Ri Nehemiy 5 - Quiché Bible

C'o c'axc'ol chquixo'l ri winak

¹ Xwalij jun c'ulelam ib cumal ri achijab xukuje' cumal ri quixokil chquij tak ri aj judeyib ri e qui winakil,

² jujun jera' xquibij chi sibalaj e q'ui ri calc'ual e c'olic, alabom xukuje' alitomab, cajwataj c'ut u rikic qui trico rech man quec'am ta che wi'jal;

³ jule' chic jera' xquibij chi rumal rech chi man c'o ta caquitijo xquijal puak puwi' tak ri culew, puwi' ri uva ri quiticom, xukuje' puwi' tak ri cachoch;

⁴ jule' chic jera' caquibij chi qui jolom puak che u tojic ri alcabal pa u k'ab ri ajawinel, are c'u xquiya' can tak ri culew che u tojic xukuje' tak ri uva ri e qui ticom. Caquibij c'ut xukuje':

⁵ “Ri e ka winakil tak xukuje' ri uj kachalal tak kib; ri e ka c'ojol man c'o ta jas caquijalbej ta quib coc' tak ri quech. Are c'u ri uj quekajach na tak ri e ka c'ojol xukuje' tak ri e ka mia'l pa ri patanijic. Kas c'u ne tzij, jujun chque ri e ka mia'l lok'om pataninelab chic, man c'o ta c'u jas ta cujcuin ta che u banic che quitoric, rumal rech chi ri e kulew xukuje' tak ri uva ri e ka ticom e c'o chic pa qui k'ab jule' tak winak chic.”

⁶ Aretak xinta' ri qui tzujunic xukuje' tak ri e qui c'ulmam, sibalaj c'ax xinna'.

⁷ Aretak utz u chomaxic xbantaj wumal, xebenyaj ri nimak tak qui banic xukuje' tak ri takanelab rumal u ya'ic jun eka'n je u banic wa' chquij tak ri e qui winakil. Xebenmulij ri nimak tak qui banic chnimalaj conojel che u chomaxic ri xquic'ulmaj,

⁸ xinbij c'u chque: “Ri uj, ka banom ronojel ri uj cuininak che u banic, e ka torom tak ri e ka winakil aj judeyib ri e c'ayim chque tak ri winak ri man aj judeyib taj. ¿La are' chi c'u ri ix quebic'ayij chi bic jumul rech ri uj quebekator ta chi na?” We winak ri' man xech'aw taj, man caquich'ob ta c'ut jas ta ri caquitzelej ta u bixic.

⁹ Ri in c'ut xinbij china': “Ri cätajin qui bano man utz taj. Rajawaxic qui c'utu' chi nim quiwil wi ri ka Dios, chi cak'ilk'ob ri yok'onic ri caquiban ri e k'ijilal tak diosib chke, ri qui banom qui c'ulel chke.

¹⁰ Xukuje' tak ri e wachalaxic, ri e to'l tak wech ri quechacun wuc', xukuje' ri in, nu yo'm puak xukuje' trico chque pa kajomal; je ba kabana' wa', ¡kasachisaj u tza'm we c'asaj ri' makatok'ij chi chque!

¹¹ Quixinbochi'j c'ut xukuje' chi kas camic chebitzelej tak ri culew, ri uva tak ri e qui ticom, ri qui che'al tak aseitun xukuje' tak ri cachoch, chebichupu' c'u tak ri qui c'as ri c'o tak iwuc', we puak, we trico, we u wa'l uva, we aseit.”

¹² Ri e are' xquitzelej u bixic: “Ronojel wa' cakatzelej, man c'o ta c'u cäkatok'ij na chque. Cakaban na ronojel jacha' ri bim la.” Xebensiq'uij c'u tak ri e cojol tabal tok'ob, chquiwäch c'u tak wa' xebentakchi'j chi xeban chi'nic ri kas cäban na che chokok che ri xquichi'j u banic.

¹³ Xintota' c'u na ri watz'iak xinbij: “Jewa' chubana' ri Dios che ri rachoch xukuje' che ronojel ri jastak rech, jachin ri man cutz'akatisaj ta u banic we chi'nic ri' ri kas cäban na, jewa' chubana' che resaxic ronojel ri c'o ruc' camic.” Conojel ri q'uialaj winak xquitzelej u bixic: “Je chbanok,” xek'ijilan c'u che ri Ajawaxel.

Ri rutzil ranima' ri Nehemiy

¹⁴ Ri winak xquitz'akatisaj u banic ri xquichi'j. Xbeytaj c'u na cablajuj (12) junab, quel cubij, pa ri k'ij ulok ri' re ri juwinak (20) junab aretak ri Artajers xinucoj che takanel chupam ri ulew re Juda c'ä chupam ri juwinak cablajuj (32) junab re ri rajawinic, mawi ri in mawi ri e to'l tak wech xkac'am ri tojbal tak kech ri ya'tal u ya'ic chke.

¹⁵ E are' tak c'u ri e takanelab ri xec'oji' can nabe chnuwäch, xebux jun eka'n che ri tinimit, k'ij chk'ij caquitok'ij cawinak rakan sak puak che ri rajil qui wa xukuje' che rajil u wa'l qui uva. Xak c'u u tz'akat chic ri e cajchaquib sibalaj c'ax caquiban che ri tinimit. Are c'u ri in man je ta xinbano, rumal rech chi nim quinwil ri Dios.

¹⁶ Xintz'akatisaj c'u ne ri u banic u yaquic ri nimalaj tapia re ri tinimit ri xinya' nu tzij che u banic, man c'o ta c'u tak ulew xebenlok'o. E are' tak c'ut ri e to'l tak wech, conojel xetoban che u banic ri chac.

¹⁷ Pa ri nu mexa quet'uyi' c'ä jun sient ruc' cawinak lajuj (150) winak, chi aj judeyib rech ri tinimit jacha' xukuje' ri e c'o tak quekle'n pa ri k'atbal tzij, man quebajilax ta c'ut ri quebopan che ka solixic ri quepe pa ri nimak tak tinimit ri e ka c'ulja.

¹⁸ Ri cäsuc'umax k'ij chk'ij in quinyowic, are': jun wacax xukuje' wakib (6) chij ri e chomak, xukuje' awaj ri c'o qui xic'; chu lajuj (10) k'ij c'o q'uialaj u wa'l uva. Chwi c'u ronojel wa', mawi jumul xintok'ij ta tojbal wech ri ya'tal u ya'ic chwe chi in takanel, rumal rech chi sibalaj nim chic ri eka'n ri ruc'am ri tinimit.

¹⁹ ¡Minsach pa jolom la nu Dios, xukuje' ronojel ri nu banom che ri tinimit ri'!