Ri Nehemiy 9 - Quiché Bible

Ri Esdras cuk'alajisaj tak ri u mac ri Israel

¹ Pa ri k'ij juwinak quiejeb (24) re ri rajilabal ri ic' ri', ri aj israelib xquimulij quib man xquitij ta qui wa; xecatz'iakila' tak quib cuc' wakwoj tak atz'iak, xquijopij c'u ulew pa qui jolom.

² Xequitasala' c'u tak quib chque tak ri ija'lil ri man e qui winakil taj, xetaq'ui'c, xquicoj quib chuxe' ri kas qui mac xukuje' ri quech ri e qui mam.

³ E tac'atoj c'ut chupam ri qui c'olbal, oxib hor xbeytaj u siq'uixic ri u pixab ri Ajawaxel chquiwäch conojel, xebeytaj chi c'u na oxib hor che u k'alajisaxic ri qui mac xek'ijilan c'u che ri Ajawaxel.

⁴ Chwi chi c'ut ri aj levitib ri Jexu, ri Binuy, ri Cadmiel, ri Sebaniy, ri Buni, ri Serebiy, ri Bani xukuje' ri Quenan xepaki' puwi' ri tac'alibal re tz'alam, xquiya' c'u u k'ij ri Ajawaxel ri qui Dios cuc' rakoj tak chi'aj;

⁵ xquibij ri aj levitib ri Jexu, ri Cadmiel, ri Binuy, ri Hasabniy, ri Serebiy, ri Hodiy, ri Sebaniy xukuje' ri Petaiy: “Chixwalijok, chik'ijilaj ri Ajawaxel ri i Dios ri c'o amak'el chbe k'ij sak. ¡Chyok u k'ij, cuc' tak tewichibal xukuje' tak k'ijilanic, ri nim xukuje' ri juluwemalaj u bi'!”

⁶ Xubij c'ut ri Esdras: “Lal ri' ri Ajawaxel, man c'o ta chi c'u jun. Lal xbanow la ri caj xukuje' ri sibalaj chicaj na che ri caj, xukuje' conojel tak ri e u ch'imil; xban la ri ulew xukuje' ronojel ri c'o chuwäch, ri plo xukuje' ronojel ri e c'o chquipam. Lal cäyo'w la qui c'aslemal conojel ri jastak. Rumal ri' cäk'ijilax la cumal tak ri ch'imil re ri caj.

⁷ Lal, Ajawaxel, lal ri Dios ri xacha' la ri Abram; lal xesan la ulok pa Ur, qui tinimit ri aj caldeyib, xcoj c'u la Abraham che u bi'.

⁸ Xil la chi u jiquibam u c'u'x chij la, xban la jun c'ulwächinic ruc': chi cäya' la chque ri rija'lil ri culew ri aj cananeyib, ri aj hititib, ri aj amoreyib, ri aj perezeyib, ri aj jebuseyib xukuje' ri aj jerjeseyib; ¡Tz'akatisam ri tzij la, amak'el c'ut cätz'akatisaj la!

⁹ Lal xil la ri rikoj c'ax ri xquirik ri e ka mam pa Ejipt, xtatabej c'u la ri qui juyuwem chuchi' ri Quiäk Plo.

¹⁰ Xeban la nimak tak etal xukuje' tak mayibal che u c'ulelaxic ri paraon, xukuje' che qui c'ulelaxic ri e pataninel tak rech xukuje' conojel tak ri winak re ri rulew, rumal rech chi xil la ri c'axc'olil ri xquiban we winak ri' chque ri aj israelib. Xban c'u la chi xnimarisax ri k'ij la jacha' ri u banom camic.

¹¹ Xpac la ri plo chquiwäch, xeboc'ow c'u chuxo'l pa chaki'j ulew; xejik'isaj la ri e okataninak c'ä chuxe' ri plo, e jacha' jun abaj ri cäkaj chuxe' ri ja'.

¹² Xc'am c'u la qui be pa k'ij rumal jutac'aj sutz' are c'u ri chak'ab rumal jutac'aj k'ak', che u c'utic ri qui be ri caquitakej na.

¹³ Xkaj chi c'u la ulok puwi' ri juyub Sinai, xch'aw chi la ulok cuc' kas chicaj; xya' la suc'alaj tak pixab chque ri e tz'ibatalic, tijonic tak ri e colom, utzalaj pixab tak, utzalaj tak takomal.

¹⁴ Xetijoj c'u la che u tasic ri k'ij re uxlanem che la, xeya' c'u la tak takomal chque, tijonic tak ri e colom, pixab tak xukuje' tak tijonic rumal ri pataninel ech la ri Moises.

¹⁵ Xya' c'u la wa chque ri petinak chicaj che resaxic ri qui wi'jal xukuje' qui ja' ri xel chupam ri nimalaj abaj che u cämisaxic ri qui chaki'j chi'. Xbij c'u la chque chi cheboc che jekelem chupam ri ulew ri chi'm la chque.

¹⁶ Ri e are' xukuje' tak ri e ka mam xquiban nimal, xquicowirisaj quib, man xquiya' ta c'ut qui k'ij ri e takomal la.

¹⁷ Man xcaj taj xenimanic mawi xenataj chque ri nimak tak jastak ri xeban la che qui to'ic. Sibalaj c'u e c'osirinak chi xquicoj jun c'ämal qui be ri xec'amow ta bic che qui tzelejic chic pa ri patanijic pa Ejipt. Lal c'ut jun Dios ri sachal macaj, jun Dios ch'uch'uj, ri xukuje' quel u c'u'x, coch'onel xukuje' ronojel c'u ri lal lal lok'ok'ebal c'uxaj, man c'u xewonoba' ta la canok.

¹⁸ Mawi c'u ne aretak xquiban jun alaj ama' wacax re porom ch'ich'; xecha' c'ut chi are' dios wa' ri xebesan ulok pa Ejipt, xequiban c'u nimalaj tak etzelal.

¹⁹ Lal, rumal ri nimalaj elebal c'u'x la, man xewonoba' ta la can chupam ri chaki'j uwo sak. Ri jutac'aj sutz' man xutas ta rib chque pa k'ij che u c'amic qui be che ri qui be, mawi ri jutac'aj k'ak' chak'ab che u tununisaxic ri be ri rajawaxic u takexic cumal.

²⁰ Xya' c'u ne la que ri utzalaj uxlabal la che qui tijoxic; mawi jumul ma ta xopan ri jaswa' pa qui chi' ri xtak la ulok chque, xaya' la qui ja' che resaxic ri qui chaki'j chi'.

²¹ Cawinak (40) junab xbeytaj ri qui tzukic umal la chupam ri chaki'j uwo sak, mawi ta c'u ne jumul c'o ta ri xajwataj ta chque; mawi xejar ta ri catz'iak chquij mawi xesipoj ta ri cakan.

²² Xejach la ajawibal xukuje' nimak tak tinimit pa qui k'ab, xejach c'u la pa ch'akatak chquiwäch, xquiban c'u quech che ri Hesbon, rulew ri ajawinel Sehon; xukuje' xquiban c'u quech che ri Basan, rulew ri ajawinel Og.

²³ Xban la chi sibalaj xepok' tak ri e qui c'ojol e jacha' ta ne ri ch'imil ri e c'o chicaj, xec'am c'u la bic che u banic quech che ri ulew, ri chi'm la chque ri e qui mam chi caquiban quech che.

²⁴ Xeboc c'ut ri e are', xquimaj ri ulew Canaan; xemach'irisaj c'u la ri winak ri e jekel pa we ulew ri', xukuje' tak ri e cajawinelab e are' c'ut ri winak ri e jekel pa we c'olbal ri', xejach la pa qui k'ab rech caquiban chque jachique ri cäcaj.

²⁵ Xukuje' xequiban quech chque tak ri tinimit ri e c'o tak tapia chquij xukuje' tak ulew ri sibalaj e wächinelab, u ja tak ri e nojinak je'lalaj tak jastak chquipam, c'ua' tak, ticbal tak uva, u che'al tak aseitun, xukuje' niq'uiaj wächinel tak che' chic; xewa'ic c'ä xenoj na, xechomakaric, xequicot ruc' ri nimalaj utzil la.

²⁶ Man c'u xeniman taj, xquiwalijisaj quib chij la, xquetzelaj u wäch ri pixab la, xequicämisaj tak c'ut ri e k'axal tak tzij la, ri xequitzujuj tak chisak xquibij c'u chque chi chetzelej uc' la, xequiban c'u nimak tak macaj chwäch la.

²⁷ Rumal ri' xejach la pa qui k'ab ri qui banom qui c'ulel chque, rech caquiban c'ax chque. Chi' c'ut aretak e c'o chupam ri qui rikoj c'ax, xquitz'onoj ri to'banic la, are c'u ri lal, rumal ri nimalaj tok'obisam wächaj la, xeto'w la ulok kas chicaj; xeya' la achijab chque ri xeto'tajisan pa qui k'ab ri xebanow tak c'ax chque.

²⁸ Aretak c'u ne e c'o chi pa jubik' jamaril, quetzelej chi jumul che u banic ri etzelal chwäch la; rumal ri' xya' la c'olbal chi quekaj pa qui k'ab ri qui c'ulel, ri xequiban c'ax chque. Caquitz'onoj chi c'u ri to'banic la, are c'u ri lal, lal nojinak che tok'obisam wächaj, quetatabej la ulok kas chicaj, q'ui c'u mul xeto'tajisaj la.

²⁹ Xcoj chuk'ab la che u bixic chque chi chequitz'akatisaj chi jumul qui banic tak ri pixab la; e are c'ut ri e are' xquicojo chi man c'o ta cajwataj chque man xeboc ta c'u il che qui nimaxic tak ri e takomal la; man nim ta c'u xequil wi ri e tz'ibam tak wi ri e pixab la, ri quequiya' c'aslemal chque ri quebanowic; man xetan ta tzij e c'osc'obinak, man xeboc ta c'u il.

³⁰ Q'ui junab c'ut xecoch' la, xepixbej c'u la rumal ri uxlabal la, xukuje' cumal tak ri e k'axal tak tzij la; man c'u xeboc ta il, rumal ri' xejach la pa xquicowirisaj c'u quib qui k'ab tak ri nimak tak tinimit ri e c'o cho ri uwächulew.

³¹ Rumal c'u rech, ri nimalaj tok'obisam wäch la man xsachisaj ta la qui wäch conojel, mawi xewonoba' ta la canok; lal c'ut jun Dios ch'uch'uj ri catok'obisan la wächaj.

³² Are c'u ri camic, ka Dios, nimalaj Dios, cuinel xukuje' xibibal, jekebam c'u la ri c'ulwächinic xukuje' ri nimalaj lok'ok'ebal c'uxaj la, xak ba maca'y la chque tak ri c'axc'olil ri e kajinak pakawi' paquiwi' tak ri kajawinelab, ri e c'amal tak ka be, ri e ka cojol tabal tok'ob xukuje' tak ri e k'axal tak tzij la, xukuje' ri e ka mam, xukuje' che ronojel ri tinimit, kas pa tak ri qui k'ijol tak ri ajawinelab re Asiriy c'ä pa ri k'ij camic.

³³ Pune' c'u je c'ulmatajinak wa', ri lal, lal ch'ajch'oj che chak'maquil; ri lal, banom la wa' ruc' jiquilal, are c'u ri uj ka banom ri etzelal.

³⁴ Mawi tak ri e kajawinelab, c'amal tak ka be xukuje' tak ri e ka cojol tabal tok'ob, mawi ri e ka mam, xquitz'akatisaj taj ri pixab la, mawi xeboc ta il che qui nimaxic tak ri e takomal la xukuje' tak ri e pixbenic la chque.

³⁵ Man je ta c'u xc'ulmataj pa tak ri cajawinic, pune' c'u sibalaj q'ui ri utzil ri xya' la chque, xjach c'u ne la ri nimalaj ulew pa qui k'ab, ri sibalaj wächinel, man c'u xek'ijilan ta che la mawi xequitzak ta can ri e itzel tak qui banoj.

³⁶ Ca'y ba' la chke camic, uj uxinak c'ayim tak pataninelab kas chupam ri ulew ri xya' la chque ri e ka mam rech caquitzuk na quib chque tak ri u wächinic xukuje' tak ri rutzil.

³⁷ Ri sibalaj cäwächin ruc' tz'ebenic ri quetakal pa qui k'ab tak ri ajawinelab, rumal quech tak ri ka mac, e cojom la pakawi'. Ri uj xukuje' tak ri e ka waj uj c'o pa qui k'ab, rech caquiban chke jachique tak ri cacaj. Rumal ri' sibalaj c'ax ka rikom.”

Ri qui c'ulwächinic ri winak che u tz'akatisaxic ri pixab

³⁸ Pune' c'u je c'ulmatajinak wa' ri uj cakatz'ibaj jun je'licalaj c'ulwächinic, ri wuj ri t'ikom caquicoj qui bi' ri e c'amal tak ka be che, ri aj levitib xukuje' tak ri e cojol tabal tok'ob.