Ri Osey 1 - Quiché Bible

Ri rixokil xukuje' ri e u c'ojol ri Osey

¹ Are tzijol wa' ri xuya' u bixic ri Ajawaxel che ri Osey (ri Beeri are' ri u tat ri Osey) pa tak ri u k'ijol ri Uziy, ri Jotam, ri Acaz xukuje' ri Ezequiy, ajawinelab tak re Juda, xukuje' pa tak ri u k'ijol ri Jeroboam rajawinel ri Israel (ri Joas are' ri u tat ri Jeroboam).

² Ri Ajawaxel je u chaplexic u ya'ic wa' ri xraj xuya' u bixic ruc' ri u to'banic ri Osey: “Ri winak ri e c'o pa rulew ri Israel quibanom ri qui mac ri e quech ri nim ch'utin, qui tasom quib chwij, in quiyo'm canok. Je c'u chabana' at, jät chac'ama' jun ixok quech nim ch'utin che awixokil, chec'ol c'u a c'ojol ruc'; jeri' we alabom ri' quebux na ral jun ixok quech nim ch'utin.”

³ Ri Osey xuc'am c'ut ri Gomer, ri u mia'l ri Diblaim che rixokil, xux c'u yawab winak xralaj c'ut jun u c'ojol.

⁴ Xubij c'ut ri Ajawaxel che ri Osey: “Chacojo Jezreel che ri u bi' ri alaj ala, xa' c'u pa quieb oxib k'ij quenc'äjisaj qui wäch ri e rija'lil ri ajawinel Jehu qui mac quech tak ri il patan ri xebuban pa Jezreel, quenq'uisa' c'u na tzij puwi' ri rajawinic ri Israel.

⁵ Pa ri k'ij ri' quinsachisaj na pa ri beya' re Jezreel, ri nimalaj u cuinem ri Israel ri c'o che u banic ch'o'j.”

⁶ Ri Gomer xux chi yawab winak jumul xralaj c'u jun alaj ali. Ri Ajawaxel xubij che ri Osey: “Chacojo' Lo-ruham che u bi' ri alaj ali rumal rech chi man quel ta chi na nu c'u'x che ri rajawibal ri Israel. Man quinsach ta qui mac.

⁷ Are' c'u quel na nu c'u'x che ri rajawinic ri ri Juda: kas in, ri Ajawaxel ri u Dios, quinto'tajisaj na. Man quebeto'tajisaj ta c'ut rumal ri ch'o'j, xane' quinban na man ruc' ta q'uiakbal ch'ab, mawi ch'ich' re ch'o'j, mawi tak quiej, mawi tak ajquiejab.”

⁸ Aretak estajinak chic ri Lo-ruham puwi' ri tu', ri Gomer xux chi yawab winak jumul xc'oji' c'u jun ral ala.

⁹ Xubij c'ut ri Ajawaxel che ri Osey: “Chacojo' Lo-ami che u bi' ri alaj ala, rumal rech chi ri ix man ix ta chic nu tinimit mawi ri in man in ta chic i Dios.”

Ri rutzirisaxic ri tinimit Israel

¹⁰ Cäpe jun k'ij aretak ri aj israelib quebux na jacha' ri e u sanyebil ri plo, ri man c'o ta jachin ta jun cacuin ta che u pajic mawi rajilaxic. Che c'u u q'uexwäch che u bixic chque: “Ix man ix ta chi nu tinimit”, ri Dios cubij na chiwe: “Ix ix ralc'ual ri c'aslic Dios.”

¹¹ Caquimulij c'u na quib ri winak aj Juda xukuje' aj Israel, caquicoj c'u na jun c'amal qui be ri xa' jun, pa conojel c'u c'olbal quetzelej wi na ulok quebeljekel pa Jerusalen. ¡Cux c'u na nim ri u k'ij ri Jezreel!