Ri Osey 12 - Quiché Bible

¹ “Ri Eprain quiakik' cutukbej rib; ronojel ri jun k'ij cäbe chrij ri quiakik' re elebal k'ij. Quebunimatajisaj tak ri e u banoj tak tzij xukuje' tak ri e u tokinic, quebuban tak c'ulwächinic ruc' ri Asiriy quebutak c'u bic tak sipanic re aseit pa Ejipt.”

² Ri Ajawaxel u cojom ri Israel pa ch'o'j. Cuc'äjisaj u wäch ri u tinimit ri Jacob u mac rech ri itzel u c'aslemal; cuya' rajil u c'axelal che jacha' ri e takal chque tak ri e u banoj.

³ C'ä majok c'u ne chalaxok, ri Jacob xutokij ri u c'olbal ri rachalal, aretak c'u achi chic xutij u chuk'ab ruc' ri Dios.

⁴ Xutij u chuk'ab ruc' jun aj cajalaj u tako'n ri Dios, xcuin c'u che u ch'äquic, xok'ic xutz'onoj chi chel u c'u'x che. Xrik rumal ri Dios pa Betel xtzijon c'u ruc' chila'.

⁵ Ri Ajawaxel, ri Dios ri c'o ronojel u cuinem: ¡Ajawaxel ri u bi'!

⁶ Je ba' ri', Israel, chattzelej ruc' ri a Dios; are' chabana' ri jicomal xukuje' ri suq'uilal; chajiquiba' c'u a cux amak'el chrij ri a Dios.

⁷ Jewa' cubij ri Ajawaxel: “Ri Canaan e c'o tak pajbal pa u k'ab ri e c'o tak qui jech' cäkaj c'ut ri t'orinic chuwäch.

⁸ Ri Eprain je cubij wa': ‘¡Je, in k'inomarinak, nu rikom jun k'inomal ri c'utalic; man c'o ta c'u jachin cäbin ta tzij chwij chi e nu rikom ri e nu ch'äcoj cumal tak subunic!’

⁹ In, ri Ajawaxel, ri in a Dios kas aretak xatjeki' can pa Ejipt, quinban na chawe chi catjeki' chi jumul pa tak lic'om ja re be, jacha' ri aretak xkarik kib pa ri chaki'j uwo sak.

¹⁰ In xebentzijobej ri e k'axal tak nu tzij xeben q'uiyirisaj ri e cajilabal ri e qui c'utwächinic, cumal tak wa' xebenbij c'ambal tak no'j.

¹¹ Pa Galaad e c'o diosib ri quequik'ijilaj tak ri winak ri xa e subunelab. Pa Jilgal quechi'x tabal tak tok'ob que ama'ib tak wacax; ri e qui porobal xa' e jacha' jumulaj tak abaj ri e c'o xo'l tak ri bolaj pa tak ri ulew.”

¹² Ri Jacob xanimajic xbe pa tak ri ulew re Aram, chila' c'ut, xpatanij wi che u ch'äquic ri rixokil, xchacun che qui yuk'uxic chij.

¹³ Rumal jun k'axal tzij, ri Ajawaxel xresaj ulok ri tinimit Israel pa Ejipt; ¡rumal c'ut jun k'axal tzij, xuchajij!

¹⁴ Ri winak aj Eprain quiyacom royowal ri Ajawaxel, qui yo'm jun c'ayilaj yojtajem che. Rumal ri' ri Ajawaxel cuban na chque chi quequitoj tak ri il patan ri e banom, cuban c'u na chque chi quekaj ri kas e quetzelal paquiwi'.