ulelaj, rumal rech chi ri are man wixokil ta chic mawi ri in man in ta chi rachajil! ¡Chuk'ila' c'u u c'utic rib jacha' ri quech ri nim ch'utin! ¡Chebupakchi'j tak ri e rach ch'aben cho tak u c'u'x!

³ We man cubano quinchanaba' na canok: je quenbana' che jacha' ri k'ij ri xalaxic, quinban na che chi cux na jun chaki'j uwo sak, pa jun puc'uc' ulew, quinban c'u na che chi cäcäm rumal chaki'j chi'.

⁴ Man quel ta na nu c'u'x chque ri e ral alabom, e u wächinic c'ut ri u mac ri quech ri nim ch'utin.

⁵ Ri qui nan xux quech ri nim ch'utin; xutzak ri u nimarisaxic u k'ij, aretak je xubij wa: ‘quinbe na che quitzucuxic tak ri wach ch'aben, ri queyo'w nu wa wuq'uia', ri rismal nu chij xukuje' ri nu sakloloj atz'iak lino, ri waseit xukuje' tak ri wuq'uia'.’

⁶ Rumal ri' q'uix tak quintz'äpibej ri u be quincoj c'u na jun k'atibal chrij, man queburik ta c'u na tak ri e alaj tak u be.

⁷ Quebuterenej na tak ri rach ch'aben, man c'u cäcuin ta chic che qui k'iic; quebutzucuj na, man c'u queburik ta chic. Cubij c'u na: ‘Quintzelej na ruc' ri nabe wachajil, are c'u utz na ri nu c'aslemal ruc' are nabe chuwäch ri camic.’

⁸ Are c'u we ixok ri' are' man xuc'oxomaj taj chi in ri' ri quinyo'w ri trico che, ri u wa'l uva xukuje' ri aseit; chi in ri' ri xintz'eben ri sak puak xukuje' ri k'an puak che ri xebubanbej tak ri e u diosib.

⁹ Rumal c'u ri', quentokij quinmajij c'u na ri nu trico xukuje' ri u wa'l nu uva pa ri u k'ijol ri u wächinic, quinmulij c'u na ri rismal nu chij xukuje' ri nu sakloloj atz'iak lino, ri xinya' che u ch'ukic rib.

¹⁰ Chquiwäch tak ri rach ch'aben quinya' na ri u t'analiquil chisakil. ¡Man c'o ta cäto'tajisan na pa nu k'ab!

¹¹ Quinq'uis na tzij puwi' ri u jajatem, ri e u nimak'ij tak xukuje' ri c'ac' tak ic', xukuje' tak ri e u k'ij re uxlanem xukuje' conojel tak ri e u nimak'ijanic.

¹² Quinsachisaj na qui wäch ri uva ri e u ticom xukuje' ri e u che'al tak u higo, ri xebubij: ‘E are tak tojbal wech wa' ri xequiya' tak ri wachijab chwe.’ Quinban na chque chi quebux patzapak tak che' quetijowisax c'u na cumal juyubal tak awaj.

¹³ Quenc'äjisaj na u wäch rumal che ri k'ijol ri xoc'owic xuchi'j c'u c'oc' k'ol chque tak ri diosib, aretak quebuwik rib c'uc' tak mulk'ab xukuje' tak chachal che qui ternexic tak ri rachijab, xinusach c'u pa u jolom. In ri Ajawaxel, nu jiquibam u bixic.”

Ri Dios culok'ok'ej ri u tinimit Israel

¹⁴ “In quentaquej na: quinc'am na bic chupam ri chaki'j uwo sak quinch'abej c'u na ri ranima'.

¹⁵ Quebentzelej tak c'u na ri uva ri e u ticom, quinq'uex c'u na ri beya' re Acor pa oquibal re eyebal c'uxaj che. Chila' cutzelej wi na u wäch ri quinbij che jacha' pa ri ralc'alal, jacha' ri k'ij aretak xel ulok pa Ejipt.

¹⁶ C'äte c'u ri' ‘wachajil’ cächa' na chwe, che u q'uexwäch ri nu binaxic rumal nu ‘Baal’, In ri Ajawaxel quinjiquiba' u bixic.

¹⁷ Quebenwesaj c'u na chquichi' ri e qui bi' tak ri e baal, mawi c'u jumul chenatax ta chi na.

¹⁸ Pa ri k'ij ri' quinban na che u tok'obisaxic u wäch ri Israel jun c'ulwächinic cuc' tak ri juyubal tak awaj, cuc' tak ri chicop ri e c'o qui xic' xukuje' cuc' tak ri cumätz; quinc'äjij na xukuje' quinwesaj na che we ulew ri' ri q'uiakbal ch'ab, ri ch'ich' re ch'o'j xukuje' ri ch'o'j, rech cuxlan ri nu tinimit pa jamaril.

¹⁹ Israel quinban na chawe chi catux wixokil chbe k'ij sak, kas wixokil je jas cubij ri pixab, sibalaj c'u at nu lok'ok'em ruc' ronojel wanima'.

²⁰ In quinban na chawe chi catux wixokil quinux c'u na jic awuc', are c'u ri at cawetamaj chi na chi in ri' ri Ajawaxel.

²¹ In, ri Ajawaxel, quinjiquiba' u bixic: Pa ri k'ijol ri' ri in quintzelej na u bixic che ri caj, are c'u ri caj cutzelej u bixic che ri ulew;

²² ri ulew cutzelej na u bixic che ri trico che ri u wa'l uva xukuje' che ri aseit, ri e are' caquitzelej na u bixic che ri Jezreel.

²³ Quintiquiba' na ri nu tinimit pa ri ulew ri xuwi ri in in ajchak'e; quintok'obisaj c'u na u wäch ri Lo-ruham, xukuje' ri Lo-ami quinbij na che: ‘At ri' ri nu tinimit’, ri are' c'ut cubij na chwe: ‘¡Lal ri' ri nu Dios!’ ”