Ri Nehemiy 8 - Quiché Bible

Cäya' u siq'uixic ri pixab chquiwäch conojel

¹ Aretak xpe ri uwuk ic', ri aj israelib e jekejoj chi chquipam tak ri qui c'olbal. Conojel c'ut ri winak chnimalaj conojel xequimulij quib chuwäch ri c'ayibal ri c'o chuwäch ri Roquibal ri Ja', xquibij c'u che ri ajtij Esdras chi chuc'ama' ulok ri wuj ri tz'ibatal wi ri u pixab ri Moises, ri u yo'm ri Ajawaxel che ri Israel.

² Chupam ri nabe k'ij re ri uwuk ic', ri Esdras ri cojol tabal tok'ob xuc'am ulok ri u wujil ri pixab chquiwäch ri q'uialaj winak ri qui mulin quib, achijab, ixokib xukuje' conojel ri quechoman chic;

³ kas ak'abilal c'ut xuchaplej u siq'uixic chquiwäch conojel ri winak c'ä pa ri tiq'uil k'ij, chuwäch ri c'ayibal ri c'o chuwäch ri Roquibal ri Ja'. Conojel ri winak xeboc il che u tatabexic ri cubij ri wuj ri tz'ibatal wi ri pixab.

⁴ Ri ajtij Esdras xtaq'ui'c puwi' jun tac'alibal re tz'alam ri xban che u ya'ic u siq'uibal wa'. Xukuje' xetaq'ui pa ri riquiak'ab ri Matatiy, ri Sema, ri Aniy, ri Uriy, ri Hilsiy xukuje' ri Maasiy. Pa ri u mox k'ab xetaq'uic ri Pedaiy, ri Misael, ri Malquiy, ri Hasum, ri Hasbadan, ri Zacariy xukuje' ri Mesulam.

⁵ Are' c'u ri Esdras xujak ri wuj chquiwäch conojel ri winak, tac'al c'u chicaj rech cuya' quilitaj cumal conojel ri winak; aretak c'u xujako conojel ri q'uialaj winak xetaq'ui'c.

⁶ Ri Esdras xuk'ijilaj c'ut ri Ajawaxel, ri Dios ri c'o ronojel u cuinem, ronojel c'ut ri tinimit ruc' ri qui k'ab quiwalijisam chicaj, xquitzelej u bixic: “Je' chbanok, je chbanok.” Xquimej c'u quib c'ä xquiya' ri qui palaj cho ri ulew, xquik'ijilaj c'ut ri Ajawaxel.

⁷ Ri aj levitib ri Jexu, ri Bani, ri Serebiy, ri Jamin, ri Acub, ri Sabetay, ri Hodiy, ri Maasiy, ri Kelit, ri Azariy, ri Josabed, ri Hanan xukuje' ri Pelai xquiban u bixic ri pixab chque ri tinimit. Ri winak xecanaj pa ri qui c'olbal,

⁸ ri e are' co caquirak qui chi' che u siq'uixic u wäch ri wuj ri tz'ibatal wi ri u pixab ri Dios, xquiya' c'u u bixic chque ri kas quelcubij, xquik'axej pa ri qui ch'abal rech kas caquich'obo.

⁹ Ronojel c'ut ri tinimit cok'ic aretak xuta' ri xubij ri pixab; are' c'u ri takanel Nehemiy, ri Esdras (ri ajtij xukuje' cojol tabal tok'ob), xukuje' tak ri aj levitib ri caquik'alajisaj ri pixab chuwäch ri tinimit, xquibij chque conojel chi mebisonic mawi mebok'ic, rumal rech chi ri k'ij ri' tasom che ri Ajawaxel, ri i Dios.

¹⁰ Xubij chi na ri Esdras chque: “Jix, jebe i tija' utzalaj tak jastak, chiwuq'uiaj qui' u wa'l uva chebiwula'j jachin tak ri man c'o ta qui suc'umam, jun k'ij c'u wa' ri tasom che ri Kajawaxel ri ka Dios. Man quixbison taj, are c'ut ri u quicotemal ri Ajawaxel are cayo'w ka chuk'ab.”

¹¹ Xukuje' tak ri aj levitib xequik'il ri winak, chixtanalok xecha' c'u chque, mixok' chi c'ut, rumal rech chi are jun k'ij ri tasom che ri Ajawaxel.

¹² Conojel c'ut ri winak xebe che wa'im xukuje' che uq'uianic, xeculala' c'u tak quib xcoc'owisaj c'ut jun nimalaj nimak'ij, xquich'ob c'ut ri e tijom wi.

Roc'owisaxic ri nimak'ij quech tak ri Cäbal

¹³ Chucab k'ij, conojel ri e c'amal tak be que jujun ja winak, xukuje' tak ri e cojol tabal tok'ob, xukuje' tak ri aj levitib xquimulij quib ruc' ri ajtij Esdras che retamaxic ri kas cubij ri pixab,

¹⁴ xquirik c'ut chi tz'ibatal chupam chi ri Ajawaxel u yo'm takanic rumal ri Moises chi, aretak coc'owisisax ri nimak'ij re ri uwuk ic', ri aj israelib rajawaxic quec'oji' chquipam tak cäbal.

¹⁵ Pa conojel tak c'ut ri tinimit xukuje' pa Jerusalen, xya' u bixic chi ri winak cheboj pa tak ri juyub che qui tzucuxic qui k'ab tak u che'al aseitun, k'echop, tut o apachique chic jun che' ri cäjat'at' u xak che qui woquic qui cäbal, je jas ri tz'ibatal chupam ri pixab.

¹⁶ Xebel c'u bic ri winak, xetzelej ulok e cuc'am c'u ulok qui k'ab tak che' ri utz che qui woquic tak qui cäbal paquiwi' tak ri ja chquiwäch tak ri ja jacha' xukuje' chuwäch ri uwo ja re ri rachoch Dios, pa ri c'ayibal ri c'o chuwäch ri Roquibal ri Ja', xukuje' pa ri c'ayibal ri c'o chuwäch ri Oquibal aj Eprain.

¹⁷ Conojel c'ut ri q'uialaj winak ri xquiya' can ri Babilon ri xtzelej ulok xequiban tak cäbal, xec'oji' c'u chquipam, pa ri u k'ijol ulok ri Josue u c'ojol ri Nun, c'ä pa ri k'ij ri' man banom taj we jasach ri'. Xc'oji' c'ut jun nimalaj quicotemal.

¹⁸ Wukub k'ij c'ut xbeytaj roc'owisaxic ri nimak'ij cumal re k'ijilanic; kas pa ri nabe k'ij c'ä pa ri q'uisbalil, ri Esdras k'ij chi k'ij xebuya' qui siq'uibal ri tijonic ri e c'o chupam ri wuj ri tz'ibatal wi ri u pixab ri Dios; pa ri uwajxak k'ij xban jun mulin ib ri sibalaj nim u banic, je jas ri nak'atisabal ri nak'atisam u banic.