Ri Osey 10 - Quiché Bible

Qui tuquixic ri e u porobal tak ri israelib

¹ Ri Israel xak junam ruc' juwi' uva nojinak chque uva; joropa' c'ut ri e u q'uial ri e u wächinic, jeri' xukuje' ri e u q'uial ri e u porobal ri xebubano, joropa' c'ut ri u je'lical na ri culew, e c'o na ri e qui je'lical ri e tastalicalaj tak abaj ri quequik'ijilaj.

² Ri Israel quieb u banom ri ranima', are c'u ri camic coc na che u tojic ri u mac. Ri Ajawaxel quebusachisaj na qui wäch tak ri qui porobal quebut'akij tak na ri cabaj ri e tastalic.

³ Camic we tinimit ri' cubij na: “Man c'o ta kajawinel rumal rech chi man nim ta cakil wi ri Ajawaxel. ¿Jas ta c'u lo ri cacuin wi jun ajawinel cuban ta na chke?

⁴ Xak xuwi ri tzijtzotem, chi'nic tak ri e xak lok' xukuje' qui tz'ibaxic tak c'ulwächinic; ri u suq'uilal xak junam ri' ruc' juwi' k'ayes ri cäcämisanic ri caq'uiy xo'l tak ri bolaj chupam ri ulew.”

⁵ Ri winak aj Samar cabirbobic; cärok'ej chi cäsach u wäch ri alaj ama' wacax ri c'o pa Bet-aben. Rumal are' cajuyuw ri tinimit xukuje' tak ri e cojol tabal tok'ob, rumal rech chi sachinak u wäch ri u juluwem.

⁶ Xukuje' c'u ne ri kas alaj ama' wacax cäc'am na bic pa Asiriy che u chi'xic che ri nimalaj ajawinel. Jeri' ri Eprain cäcanaj na pa ri q'uixbal: ri Israel caq'uix na che ri u dios.

⁷ Cäsach na u wäch ri ajawinel re Samar jacha' jun u xe'r che' ri cälew puwi' ri ja'.

⁸ Casachisax na qui wäch tak ri e k'ijilabal ri quek'ijilax wi tak diosib jawije' ri camacun wi ri Israel, paquiwi' tak ri qui porobal queq'uiy na tak tzacom xukuje' tak q'uix, e are' tak c'ut ri winak quequibij na chque tak ri c'ache'laj: “¡Chujichuku'!”, xukuje' c'u chque ri tac'atak tak juyub: “¡Chixkaj pakawi'!”

Ri c'äjisaxic u wäch ri Israel rumal ri Ajawaxel

⁹ Cacha' ri Ajawaxel: “Ri Israel man u tanabam ta macunic c'ä aretak xuchaplej ulok u banic pa Gabaa. ¡Jekel pa ri u mac! Rumal ri', ri ch'o'j cäkaj na paquiwi' ri e itzel tak winak ri' aj Gabaa.

¹⁰ Quinc'äjisaj na u wäch we tinimit ri' aretak chinwaj. Quebenmulij na nimak tak tinimit chrij aretak chinc'äjisaj u wäch rumal ri retzelal.

¹¹ Ri Eprain are' can jacha' jun alaj ati't wacax ri manxoyirisam ri cäkaj chuwäch cuyak' ri trico. In nu cojom eka'bal camic chrij ri je'licalaj u kul, rech cujuruj ri carwaj; are' c'u ri Juda cujuruj na ri tajibal, are' c'u ri Jacob cujuruj na ri cowilaj ulew.

¹² Xinbij chque: ‘Chitica' ix ri suq'uilal chiyaca' c'u wächinic re lok'ok'ebal c'uxaj. Chic'upu' ri ulew che jun c'ac' tico'n, are' c'u k'ij wa' che u tzucuxic ri Ajawaxel, c'ä cäpe na cuc'am c'u ulok ri jäb re to'tajem piwi'.’

¹³ Are c'u ri ix are i pok'isam u wäch ri etzelal, i yacom ri u wächinic ri man suq'uilal taj e i tijom c'ut ri e u wächinic ri banoj tzij. Rumal rech chi xa cuba' a c'u'x chquij tak ri e a carwaj re ch'o'j, xukuje' chquij ri q'uialaj awajch'ojab,

¹⁴ e c'o yojcorem chquixo'l tak ri e a winak conojel tak c'ut ri to'bal tak awib quetolorisax na, jacha' ri u tolorisaxic ri Bet-arbel ri xuban ri ajawinel Salman pa ri k'ij ri xban ri ch'o'j, aretak xnepnobisax ri nanaxel e rachil tak ri alc'ualaxelab.

¹⁵ Je c'u wa' xukuje' qui c'ulmaj na ix ri ix jekel pa Betel, rumal rech ri nimalaj iwetzelal. ¡Ri ajawinel re Israel cäcäm na aretak cäpe u sakaric!”